1- وش افضل طريق يمكن اني اسلكه من الدمام الى الكويت؟
مافية الا طريق واحد من منطقة الدمام
طريق ابوحدرية يوصلك الى بطن الكويت
اما باقي الاسئلة : ارجوا من الاخوة و الاخوات الرد
بالصدفة انا ماشي مع الاهل في نفس اليوم - الله يوصلنا و اياك بالسلامة

يعطيك العافيه اخوي ابراهيم
بإنتظار الاجابة على باقي الاسئلة من اهل الخير

1. هلا اخوي محال الله يحييك بين اهلك واخوانك

mo7al_55

هلا اخوي محال الله يحييك بين اهلك واخوانك

افضل طريق الدمام الى الجبيل الخط الداخلي مو بو حدريه لانه مكسر ليمن توصل الجبيل يطلعك الشارع على اخر شي في خط بوحدريه وبعدين طريق الخفجي وتوصل الكويت بالسلامه
تاخذ الطريق من اول الحدود على شارع الملك فهد (خادم الحرمين الشريفين ) رحمه الله عليه الى ان ياتيك طريق الامير مساعد تاخذه على اليمين طبعا كله خط سريع وسايدين والطريق فيه اناره وفيه استراحات جميله ومطاعم وكافي وسوبر ماركت اذا اخذت طريق الامير عبدالرحمن بن مساعد اعتقد هذا اسمه تروح طوالي الى المسيله وبعدين تلف يمين على السالميه ومن الحدود الى السالميه تقريبا ساعه اذا كنت تمشي بحدود 120 كيلو لان في كاميرات للسرعه خلك صاحي
افضل فندق او شقق مفروشه انصحك فيها هي ريتز السالميه وهي مقابل سوق السالميه وهي جميله جدا ومناسبه لكم وسعرها بحدود 30 الى 50 دينار للشقه الكبيره طبعا
بالنسبه للاسواق سوق المباركيه هو الافضل لرخصه وهو من الاسواق القديمه والمميزه في الكويت
وعندك المجمعات اولا المارينا مو ل مجمع الفنار مجمع سوق شرق مجمع الكوت في الفحيحيل
المسرحيات في مسرحيه حق طارق العلي تقدر تحجز على طول وهي في ميدان حولي
المطاعم كثيه منها اللبناني الشهي مثل ميس الغانم وهو مقابل ابراج الكويت وبرج الحمام على شارع الخليج او الكورنيش وعندك المطاعم العالميه جميعها على شارع الخليج
اتمنى اني ما نسيت شي وانصحك اذا في احد من ربعك عنده جهاز الجارمن او الستيريت بايلوت لانك راح ترتاح له في العناوين وبسرعه يوديك للمكان الي تبيه بدون لف او دوران وكل المجمعات والمطاعم مخزنه فيه

حياك الله اخوي بالنسبة للفنادق عندك
ريترز شرق او الكوت يارد او سفير البستكي ( بمنطقة شرق )
ريترز السالمية او هوليدي ان السالمية او المارينا مول او عنى بالاس ( بمنطقة السالمية )
على العموم الفنادق والشقق الفندقية وايد وانشالله الاخوان يساعدونك اكثر .
لاتنسى زيارة ابراج الكويت والمركز العلمي.
اهم المجمعات :
سوق شرق
المارينا مول
الفنار ( وبجانبها العديد من المجعات )
المهلب ( بحولي)
الكوت ( الفحيحيل )
المطاعم:
ميس الغانم ( على البحر مقابل الابراج)
محل مغل يوجد منه فرع في المارينا مول داخل المجمع نفسه وفي فرع منه بنطقة شرق وحولي.
برج الحمام على البحر.
وعلى امتداد شارع الخليج هناك سلسلة من المطاعم العالمية.
وحياكم الله

ما قصروا اخواني
الله يعطيهم العافيه
ان بغيت اي استفسار ثاني تفضل
ولا تنسى كاميرتك والتقرير الحلو

