صباح الأنوار
العام الماضي رحت زيارة لحائل في العيد علشان أحضر زواج أحد من الأقارب ساكنين حائل ، وأخذت معاي الأهل على اساس انه راح نجلس يومين لكن صارت اربعة
كانت أول زيارة لنا افي المنطقة مشينا ورحنا لحائل طبعاً تبعد عن الرياض حدود 700 كيلو يعني بعيدة والله
وصلنا حائل واستأجرنا شقة في شقق بودل وكانت أسعارها مناسبة وحلوة الشقق ريحنا شوي كنّا العصر وكان الجو مطر وبرد وكانت مناسبة الزواج بالليل كل واحد قام يستعد انا عنّي نمت
المهم حضرنا المناسبة وكانت في ضاحية تبعد عن حائل 20 دقيقة اسمها عقيدة وهذه منطقة تقريباً كلها استراحات وانتهىت المناسبة ورجعنا الشقة بس لاحظنا ان زواجاتهم أقصاها 11 بالليل وتخلص مو مثل الرياض الزواج الناس تروح على 11 الليل
وحائل تتبعها اكثر من قرية مثل بقعاء اللي حضرت فيها الزواج وقرية جبّة والخطّة والكهفه وبقعاء هذه القرى قريبة من حائل تقريباً 20 دقيقة لكن فيه السعيرة هذه بعيدة عن حائل تقريباً 200 كيلو
من بكرة طلبوا مني الأهل اننا نتمشى في حائل يقولون سمعنا بأكثر من مكان خلينا نشوفهم قلت توكلنا على الله
طلعنا نشوف حائل لاحظنا كثرة الدوّارات اللي في الشوارع وكل دوّار فيه معلم وشكل معين مثل دوّار القربة ، لقينا عندهم سوق اسمه سماح سنتر دخلنا فيه شوي بعدين كانت صلاة الظهر رحنا أخذنا أكل من مطعم الطازج ورجعنا على الشقة
بعدها اتصلت في واحد من الشباب يعرف المنطقة زين وسألته عن كم الأماكن اللي أقدر أطلع لها في حائل وبلغني .. بعد العصر أخذت الأهل وطلعت فيهم رحنا لمنتزه المغواة وألعاب أطفال وعروض ترفيهية وحرف يدوية وأكلات شعبية قضينا فيه يمكن 3 ساعات وبعدها طلعنا
رحنا على منتزه مشار فيه شاليهات ودبابات قضينا ليلتنا فيه ورجعنا على الشقة
اليوم الثالث أخذت بعض المعلومات عن الآثار اللي بحائل ورحت بالأهل طلعنا للقشلة وهي قصر بن رشيد وهو من الآثار اللي بقت ، وشفنا اللي يسمونه برج حائل عباره عن برج وفيه مكاتب لاحظت بعض المكاتب للي الجرائد المحلية فيه
وطبعاً رحنا شفنا قبر حاتم الطائي وبعدها طلعنا نشوف جبل أجا وسلمى المشهور ، من الأِياء اللي شفناها على السريع مدينة حائل الإقتصادية طبعاً هي تحت الإنشاء وسوق شعبي مشهور عندهم بشكل عجيب اسمه سوق برزان بعدها رجعنا على الشقة ةطلبنا أكل من مطعم قريب من الشقق
بعد العصر طلعنا منتزه اسمه السمراء هذا المنتزه تشوف منه كل حائل من فوق الجبل لأنه مرتفع بعدها رحنا لمطعم اسمه التل على جبل في مدخل حائل هذا المطعم فوق تلّه فيه منتزه وألعاب للأطفال وشقق وتعشينا فيه وكانت ليلة حلوة بصراحة
وبعدها رجعنا على الشقة لأنه آخر ليلة لنا من الأشياء اللي عرفتها عن حائل في زيارتي عندهم عادة في العيد كل بيت يسوي أكله ويطلعه في الشارع اهل الحارة يحطون مثل الزوالي ويحطون عليها الأكل وكل الرجال يطلعون يتعيدون في الشارع وياكلون واذا خلصوا دخلوا الأكل لأهل البيي ومن أشهر أكلاتهم التمن / الكبيبة / القرصان / الكليجا
وشيء ثاني عند الرجال شيء اسمه الشبّة اذا قالك انا باروح للشبّة ، يتجمعون في مكان واحد اما استراحة او بيت أو البر ويسمون قعدتهم هذه شبّة وهي مشهورة عندهم
والحمدلله رجعنا بالسلامة وكانت الرحلة حلوة وسريعة بس أحس المنطقة محتاجة اماكن ترفيهية أكثر ومجمعات أكثر للتسوق
وسلامتكم