مرحبتين كبار شباب اند صبايا ..
وحياكم الله في تقرير المصور لزيارتي الأولى لبلاد العمة ..
يالله جهزوا انفسكم استعداداً للتقرير المتواضع جداً ( بحكم انه اول تقرير ) >>> انواع الدلاخه
وسأقسم هذا التقرير إلى اجزاء عشان مايصعب تحميل الصور لاني ماعرف اصغر الصور ..
بسم الله الرحمن الرحيم ..
كان السفر لاندونيسيا يراودني منذ نعومة اظفاري >>> بدا في النصب هو ويا خشته ..
من زمان وانا ابي اروح لاندونيسيا .. لكن مالقيت اخوياء .. تعرفون احنا يالسعوديين مافيه شي يعجبنا
ذاك يقول روقنا وذاك مسوي مايروح لآسيا ( موب عاقل مقطع امريكا ) وذاك فكوك وعله كل شوي له راي ..
المهم بعد مرور عدة اعوام من حلمي للذهاب هناك وجدت من يرافقني في هذه الرحلة الجميلة ..
انا وابو يوسف وابو سعود .. شباب زكرت يحبهم قلبك .. فله وفرفشة ولديهم ثقافة سفر وسياحة ..
ومعهم لا تشيل هم .. وكل شي قدام .. واكتشفت لهم مواهب مثل الابداع في فن الشواء ..
وابو يوسف يقول لي 12 سنة اشوي .. >>> موب عاقل ا بو صطيف
بس والله ياعليه شوي خصوصاً الكبدة تعطيك ..
الزبدة وعشان مااطلع من صلب الموضوع ..
تقرر السفر يوم الاربعاء 13 / اوقست / 2007 الساعة العاشرة ليلاً .. ولمدة 14 يوماً ..
من الرياض لجاكرتا دايركت ذهاباً وعودة وسعر التذكرة 3150 ريال .. على الدرجة السياحية ..
والحمدلله ابو يوسف فكنا من الفيزا وخذ جوازاتنا وفيز من السفارة بعد ما قرأنا في المنتدى عن نصيحة بالتفييز من الرياض نظراً للإزدحام في مطار جاكرتا على التفييز .. علماً بأن الفيزا بقيمة 170 ريال ..
وكعادتي الدائمة التي تسبق أي رحلة لابد من وجود اللخبطة وازدحام الجدول .. متى بتحلق ومتى بتشتري لك بعض الاحتياجات .. ومتى ومتى متى .. الزبدة ماخلصت اموري الا قبل الرحلة بساعتين ..
وعلطول للمطار ..
خذت معي شنطة صغيرة فيها كتابين ومجلة .. لقطع الوقت بالقراءة .. وخذت معي بساكيت خفيفة لاني اخاف من الجوع هذا غير ان وجبات الخطوط السعودية قليلة المحتوى والمستوى ..
ركبنا الطيارة وبسم الله على جاكرتا .. وللأسف بعض المسافرين يجيب لك الهم ..
كانت فيه عائلة قلق ازعاج وبزارين وقروشة ماقدرت انوم ولا قدرت اقرا ولا قدرت اسوي شي ..
شبكت بزارينهم وعطيتهم من البساكيت اللي معي عشان يلهون وينومون ..
والحمدلله ناموا وقدرت انوم لي شويتين ..
وبيني وبينكم 9 ساعات ميب شوية .. طقني الهم والتعب قعدت ادور في الطيارة اطلق رجليني شوي
وقعدت اسولف مع العالم >>> نشب لهم
ايه يوم بقى على الرحلة ساعة التقط لكم هالصورة ..
المهم ياجماعة الربع والربيعات .. نزلنا المطار والحمدلله مفيزين وخالصين من السفارة ..
رحنا مكتب هاكا على ما اظن .. وحجزنا في فندق اسمه ( أسس امير ) جمب الاتريوم ..
وهذي صور من غرفتي ..
وهذي دورة المياة اكرمكم الله
وهذا الرسبشن
وبصراحه الفندق رايق جداً مع العلم انه 4 نجوم .. معاملتهم كويسة وخدمتهم ممتازة ..
بس مشكلتهم ان الشبابيك ما تنفتح وهذا شي ضايقني بصراحه لاني احب الهواء الطلق .. وتجديد الاوكسجين ..
والغرفة هذي ياجماعة الخير خذتها بقيمة 375.000 وهي غرفة ديلوكس ..
وفيه غرف ستاندر وفيه غرف بزنس وانا خذت الديلوكس الي هي الوسط ..
وغرف البزنس بقيمة 385.000 والفرق ان البزنس فيها ثلاجة والديلوكس مافيها .. وتقدر تطلب ثلاجة بس كل شي بحقة ..
طيب سألتوني ليه ماخذت البزنس دام الفرق 10.000 روبية يعني 4 ريال تقريباً ..
انا ماخذتها لاني ماحب الادوار المرتفعة وغرف البزنس في الدور ال 17 / 18
هذا الجزء الأول من الرحلة ياشباب وياصبايا ..
والتقيكم في الجزء الثاني واللي فيه صور من الاترويم ودنيا فنتازي والجبل واه يالجبل ..
تحياتي المفعمة بالود لكم ..
اخوكم خراب السفينة ..