1. 1- وش افضل طريق يمكن اني اسلكه من الدمام الى الكويت؟


2. 2- وش فيه فندق او شقه مناسبه لنا احنا الاثنين ؟


3. ثانيا الاسواق الاقتصاديه


4. 4- وش افضل المطاعم؟


5. 9- الاكوابارك (الحديقه المائيه)

1- وش افضل طريق يمكن اني اسلكه من الدمام الى الكويت؟

افضل طريق اخوي الفاضل اهو طريق ابو حدريه من الدمام طوالي مثل ما تقولون لوسط مدينة الكويت لا يمين ولا شمال وهو عباره عن طريق حارتين وفي بعض القطاعات من الطريق تكون 3 حارات وتكون المسافه من الدمام لغاية حدود الخفجي بما لا يزيد عن 400 كيلو ومن الخفجي لغاية مدينة الكويت 120 كيلو ومن عيوب هذا الطريق بعض التحويلات اعتقد 5 او 4 تحويلات يكون فيها الطريق حاره وحده ولكن مجموع مسافات هذي التحويلات لا يزيد عن 30 كيلو يعني سهاله بإذن الله مع العلم ان الاستراحات ومحطات البانزين كثيره على الاراضي السعوديه او الكويتيه يعني لا تشيل هم الطريج ان شاء الله سهاله حيل ثبت السرعه على 120 وشد حزام الامان وتوكل على الله وبالنسبه للحدود لا تحتاج للنزول من السياره تختم الجواز وتسوي الجمرك وانت في سيارتك ما عدا تطبيق صورة الجواز الخاص بالنساء يتم في غرف خاصه ( تنزل زوجتك تختم جوازها على السريع وترجع ) ولا توجد اي تعقيدات بالموضوع
ملاحظه: بحمد الله تزخر طرقنا باللوحات الارشاديه كل المطلوب منك حفظ اسماء المناطق التي تريد زيارتها

2- وش فيه فندق او شقه مناسبه لنا احنا الاثنين ؟

1- الفنادق في الكويت عديده واسعارها تنافسيه بمناسبة المهرجانات المقامه حاليا وتقع على الشريط الساحلي والمناطق المتاخمه لها ابتداءا من مدينة الكويت وحتى رأس السالميه كما توجد العديد من المنتجعات السياحيه ( شاليهات بحريه ) ايضا على الشريط الساحلي ابتداء من المنقف وحتى الخيران كل المطلوب منك انك تمشي على الخط الساحلي (شارع الخليج العربي)+(خط فحيحيل الساحلي) وتختار المكان اللي ترتاحله بخصوص الاسعار تبدأ من 30 دينار لغرفه في فندق 5 نجوم وحتى 150 دينار لو حبيت شاليه في منتجع سياحي 5 نجوم .
2- اول ما تعدي جوازات (الخفجي النويصيب) يمكن ان ترا بعض اللوحات الاعلانيه للشقق المفروشه واسعارها لا تتجاوز ال30 دينار لليله الواحده وممكن تكاسرهم
3- طريقه ممتازه واقتصاديه ولكن تفتقد للخدمات الفندقيه قف عند اول بقاله واطلب اي جريده اعلانيه مثل الوسيط او 808080 او الصفاة او اعلانات كثيره هذي الجرايد وهي مجانيه وتصفحها للحصول على ارقام تلفونات شقق مفروشه او شاليهات بحريه يقوم اصحابها بعرضها للايجار وبأسعار معقوله بالنسبه للشقق لا تتجاوز ال20 دينار وبالنسبه للشاليهات وعادة تكون لاسره كبيره لا تتجاوز اسعارها 75 دينار ولكن احرص على ان تكاسرهم بالعاده ما يعطونك السعر النهائي من اول شي لازم تنشف ريجهم يعني ;)
4- ايضا في طريقك الى مدينة الكويت بالامكان رؤية بعض اللوحات الاعلانيه لتأجير مخيم في بر الجليعه وعادة تكون هذي المخيمات 5 نجوم اعتقد الكويتيين بدعو بالمخيمات ولكن لا انصح بها لو كنت انت وزوجتك راح تملون تحتاج هذي المخيمات لحضور عائلي كبير علشان تستانسون فيها
بالنهايه او زبدة الكلام راسك وراس زوجتك نصيحتي لك تاخذ غرفه في فندق 5 نجوم وتريح بالك لانك ما راح تقضي وقت طويل حسب ما تفضلت في اسئلتك يعني اكثر وقتك راح تكون خارج مكان السكن وتكلفتها ما راح تتجاوز 35 دينار لليله فقط عليك اختيار المكان اللي ترتاح فيه وفنادق الخمس نجوم اماكنها بارزه وحيويه
3- وش افضل الاسواق اللي ممكن نزورها؟
بالنسبه للاسواق
اولا اسواق المودرن:
1- مجمع المارينا مول على شارع اخليج العربي
2- شوق شرق على شارع اخليج العربي
3- مجمع بيروت حولي
4- مجمع المهلب حولي
5- مجمع الكوت اعتقد الفحيحيل
6- كويت ماجيك اعتقد الفحيحيل بعد هالمكانين ماني متأكد منهم صراحه
7- مجمع الحمرا مول الفروانيه وين بالضبط عاد اللي يسأل ما يتوهش
تقريبا هذي اشهر المولات بالكويت وفيها مطاعم ومقاهي اكثر من محلات البضائع وطبعا بضائعها كلها ماركات

