1. روما


2. فلورنسا


3. فينيسيا


4. سيرميوني


5. برشلونة


6. ميلان

روما

• مدينة بشكل عام كلها اثار.
• الحياة الليلية جميلة في ساحة الرسامين والنافورة والدرج الاسباني.
• حذرونا كثر من السرقات ولكن ولله الحمد ماتعرضنا لاي من هالاشياء وكنت حريص وحذر.
• اعتمدت في تنقلاتي على المترو سهل جدا وامان استخدامه ليلا كنت ارجع للفندق الساعة 10 ونصف 11 بالليل ولا فيه اي مشكلة اصلا معك سواح
• روما فيها مشي موب طبيعي ويمكن ايطاليا كاملة اهو شي الواحد يحرص على الجزمة الله يكرمكم المريحة
• اهم شي الواحد يصير لبسه مرتب وحنا سمعنا ان مافيه مثلهم بالتشخيص وبس اللي شفناه ان كان عادي فيه ناس مشخصين بس قلة وانتم ماعليكم من احد البسو اللي يعجبكم
• التسوق فيها غالي يعني اجلوه الين تروحون للاوتلت افضل
• الكولوسيوم افضل ان تخلون الفندق يحجز لكم بالفيزة عشان تفتكون من الطوابير
• انتبهو من اللي يصورونكم مع اللبس التقليدي حق المصارين عند الكولوسيوم تراهم نصابين اخذو علي 20 يورو على 3 صور يجونك يقولون ناخذ لك صور بجوالك طبعا فجأة ماتري الا ويقولون لك 20 يورو لا وكان يبي ياخذ له 20 ولخوية 20 قلت اها بس 20 وخسارة فيكم

فلورنسا

• مدينة صاخبة الى ان تغيب الشمس ثم تكون هادية وتحصل ناس قليلين جالسين عند الجسر القديم بالليل
• مافيه ماعالم كثيرة
• زيارتي لها من اجل بيزا وكنت ابزور الاوتلت The mall بس مامدانا عليه
• برج بيزا الصعود له ب 13 يورو متعب تطلع بدرج بس اسم انك طلعت فوق البرج
• ساحة مايكل اجلو مافيها الا تمثال وكشكات بسيطة بس الميزة انك تشوف فلورنسا كاملة من فوق

فينيسيا

• جميلة ليلا ونهارا وهي من المدن اللي حبيتها بالرحلة
• ما انصح احد يروح بالصيف تراها حر يطفش الواحد يكرهها
• رحت الهارد روك مطعم وكوفي صاخب بس اكله لذيذ
• لاتفوتكم جزيرة بورانو البيوت الملونة واذا بتشوفونها بالنت Burano هذا اسمها تروحون بالباص المائي له محطه فيها
• مصنع الزجاج مايستاهل تروحون له
• الايسكريم لايفوتكم في كل ايطاليا
• المدينة حلوة لها يومين تكفيها ترا حسافة تروحون لها وترجعون بنفس اليوم اجلسو فيها

سيرميوني

• منها زرت كومو ولوقونو وفوكس توان اوتلت حلو وممتاز وانا عندي افضل من سيرفالي (احسن اني عكس الناس بس هذا اللي شفته)
• انا تمنيت اني سكنت في كومو افضل واقرب الى لوقانو ومنها ازور بحيرة جارادا
• رحت للمطعمMEDIEVAL TIMES فيه مسابقات وعرض وتتفرج وتاكل اكلهم مافيه زود دجاج وشربة ومشروب كولا وكل شوي يجيبون لك شي وفيه حركة اذا خلص اكلك وتبي زود تخبط الملعقة بالصحن عشان يجيك طبعا هو يجي من دون بس هذا يقالهم ايام زمان يسوون كذا
• ماامداني ازور ملاهي جاردا لاند واصلا كان الجو ممطر

برشلونة

• جميلة بمعنى الكلمة ليلا ونهارا
• فيها مباني حلوة للمصمم قاودي ومشهور عندهم
• شارع الرامبلا فيه منتصف هالشارع سوق خضار وفواكة تاخذ عصير طازج وتتمشى رايح جاي
• اتوقع في شهر 9 جوها حلو لان يوم رحنا كنت برد بس حلوة
• نادي برشلونة والله مانيب راعي كورة بس لازم ازوره وامبسطت حلو الصراحة
• كل تنقلاتي في برشونة بالمترو وسهل جدا فيه حركة غريبة ماقد شفتها عندهم تذكرة للمترو يستخدمها اكثر من شخص اسمها T10 لك 10 رحلات فيها يعني لو يستخدمها شخصين لكم 5 رحلات وطريقتها انك اذا دخلت البطاقة بالجهاز تعطيها اللي بعدك ويدخلها بالجهاز يفتحله البوابة وفرت كثير علينا
• فيها تسوق واسعار متوسطة
• فيه مطاعم كثير ومتنوعة عربي وغيره

ميلان

• منها زرت سيرفالي بالباص الشخص 20 يورو رايح جاي
• ياكثر الشحاذين والافارقة اللي يبيعون الخيوط الاساور ويرمونها عليك بعد بس انتبهو تلبسونها كلها سحر وشعوذة عند الدومو مليانين
• التسوق في سنتر المدينة غالي جدا الافضل الاوتلت
• حقها يومين ممتازة