هلا بك شبابي مره اخرى
هل تقصد 1200 ريال رحله ذهاب فقط ام ذهاب وعوده؟
لانه اذا كان بس ذهاب اسعارهم نار وغير منطقيه
واعتقد افضل اذا كنت حريص تغير الخطوط
انتوا ياهل الرياض مشكلتكم مشكله لأنه منتوا حوال دول الخليج وبعيد نوعا ما من حدود الدول المجاوره
بالنسبه لي دايم استقل طيران الخليج وذلك عبر الذهاب من الدمام الى البحرين وهناك رحله يوميا من البحرين الى دمشق بالساعه العاشره صباحا
نحجز من اي مكتب خطوط ويعطونا تذكره خاصه بالباص اللي ينقلنا من الدمام الى البحرين مجانا ووجبه افطار بالباص ويشيلون عفشنا ويدخلونا المطار ويخلصون لنا الاجراءات ويدفعون رسم المغادره 3 دينار بحريني ويسلمونا عفشنا ويودعونا
وقيمة التذكره من البحرين الى دمشق ذهاب اياب 1300 ريال شامله جميع الخدمات
واذا بغيت تروح بسيارتك للبحرين وتوقفها بالمطار يعطونك تذكره خاصه بمواقف طيران الخليج مضلله مجانا طيله فترة سفرك وعليها بوابات وحراسه
بصراحه طيران خيالي وخدماتهم مميزه
العربيه ارخص بس لاوجبات ولا خدمات وكل شي بفلوس يعني يطلعون الفرق منك بالقوه
بالنسبه لأهل الكويت عندهم طيران الجزيره وهو ممتاز
ابعد عن الخطوط السعوديه
واذا انت بلشان ياخي لحلح الجيب أشوي ومافرقت هالخمسميه ريال وابسط عمرك وريحها

فيه خطوط العربية في شارع المللك فهد رخيصة .
وعند حل ثاني أنك تاخذ تذكرة القريات ذهاب وعوده(830)
واذا جيت القريات تاخذ باص لدمشق 100 . ودمشق قريبه من القريلت 280 كيلو يعني ساعتين ونص
وانت في القدم والرجعه اركب الباص للقريات 100 واركب الطيارة للرياض . أختر الى يعجبك .

اخوي شامي سعودي تقول العربية مايقدمون اي خدمات مهوب لازم ياخي الوقت من الرياض لدمشق
ساعه صكها( لطمه) ولا تقوم الى في مطار دمشق وجهز الأكراميات للجوازات والجمارك .

Khaldi
لبيه ياخالدي
والله انت راعي طويله وراعي لطم ومشاوير وباصات
ياخي ماصارت سفره هاذي تذكره للقريات وتنزل وتاخذ تاكسي للحدود وتدور على باص وماتدري انت وصولك بالطائره يوافق وصول الباصات اللي أغلبها توصل الساعه وحده بالليل يعني بيلتطع في الحد الين توصل الباصات او يروح ياخذ غرفه بفندق
ياخي حوسه ياخي اختصر الوضع وانقز بالطايره وادفع 2000 ريال بعد أهم شي الراحه

( )

من الرياض إلى دمشق سيده إدفع مابين 1650 إلى 1800 وأنت مبسوط لاباصات ولاتكاسي ولا وجع راس ترى والله ماتستاهل ياخوان المرمطه هذي ساعتين وأنت في بطن الشام (وجهة نظر) تحياتي .

%30 تخفيض على تذاكر السعودية طويلة الأجل
عبدالعزيز غزاوي (جدة)
اعلنت الخطوط السعودية عن تخفيضات تصل الى نحو 30% على تذاكر السفر المشتراة قبل الرحلة بمدة طويلة. جاء ذلك في سياق برنامج السعودية لدرجات الحجز المتعددة بهدف وضع سياسة اسعار مرنة وتشجيع المسافرين على التخطيط المبكر لرحلاتهم ومنعاً لارتباكات اللحظة الأخيرة. وسيتم تطبيق البرنامج في جميع مكاتب مبيعات السعودية والوكلاء داخل المملكة وخارجها. التخفيض جاء بعد اشتعال حمى المنافسة بين «السعودية» وشركتي الطيران الجديدتين «سما» و«ناس».
وهاذي تسعيرات شركة ناس ومتأكد منها
من الرياض للمدينه 79ريال
من الرياض الى جده 89ريال
من الرياض الى القريات 139 ريال
من الرياض الى جيزان 99 ريال

اشكركم جميعاً على المرور والرد
فردودكم امانه سيستفيد بها جميع من يزور الموقع ولست انا فقط
ولكن هناك سؤال
ما ذا عن الخطوط السوريه لم يتطرق لها احد وهل هناك فرق بينها وبين السعوديه
ولكم جزيل الشكر

شبابي
اخوي شبابي سعر السورية والسعودية نفس الشئ مافيه فرق لكن السعودية عندي انا افضل .