ثانيا الاسواق الاقتصاديه

1- سوق المباركيه وهو مكان يستحق الزياره لاحتفاضه بالطابع الكويتي القديم ويقع بجانب مسجد الدوله الكبيره وسوق الكويت للاوراق الماليه ويشتهر ببيع البشوت والعطور والمابس الجاهزه والذهب والادوات القديمه مثل السجاد والسدو والاواني وستجد ايضا بعض المحلات المتخصصه في بيع الاكسسوارات التقليد مثل اللي نشوفها في الصين وتايلاند وماليزيا بأسعار تنافسيه
2- سوق الجمعه ومكانه على طريق الدائري الرابع خلف المشاتل وهو سوق خردوات يفتح فقط في يوم الجمعه وهو مكان ممتاز للفرجه وغالبيه رواده من الجاليات الاسيويه والعربيه وبجانبه سوق الطيور والحمام ممكن تروح والفرجه على قولت اخوانا المصريين ببلاش
3- الخيمه مول ومكانه مدينة الجهراء يحوي الكثير من الاسواق الشعبيه والاكسسوارات المقلده والملابس الجاهزه وبأسعار زهيده نوعا ما
4- المخازن الكبرى ويقع بجانب سوق المباركيه ومعهد الكويت للقضاء ويحوي العديد من المحلات المتخصصه في بيع الملابس الجاهزه والاحذيه المستورده من دول آسيا وتركيا وايطاليا ولكن لا تحمل ماركات عالميه وايضا الاجهزه الكهربائيه وجهزة القيمز

