1. نزلنا مطار كازا بلانكا (الدار البيضاء) و كانت الساعه 6 العصر...


2. كان الجو رايق قرابه 24 درجه مئويه.


3. Jul 15


4. الجمعه


5. الأحد


6. و هذي صوره لطبيعه فاس من جوا ماكدنالز


7. Jul 19


8. الثلاثاء


9. Jul 20


10. الأربعاء


11. Aug 8


12. الاثنين


13. Aug 9


14. الثلاثاء

السلام عليكم
هذي رحلتي مع العائله الكريمه الى المغرب و اسبانيا
هذا الجزء اللي فيه سفرتي للمغرب و فيه موضوع بنفس العنوان في منتدى اسبانيا اللي فيه جزء السفره الى اسبانيا
Jul 14
الخميس

نزلنا مطار كازا بلانكا (الدار البيضاء) و كانت الساعه 6 العصر...

كان الجو رايق قرابه 24 درجه مئويه.

ركبنا مع سواق (اذا احد يبي رقمه انا في الخدمه... يا شين اللي يبي يكسب من ورا الموضوع) و اتجهنا من المطار مباشره الى مراكش... الغريب ان الطريق كان سيد واحد رايح جاي و الشيء الثاني كان فيه جميع وسائل المواصلات بالطريق سيارات, دبابات, سياكل, حمير تجر عربات, ناس تمشي. كلش يعني كان المنظر غير مألوف. كان المشوار بقرابه ثلاث ساعات و نصف.
بالطريق مرينا من عند مدينه سطات... كانت حلوه و صغير تنفع للتفرج شوي و تكمل مشي.
وصلنا مراكش و سكنا في منتجع النخيل كان حلو بس المشكله انه مو داخل مراكش لازم تدخل مراكش بالسياره. فما قدرت اتمشى بالديره لحالي شوي طول الوقت مع اهلي. و هذي صوره المنتجع.
و من جهه ثانيه
هو رائع و فيه مسبح حلو يعني اقول زين للعائلات.

Jul 15

الجمعه

طلعنا نتمشى بالسياره على المدينه كانت حلو و رايقه و الشيء اللي شد انتباهي هو توحد لون المدينه كلها لونها أحمر (زي لون المنتجع اللي فوق) بس تختلف درجات اللون و تختلف الأوان اللي داخله معاه بس بشكل عام كل المدينه حمراء و هذا الشيء يميزها عن باقي المدن.
بعدها رحنا نشوف مسجد يوسف بن تاشفين. او بعضهم يسمونه مسجد الفناء. و هو بجنب ساحه الفناء (أشهر شيء في مراكش حيث الإستعراضات و السحره و الأسواق الشعبيه) بصراحه المكان رائع.
هذي مناره مسجد يوسف بن تاشفين من داخل ساحه الفناء
و هذي صوره من بعيد لطرف ساحه الفناء
بعد ما تمشينا و صليت المغرب بالمسجد اللي ما به مكيفات (جامع يوسف بن تاشفين) رحت اشرب شاي مغربي ( أتاي) في مقهى مطل على الجامع و الساحه فوق سطح كان المنظر حلو مرره.
Jul 16
السبت
طلعنا الصباح الى منطقه يسمونها اوريكه هذي منطقه جبال حلوه مرره و فيها شلالات باره و مناطق خضراء بصراحه كانت روعه خيول و مقاهي على الجبال و ناس تسبح, يعني شغل حلو.
هذا منظر لجزء من المكان
و هذي صوره لي بمقهى في المنطقه ... طبعا المقاهي اللي داخل موب نظيفه فأنا اكتفي بكولا هناك
و حنا راجعين بالطريق جعنا و مرينا على مطعم مغربي رايق و راقي بس غالي و أكله موب على كل حال بس الجوع اكلنا و جلسته روعه اسمه
Auberge restaurant ramuntcho
ملاحظه تراني اكتب مذكراتي هناك بالانجليزي بس انسى ارجعها بنطقهم كتابه بالعربي فاحطها لكم زي ما كتبتها يومها..
بنهايه اليوم اخذنا لنا دورتين بالمدينه و شارع محمد الخامس... بعدها تقهوينا بشارع فرنسا أو يسمونه محمد السادس.
Jul 17

الأحد

مشينا الصبح من مراكش الى افران الطريق كان ماشي حاله بس طويل مرره ... اخذ معنا قرابه ست ساعات
لما وصلنا هناك وصلنا لمدينه صغيره هادئه و مرره حلوه و راقيه ... ما تصورتها ابدا بالشكل هذا و كانت خضراء و الأهم بارده ... يعني الديره ما فيها مكيفات ... ولا توسوس امهاتكم و تلبسكم جاكيتات... تراها مهيب هاك البرد.
كنا ساكنين بفيلا بوسط المدينه.
هذي صوره للديره بالليل مو واضحه بس تبين نوع البيوت بحارتنا
Jul 18
الاثنين
رحنا الصباح الى فاس كانت جيده بس حاره (طبعا ما فيه شيء زي حر الرياض) بس مقارنه بغيرها و مشينا بفاس القديمه و اخذنا لنا فره بجامع القرويين
هذي صوره له من الداخل
و هذي صوره للحوش حقه طبعا البزر خاش عرض هو و ايدينه

و هذي صوره لطبيعه فاس من جوا ماكدنالز

و بعدها رحنا الى المسابح الكبريتيه... نصيحه لا تقربونها قرف من الأول الى الاخير ناس جلودها رايحه فيها بمسبح واحد و الريحه من يوم تدخل الديره تشمها كنها بيض خربان من سنه. لا يهمكم اللي يمدحها تراها عذاب.
و بالليل تمشينا بمدينه افران على رجليننا و بالحدايق كانت رائعه. بس القهر اننا ما زرنا جامعه الأخوين يقولون اهل الديره انها حلو خاصه للطلاب الجامعيين المثلي بس ما ادري ليش بس اسألوا اللي سيروا عليها.

