وعليكم السلام
تروح وترجع بالسلامه يارب
بما انك جديد اتمنى انك تاخذ لك لفه بالمنتدى وتقرا حتى تكون فكره عن الديره وطبيعتها
بعدها انت تقرر وين تروح وتجي وتطرح جدولك للاعضاء وهم يشيرون عليك للافضل

عاشق الرياض11
وهذا انا ماسك الخط صراحه مواضيع تقرها مشوقه

1. اليوم 15 : العودة إلى جاكرتا للراحة والإستعداد للعودة للغبار


2. الميزانية : 3500 دولار تزيد ماتنقص

هلا أخوي غروب الروح .... أسأل الله أن يشرح صدرك ويسعدك .... وترى الحال من بعضه يالأخو لكن ربك يعين
إذا شلنا يومين السفر والعودة يبقى عندك أحلى 15 يوم .... وبما إنك بتسافر لوحدك بعطيك جدول أتمنى يكون مناسب لك .... نقول بسم الله

• اليوم الأول : جاكرتا يوم واحد (يوم الوصول) للراحة ومايمنع زيارة منطقة أنشول (دنيا فنتازي - سي وورد - عروض الحيوانات البحرية سومدرا) .... والسكن يكون قريب من أنشول سواء في شقق أستون مارينا أو فندق ميركوري
• اليوم الثاني والثالث والرابع : التوجه لمحطة القطار وحجز درجة أولى تقريبا ب 50 ألف روبية إلى باندونق والقطار تجربه حلوه فطول الطريق بتشوف مناظر بديعه لاتراها بالسيارة .... وفور وصول باندونق التوجه مباشرة إلى لمبانق والسكن في منتجع ساري آتر أو شياتر هابي لاند أو جراسيا سبا .... والتماشي في باندونق إختار إللي تحب من التالي :
• بركان تانكوبان براهو ... وبصراحة ماجاز لي
• شلالات ماربيا ... شمال باندونق نص ساعة بالسيارة
• شلالات سيماهي ... غرب باندونق 45 دقيقة بالسيارة والمنطقة روعة
• المياه البيضاء ( أير بوتي) ... ساعة بالسيارة والمنطقة روعة وباردة
• بحيرة شيبودري ... المنطقة قمة في الطبيعة وتصلح لكشته بحيث تاخذ معك لحيمات وتضبط كبسه أو شوي
• اليوم الخامس والسادس : زيارة قرية قاروت الحالمه .... وهي قرية جبلية بديعة باردة نوعا ما تقع جنوب شرق باندونق حوالي 60 كلم .... بها مياه الينابيع العذبة الحارة والتي تختلف عن مياه منطقة الشياتر الغير عذبة في باندونق .... وقرية قاروت تحوي الكثير من الأماكن التي تستحق الزيارة .... مثل الشلالات ومصب نهر سنتولو وأيضا شاطيء سنتولو .... والسكن في قاروت أرشح لك فندق تيرتاقانقا tirtaganga فندق رخيص و روعة للراحة والإستجمام يحوي مسبح لمياه الينابيع العذبة الحارة وبركة صغيرة لتلييخ الركب ههه يصلها الماء الحار دايركت بدون خلط وبجانبها دش حار للظهر .... تحس بعد المياه الحارة إنك مستعد تلف أندنويسا على رجولك .... حاول تسكن فوق المسبح لأنه أحلى مكان تشوف منه الجبل والمسبح تحتك ...
• الأيام من 7 إلى 14 (8 أيام) : التوجه إلى مطار باندونق وتكون قبلها بكم يوم حاجز تذكرة على جزيرة بالي على خطوط ليون أو آير أسيا .... أرشح لك السكن في Aston Grand Kuta Hotel And Residence لأنه فخم ورخيص وجنبه بقالة متكاملة ويبعد تقريبا 7 دقايق عن شاطيء كوتا وشارع لاقيان وحاول تسأل عن سواق دايم يكون جنب الفندق إسمه madi وأنا أسميه ماضي يعجبك لاكن مايعرف إلا إنجليزي .... والسكن في قلب كوتا غالي والمنطقة زحمه ومافيها زود ماغير شاطيء ومطاعم ومراقص .... وبالنسبة للجدول في بالي تتعب معاه .... لاكن خلنا نقول
• التجديف النهري في Bakas Levi Rafting .... قمة الوناسة والسعادة لا يفوتك أرجوك .... ساعتين في النهر وسط الجبال والشلالات والشخاليل .... وفي نص الطريق يوقفون للراحة والإسترخاء .... خذ معاك معجنات أو سندويشات ولاتخاف على الكاميرا والجوال لأنهم يعطونك شنطه ضد الماء .... بيطلع عليك التجديف ب 400 ألف روبية تزيد شوي تنقص شوي أنت وشطارتك بالمكاسر
• شاطيء نوسا دوا للألعاب البحرية .... فيه محل مشهور يعرفونه السواقين والمحل هذا عندهم تأمين وهذا شي مهم جدا لأن مره طحنا من البنانا بوت وصفق راسي براس خويي وتعال شوف الدم .... أنا ثلاث غرز وخويي 7 غرز كلفت 700 ألف وخذينا فاتورة من المستشفى ورجعنا للشاطي وعطونا ال 700 ألف وفوقها حبة راس .... أرشح لك الباراشوت والبنانا بوت والفلاينق فش والجت سكي .... بيطلع عليك البكج ب 400 إلى 500 ألف أنت وشطارتك بالمكاسر
• شاطيء دريم لاند .... روعة الروعات تاكل فيه وجبه وتعين من الله خير وسط الشجر وعلى أحلى بحر
• الغواصة أوديسي .... ولازم تحجز لها قبل بيومين على الأقل وتجربتها شي تمام
• جزيرة (بينيو) .... تروح لها عن طريق شاطيء نوسا دوا .... فيها مطاعم أكلات بحرية وغوص وسلاحف بحرية وشاطيء زمردي
• عندك شاطيء جمبران .... أكل بحري على قفى من يشيل تجيه قبل المغرب تشوف الغروب وعقبها تسّمر الركب بأكلات بحريه .... والله الله بالمكاسر
• بحيرة باتور وجبل كنتماني .... هذي الرحلة يبي لها يوم من الصبح إلى قرب المغرب .... مشوارها تقريبا ساعتين لاكن ايش مشوار ؟؟؟؟ قمة المناظر والأجواء .... وإذا وصلت المرتفعات وهفك الهوا البارد إللي يرد الروح ماعاد ينقصك إلا كم صيخ لحم ولا كبيسه تضبطها سريع .... وفيه مطاعم فوق تطل على البحيرة الجلسة فيها دوا العليل
• القرية المائية (ووتر بوم) في شارع كوتا ..... وناسه وتكحيل وتراهي تقفل الساعة 6 المساء
• فيه حديقة حيوانات وحديقة بالي للطيور إذا بغيت
• عندك المياه الحارة (ديفازا) يعرفونها السواقين
• شلال قت قت وشلال مندوك .... والطبيعة المحيطة بهم جنان
• إذا تبي تزيد تدفق الإدرنالين .... عندك لعبة السلنق شوت sling shot (النبيطه) .... ولعبة بانجي جمب bungy jumb ... كلها في كوتا