4- وش افضل المطاعم؟

المطاعم بالكويت عديده بل تكاد تعتقد ان الكويتيين لا يأكلون في بيوتهم من كثرتها يعني طب وتخير ولو اكتشفت مكان حلو يا ريت تقولنا لاني من زمان مو طالع اتمشى واتعشى وفاتني الكثير منها , كل يوم يفتح مطعم يديد بالكويت او سسلة مطاعم عالميه وبالامكان ايضا ان تجد مطاعم متخصصه في المندي ;) ولكنها ليست بجودة المطاعم السعوديه المتخصصه فركز على المطاعم العالميه واللبنانيه فلا تشيل هم وين ما تلتفت بنظرك راح تشوف مطعم وعليك بالعافيه ما لذ وطاب وبخصوص الاسعار احتمال تكون اغلى من اسعار مطاعم السعوديه ولكن بنسبه لا تذكر
5- لو بغينا نحضر مسرحيه, كيف نحجز؟ هل فيه مسرحيات لطارق العلي او عبدالناصر درويش تعرض حاليا؟
كما قالوا الاخوان المسرحيات ممكن تحجز لها من الشباك واعتقد التذكره ب10 دنانير في المقاعد الاولى
ولا تنسى الذهاب الى السينمات المنتشره في جميع المولات التجاريه وسعر التذكره دينارين ونص للشخص ولكن احرص على اختيار المكان المناسب انا افضل المقاعد الخلفيه ;)
6- ياليت احد الخبراء يسوي لي برنامج عام علشان يساعدني لان الرحله قصيره جدا وماابغى الوقت يروح في تضييع الشوارع لاني مااعرف شي في الكويت؟؟
اخوي الفاضل النشاطات السياحيه في الكويت عديده ركز اولا على شارع الخليج العربي
1- عدد لا حصر له من مطاعم + مقاهي
2- العديد من مولات تجاريه
3- حديقة الشعب
4- المركز العلمي ولا تفوت دخول سينما اي ماكس ذات الابعاد الثلاثيه بداخل هذا المركز + الاكواريوم
5- ابراج الكويت الشهيره ويوجد بداخلها مطعم
6- قرية يوم البحاره مقابل مجلس الامه
7- شواطئ الواجهه البحريه وشواطئ بحر شويخ ممكن تسوي باربكيو على الهواء الطلق
8- مسجد الدوله الكبير ويحوي مكتبه كبيره

9- الاكوابارك (الحديقه المائيه)

ثانيا اماكن خارج هذي المنطقه الحيويه مثل شريط فحيحيل الساحلي والاسواق الشعبيه المنتشره هناك بالاضافه الى المولات الكبيره والمطاعم والمقاهي ومنتزه العقيله البحري
ثالثا بالامكان الذهاب لمدينة الكويت الترفيهيه والطريق لها ابتداءا من شارع الخليج العربي باتجاه الشمال تكمل على طول حتى ينتهى بك وتدخل اجباريا بطريق آخر نسميه شارع الدوارات وستلاحظ كثرة الدوارات بهذا الشارع وهو يقطع ميناء الشويخ و مدينة الشويخ الجامعيه ومنطقة الشويخ الصحيه وبنتهاء هذا الشارع ستقف عند اشاره تكمل هم (طوالي) ;) وهذا الطريق يسمى بطريق جمال عبدالناصر حتى ينتهى بك بالوقوف على اشاره تاخذها يمين على طول بتجاه شاليهات الدوحه فتصبح مدينة الكويت الترفيهيه على مراى من عينيك وعلى فكره اللوحات الارشاديه ماليه الشارع يعني ما راح تضيع وسعر دخول المدينه الترفيهيه حسب علمي لاني ما زرتها من 12 سنه هو ثلاث دنانير ونصف شامل جميع الالعاب والمرافق وتحتاج لتخصيص نهار كامل لزيارتها .
رابعا ممكن تستفيد من الاشكاك الموضوعه في المولات التجاريه لمعرفه تفاصيل الانشطه والمهرجانات المقامه بمناسبة هلا فبراير لاني بصراحه ما عندي فكره عنها ولكن اعتقد انك تأخرت في زيارتك لان المهرجات والكرنفالات بدأت من اسبوع عندنا ولكن ان شاء الله تلحق على الباجي مثل الامسيات الثقافيه والشعريه وخلافه
وبالنهايه ان شاء الله اكون عطيتك ولو نبذه صغيره بالاشياء اللي حضرتني بشكل سريع عن كويتنا الحلوه واتمنا انك تقضي اجازه موفقه بين اخوانك في بلدك الكويت وحياك الله اي استفسار حاضرين .................. والسلام ختام