- الاسعار جيده....
السلام عليكم ورحمة الله وبركاته
شلونكم.... شأخباركم!!
حبيت أروح لمطعم مصري كتب عنه الاخ العزيز : فهاد ....( أختكم نصها مصري.... و تحب الاكل المصري)
هذا رابط موضوع الاخ فهاد: https://artravelers.com/p/re/108363 بعضكم مدح المطعم والبعض ما مدحه
قلت اجربه وأشوف....توني من شوي جيت منه..
و الحمد لله الاكل يجنن...حلو حيل...
المكان حلو ونظيف...الخدمه زينه...مو بطيئه...
الاسعار جيده....
زوجي يقول المطعم هذا أحلى من حسني ( كتبت عنه بتقرير)....و انا عندي الاثنين حلوين....لكن تفرق: المسافه... لان ابو شقره جنبنا بالفروانيه لكن حسني بعيد بحولي..
نسيت أقولكم... أول ما دخلنا لقيت واحد يعزف على اله مدري شسمها أغاني ام كلثوم...للاسف صورته لكن الصوره مو واضحه..لاني اصورها بسرعه مابي احد يشوفني..قلت وانا طالعه اصوره,,,لما طلعت لقيته راح قلت خلاص المره الجايه
ملاحظه:حبيت أني ما اصور صور مشابهه لصور الاخ فهاد... عشان جذي عدد الصور قليل
و اسفه على الصور اللي مو واضحه...لان المكان كان مزدحم شوي وما حبيت ان احد يشوفني
أخليكم مع الصور:عجبني بالاصنسير رسومات فرعونيه: صورتها لكم :أول ما تطلع من الاصنسير تلقى بوجهك هذا المنظر:القاعه اللي كان يعزف فيها الرجال:ممر الكابينه:رسم كاريكاتيري عن المطعم: موجود على الطاولات:الأداة اللي ننادي على الجرسون فيها:جرس
المنيو:طلبنا:عصير منجا و عصير فراوله .... حركات:الخبز : مصري و ايراني : ترى الخبز اكثر من جذي بس تذكرت التصوير بعد ما اكلنا نصه ههه
حمص:مسقعه: هذي غرامي .. بأي مطعم مصري لازم أطلبها... بس هالمره مسقعه باللحمه المفرومه:
عيش مصري : يجي مع المسقعه:حمام محشي بعيش: لي : الصراحه.. ما عجبتني الحشوه... كلها دارسين :من الداخل:كفته و كباب و ريش :طرب : هذي غرام زوجي... حب الاكله هذي من سفرتنا لمرسى مطروح... صار يروح المطاعم المصريه عشانها ههه
مو مكتوبه بالمنيو ... بس هو سأل الجرسون قاله اشوف لك ... راح وجا ... قال ايه عندنا طرب
هني زوجي طار من الوناسه...
طلع طعمها يجنن
قلت للجرسون: ليش مو كاتبينه بالقائمه؟
قال: يا مدام لانه مو متوفر بأي وقت... لان الطرب عباره عن الحجاب الحاجز للخروف... و الخروف الواحد فيه بس حجاب حاجز واحد... دخلنا بالاحياء
صورة طرب:و أخيرا أحب أشكر أخوي فهاد وأشكر كل اللي تابعو موضوعي وردوا عليه .. يعطيكم العافيه