وفيه أماكن كثير في بالي وش أقول وش أخلي ..... ماعليك إلا الإختيار ..... والحجوزات لهذه الأماكن تسويها من المكاتب والأكشاك المنتشرة في شارع كوتا لاكن تكفى الله الله بالمكاسر ... ترى المكاسر عندهم يعتبر ثقافه ولو تلاحظ الخواجات يقعدون يكاسرون بالنص ساعة ماعندهم مشكله ... لذلك لا تفكر الموظف بيحقد عليك من كثر المكاسر ... كاسر وكاسر وتفنن بالمكاسر
وبإمكانك تقليل مدة إقامتك في بالي وتزور جزيرة لمبوك يومين أو ثلاثة بالباخرة (الفيري) ب 30 ألف روبية = 13 ريال تقريبا .... وتسكن في شاطيء سنقيقي في لمبوك وتزور جزيرة قيلي تراونقان وتفلها هناك مع الخواجات خصوصا يوم الأثنين تكون الجزيرة هذي مشعلله
أنا مجرد أقترح عليك إقتراحات وأنت أبوها وسمها .... ولو تضبطها وتتكتكها تطلع أحلى سفره لك .... ونصيحة أخو لا تروح الجبل بونشاك وتضيع وقتك ووناستك .... لو تروح خميس مشيط أبرك لك من الجبل وغثاثته .... ويبقى لك مطلق الحرية وكامل التصرف .... إنما هي مقترحات وآراء قابلة للأخذ والرد

اليوم 15 : العودة إلى جاكرتا للراحة والإستعداد للعودة للغبار

الميزانية : 3500 دولار تزيد ماتنقص

خذلك ياطويل العمر 3 كيلو رز مع معلبات تونه وفول مدمس وأجبان وزبدة فول سوداني و و و ولا تنسى البهارات الزينه و المكسرات ... وكثر من الشورتات و التي شيرتات وإبتعد عن الجنز والكشخات والترزز إللي ماله سنع .... خلك بحري مهوي ههه
وبالتوفيق يارب ....

سيدوارجو ...
ياسلام عليك كلمة مبدع قليلة بحقك وأنا أخوك بارك الله فيك وجزاك الله خير الجزاء
ونصيحة بسيطة لاأخي العزيز غروب الروح ياليت تشوف أحد من أصحابك أو أقاربك
يروح معاك ,,,

أبن السعودية
عزيزي الغالي أبن السعودية .... بما إنك كبيرنا وأنت من علمنا السحر .... دعني أكرر وأقول أنني بمثابة طالب في كنف حضرتك .... نقول الكثير وتأتي أنت بكل بساطة وتضع بصمتك التي تغني عن كل شيء .... وأنا أكرر ماقلت لحبيبي غروب الروح شوف لك خوي يالغالي لو بس واحد يرد الصوت ..... لأنك بتطفش من كل الجداول وأنت لوحدك وراح تشتاق للخوي .... وإذا مالقيت شوف لك سواق على الدين بحيث يكون نقوه وتخاويه عاد لاحول ولا قوه إلا بالله .... يكون هو إللي يسندك ويصورك و يشب ضوك .... لاتنحد على أحد خصوصا السياح ياأخوي وخلك في المضمون .... ويارب نشوف باكورة تقاريرك تصدح في المنتدى ....

مافيه احد راح يسافر اندنوسيا وطفشان!!

سيدوارجو
بارك الله فيك سيدوارجو
انا اشهد انك ذيب
تشكر على ماسطرت يمناك رايك طابعه وفي شنطه السفر
مافي احلى من كذا عطيتنا الخطوط العريضه وعلينا التفاصيل

أبن السعودية
والله يابن السعودية اثنين كلمتهم وعندهم ضروف
والعاده اسافر لوحدي مصر
بس مليت ابي ازور شرق اسيا وكنت ابي ازور الفلبين بس لغتنا الانجليزيه من جنبها
واشوف العمه مناسبه للوحداني وبنحصل ان شاء الله من نسولف معه
شكرا على النصيحه ياجعلك دوم عالي

جاكرتاوي 999
الا فيه طفشان الين يختم الجواز
كل همه على قده الله لا يجيب هموم
تحياتي لك جاكرتاوي مانستغني عن توجيهك....