Jul 19

الثلاثاء

طلعنا بالصباح الى مدينه ازرو ... كانت مدينه قديمه و بصراحه ما اعجبتني على ان كثير يروحون يتقضون من هناك بس احس انها موب نظيفه (ياي يا خكري). بعدها رجعنا الى افران علشان ناخذ لنا غفوه الظهر لأن مكناس من الجهه الثانيه من ازرو فقلنا نروح العصر. بس الصدفه و انا نايم و فاتح الدريشه علشان الهواء يدخل حسيت بشيء يلعب بالغرفه قمت لقيت صقر صغير داخل. انا ما صدقت صكيت الدريشه و لعبت معه بعدين اطلقته. هذي صوره اخوي الصغير معه(اوضح صوره).
رحنا لمكناس بالعصر و زرنا مسجد فيه اضرحه اجداد الملك. و بعدها رحنا للمدينه القديمه.

Jul 20

الأربعاء

مشينا من افران الى طنجه. كانت المدينه ساحليه حلوه . كانت حاره نوعا ما بالظهر بس الهوا اللي يجي من البحر كان بارد حتى بالنهار. سكنا هناك بفندق الموفنبيك كان حلو بس غلي و المشكله الثانيه انه كان على الشاطئ بس يبغالك ربع ساعه مشي الى ما توصل الى الكورنيش اللي تمشي فيه الناس و المقاهي. هذي صوره من داخل الفدق بس مو مرره واضحه.
مشكله وحده كرهتها بالفندق... هي ان باب الحمام قزاز مثلج و مزخرف بالعادي يعني لو مر احد قدام الحمام شاف اللي ما ينشاف. فخويكم خواف هذا و هو انا و ابوي بنفس الغرفه بس ما ادخل الحمام الا اذا صارت الغرفه فاضيه. اقفل الغرفه بعدين ادخل الحمام.
بصراحه كانت المدينه حيه و العالم رايحه جايه يعني لو تجلس على كوفي على الشاطئ يكون من جهه البحر حلو و بارد نسيمه و الناس تلعب و نشاطات عنده. و على الرصيف الناس زحمه رايحه جايه و الشارع فيه استهبال و هبال و سعه صدر العائله كلها حبت المدينه هذي.
Jul 21
الخميس
رحنا نتمشى بطنجه على السياره بعدها رحنا لمنطقه اسمها القصبه منطقه قديمه شوي بس تستاهل الشوفه لأن الديره مافيها شيء كثير ينشاف الا الشاطئ يعني ديره وناسه ليست اثار.. (هذي من وجهة نظري أنا).
ودي احط صور بس المشكله ان في هذه الفتره الى منتصف وقت اسبانيا ضاعت الصور لأن الميموري حقت الكاميره خربت و ضاعت الصور.
Jul 22
الجمعه
رحنا نصلي الجمعه و الخطيب خطب بنا خطبه سعه صدر... بعدها تمشينا على الشاطئ الى العصر و بعدها رحنا الى مطعم تنشاف لمباته من شاطئ طنجه واضح بلون ازرق بس تراه بعيد شوي. اسمه...
M'narPark
فيه شاليهات و شقق حلوه ... مطعم كبير... ملاهي اطفال ... العاب مائيه . بصراحه حلو بس يوم اروح له كان جديد و ما افتتح كله. و معي كرته اللي يتصل لعى الريسبشن (و نرجع نقول دعايه قويه)
و هذي كانت اخر ليله لي بالمغرب قبل ما اروح الى اسبانيا عن طريق السفينه.

Aug 8

الاثنين

جينا من اسبانيا الى طنجه بالسفينه و رحنا لمحطه القطار و اخذنا قطار الى كازا بلانكا يقعد قرابه خمس ساعات و فيه تبديل قطارات في محطه سيدي قاسم (هو واحد من اسيادهم بس سيدي شيء) صار فيه احداث كثيره بالقطار كن نظامه غبي و فوضى بس استانست فيه كثير ... صارت مشاكل واجد فيه بس وصلنا بالسلامه هناك.
نزلنا الى فندق كراون بلازا (هولي داي ان) كان حلوه خدماته بس كان مبناه قديم ... اللي اعجبني فيه سعه حماماته و كبر غرفه.

Aug 9

الثلاثاء

رحنا الصباح الى سوق الحبوس نشتري الهدايا لأنها اخر محطه برحلتنا. و بالعصر رحنا للشاطئ و تغدينا و بعدها تمشينا على الشاطئ. الجو رائع بس المدينه صراحه ما اعجبتني زي اللي قبل ما ادري هي اسبانيا خربت النظره او الديره ما ارتحت لها... و بالليل رحنا نتمشى عند ساحه محمد الخامس.
Aug 10
الاربعاء
الساعه 6 صباحا طائره الرجعه.
ملاحظات على الرحله:
الديره اغلى من ما توقعت. الأكل او اقول المعيشه بشكل عام.
الشعب طيب.
احس ان مدينه الرباط حلوه بس ما امدانا نزورها.
اعرف ان المحل اللي مكتوب عليه مخدع هاتفي يعني انه كبينه تليفون بس...
هذي وش حلها؟؟
اي سؤال أنا موجود...
حقوق التصوير محفوظه (اخس يا كوداك