- كانت فخمه ونظيفه .
السلام عليكم
عدت فجر اليوم من تركيا ...من رحله اقول انها ناجحه مثل ماخططت لها بنسبة 95% والفضل يعود بعد الله ...لك من باقر والعميد وشروق ...ولكل من كتب حرفا ف هذا الصرح
من خوفي من انشغالي ف الدوام قررت اكتب نقاط متفرقه موجزه ومهمة الى ان اكتب تقرير
1) اجراءات المطار واستخراج الفيزا كانت جدا منظمه ولا جديد فيها...غير انها مثل ماذكر الاخوان ف المنتدى .
2) استقبالنا كان من قبل سائق من شركة الحران(حجز الفندق كان بواسطتهم ) بدون مبلغ اضافي ...كان في الموعد المحدد بالضبط ..وسياره ( مدري عاد نوعها ..عيوني كانت بس ع اسطنبول ) بس
كانت فخمه ونظيفه .
3) قلت للسائق دقيقه نشتري شريحه رقم تركي..قال هنا غالي من برا وكأنه كأنه قال انها بميه ..مشت علينا ...وحنا في الطريق للفندق وقف ع جنب ودخل واحد معنا تركي معهم في الحران المهم عطانا الشريحه وقال ب 60 ليره وحنا سمعا وطاعه ( كننا ملحوسيين )
طبعا الشريحه ب 30 ( ترك سيل ) يعني سرقنا وصراحه لا ..مهي سرقه لانه ماضربنا ع ايدنا غلطتنا بس يمكن أثر سحر تركيا
4) الفندق كان من اختياري سي في كي للعشره ايام...وصلنا بدري بس ماقصروا الفندق ودخلونا
5) الفندق موقع رائع ...فطور مميز ولذيذ ومتنوع ...موظفين أكثر من رائع ....غرفه جيد جدا اخترنا مطله ع البسفور..وطلعت مطله ع خرابه والبسفور من وراها !!
6) طبعا انا كل ما قال ابو سالم بدري او بنام ...اخذت عباتي و ع الاستقلال او مترو سيتي او شارع روملي ...كلها بالمترو بلحالي
7 ) استخدام المترو قد ماكنت متخوفه ...قد ما اقولكم مافي اسهل منه والناس فيه محد فاضي لغيره...والحمد الله ياربي لك الحمد عباتي اللي ف الرياض هي نفسها اللي باسطنبول ...الناس محتررمه جدا محد ناظرني بنص نظره وكنت رايحه جايه والله مادخل قلبي الخوف
8) الاتراك كلمة امناء شوي عليهم في الحسابات ....ناس لطفاء متعاونين جدا ....ماخذه راحتي معهم ف الاسئله ما اتردد ولا لحظه ...لو اضيع شوي طلعت الورقه وقريت لهم الكلمه او هم يقرؤنها ( اسم المعلم السياحي )
9)حبيت الاتراك من جد ....كله كوم ويوم يسئلوني من وين اقولهم السعوديه ..يقولون مكه اقول اي ...يقومون يتباركون فيني ويتمسحون
0- رحلاتي خارج اسطنبول ( سابنجا ، بورصه ، يلوا ) كانت مع شركةالحران ..
أ ) التزام في المواعيد
ب ) التزام بجدول الرحله المرسل لي
ج ) تعامل جدا جدا سهل ...متعاونين جدا
د) انا راسلت غيرهم كم شركه فيه اللي مارد علي...فيه اللي اسعارهم اغلى منهم
ه ) تعاملي كان مع الاستاذ وسيم .....انسان راقي بما تحمله هذه الكلمة من معنى كان بمثابة الاخ ...يتقبل النقد بصدر رحب..حتى اخر يوم ونحن ف الطريق للمطار دق يطمن ويسئل مع اننا ذهبنا بتاكسي
و ) طلبت تغيير الفندق في اخر ثلاث ايام ...لم يرفض ...ورحت ع ليكسي اوتمان ( بالنسبه لي الموقع رائع قريب من امين نونو ( رحلات البسفور والسوق المصري )وبالقطار من سركجي الى فلوريا ( اكواريوم اسطنبول ، حديقه فلوريا والمطعم ) الفندق فخم جدا...موظفين متعاونين ...النت عندهم سئ داخل الغرف ...ما نستخدمه الا لجهاز واحد فقط يا الايفون يا اللاب توب ...
1) رحلتي لجزر الاميرات رائعه ..ولم تتم الابعد مساعدة العميد وباقر ربي يحفظهم من كل شر ...ويفتح لهم ابواب الخير كلها .
2) تجهيز الشنط للعوده للرياض ...كان ابو سالم مقلقني من الشنط والعفش حجزنا عن طريق الخطوط التركيه جهزت اغراض التاكس فري بشنطه ..وقلت هي اللي نشيلها للطائره ...دخلنا المطار وختمنا الفواتير فقط ثم قص البوردينق وكان معي شنطتين كبار والثالثه الصغيره ..وزنا الكبار كانت اقل من 30 كغم بشوي اما الثالثه كانت 13 ومع ذلك دخلتهم كلهم للشحن الثلاث ( الى الان مو مستوعبه لأن الكل يقول مشددين ف الوزن ولكل شخص شنطه واحده فقط ) تيسير من رب العالمين ..
ثم ختم الجوازات ثم التاكس فري اخذنا القيمه نقد مباشره سئلتني بس دولا ولا ليره ..اخترت الدولار طلع لي 20 دولار ...للاسف كان ودي اعلمكم الفواتير كم قيمتها بس مدرري ...وبعض المحلات اللي شريت من عندهم ما اهتميت اخذ التاكس فري
3) محد طلب ابد يشوف البضاعه ..لا وقت ختم الفواتير ..ولا عند الدفع الكاش لانه الشنطه ترحلت اصلا .
3) المفاجاه رحلتنا ع اساس اقلاعها عشره الا ربع ليلا ..وعند قص البوردنق نلقي الموعد 8 ...حمدنا الله ع ذهابنا مبكرا ...تئكدنا من البرنت..احنا مو غلطانين ف الموعد
سئلنا قلنا يمكن الثمانيه هاذي غلط ...لا كل ما سئلنا اقلاعنا 8 ...طيب اي بوابه انت تابع الشاشه الالكترونيه اول مره 302
نتفاجا باخر معنا ع نفس الرحله كاتبين موعد الرحله سبعه ونصف ..ونفس الشئ نسئل الموظفين ويقولون لا 8 ...تابعنا الشاشه مره ثانيه الرحله اقلاعها 8 بس البوابه اختلفت !!!!
اخرتها دخلنا للطائره ع الساعه 9 واقلعت العاشره الا ثلث ...ولازال البحث جار ع تخبط الخطوط التركيه !!
اسفه جدا ع الاطاله قلت موجزه ...بس صار تقرير مصغر ...انتظروني ف التفاصيل ومدعم بالصور والتواريخ ..
نسيت اقولكم البدايه استغفال كان ف الرقم التركي و ف النهايه سرقه من الفندق غسل عباتي فقط فقط فقط كلفت 30 ليره !! كنت ادور مغاسل حول الفندقين مافي ابد
انت بالمرة مختصرة الموضوع .المهم سيدتي هذه مجرد مقدمة . وهي مقبولة منكم
.
ونقاط مهمة وحساسة ومفيدة
.
يارب ارزق ام سالم الجنة هي وكل من تحب اللهم أمين .