1. بسم الله الرحمن الرحيم

[السلام على كل زوار بوابة العرب المسافرون
في البدايه قبل ما أتكلم عن تجربتي السويسريه أحب أخبركم أنه هذي أول مشاركه لي في حياتي في منتدى اتمنى انكم تشجعوني واذا عندي أخطاْء تنبهوني[/.

بسم الله الرحمن الرحيم

قصتي بدأت السنه الماضيه في 8/7/2006 عندما قررنا السفر الى سويسرا، ولأن زوجي دايما يعتمد عليه في التخطيط للسفر لثقته فيني وفي إختياراتي ، إلا إني أخفقت هذي المره في ترتيب الرحله، بالاضافه إنه صارت لنا مواقف كثيره تعيسه ((كأن حد ضربنا بعين )) والحين بسرد لكم الأحداث المرعبه والتعيسه الي مرينا فيها بالترتيب:
1- سافرنا على طيران الأتحاد وبفضل صديق الله يخليه رفعنا على درجه البزنسس وكنا في منتهى السعاده انه نجلس ببلاش في البزنسس إلا إنها كانت أتعس رحله بالطائره أولا أنا متعوده لما أسافر بالطائره البس ملابس ثقيله لأن الجو يكون بارد فلبست أنا وزوجي وأولادي الأربعه ملابس تدفينا لكن للأسف فطسنا من الحر ، لأن تكييف الطياره كان حار (سبق سمعتوا أوركبتوا طياره تكييفها حار)،بالاضافه للجو الأكل كان تعيس وشاشات الفيديو(لكل مسافر شاشه خاصه)بعضها خربان وماتشتغل طبعا الاولاد انزعجو وناموا.
2-أخترت السكن في إيفيان الفرنسيه لما ما حصلت سكن في لوزان ولا في فيفي ولافي مونترو، وخصوصا ونحن3عوائل ونحتاج3 شقق، وسكنا في منتجع فوق الجبل ، صحيح المنتجع جميل إلا أنه ما ناسبنا من عدة نواحي ، أول شئ بعده عن السوبر ماركت والمطاعم يعني لازم نركب السياره، وأناأحب أحيانا أتمشى وأشتري أغراض البيت وخصوصا لما يكون بالعيال تعبان ،وثاني شئ كان جو سويسرا جدا جدا حار( طبعا نحن شاردين من الحراللي عندنا)والسكن للأسف من غير تكييف ولأن شاليهنا يطل على حقل عشنا أسوأ أيامنا في السفرلأن الحشرات تغوز علينا من تظلم الدنيا وحشرات عمري ماشفت مثلها ولأن وحده من بناتي عندها حساسيه من الحشرات عشت في رعب وخوف من أن تلدغها الحشرات فكنا نضطر نقفل الشبابيك والأبواب مما يجعلنا نعيش في حر وكتمه الله لايعيشكم فيها، وحاولنا نسترجع فلوسنا وندور سكن ثاني إلا إنه ادارة السكن رفضت ترجعنا فلس ،فأضطرينا نكمل عندهم بس ترجيناهم يركبونا تور وفي خلال 10 أيام وبعد معاناة ومذله ركبوا التور وما قصر بو العيال أشترا مروحه وبعدين تحسنت أحوالنا ،وثالث شيئ بما انه السكن فوق الجبل فإنه بو العيال إنهد حيله في كل طلعه (طالع ونازل فوق الجبل وهو يسوق سياره كبيره وجير عادي).
3- تعرض ولدي لحساسيه غريبه في قدمه ولأن عامله إحتياطاتي من الأدويه ما احتجنا نروح المستشفى وبعد فتره شفى منها .
4- نفس الولد تعرض للغرق في حوض المنتجع مع إنه يعرف السباحه وعمره14 سنه الله يحفظه إلا إنه القدر ولولا زوج عمته وصل في اللحظ اللي كان يغرق فيها (طبعا الأجانب في حالهم )ونقذه مأدري شو كان بيصير في حالي.
5-رحنا مره رحله لمنطقة( ساس في) وهي جبليه وتركب فيهاالتلفريك ويصعدك للجبل وفي قمته ثلوج ولأن
الجو حار في هذي الفتره ( وهذا من حظنا السئ ) كانت الثلوج علي القمة شبه ذايبه والمكان خطيرجدا ومن خطورته كان الجبل في جزء منه صدع( يعني الارض منشقه ومفتوح جزءوالهوه اللي فبيها ماتقدر تشوفها مثل الزلزال لما يشق الارض) وما أدري هم مايدرون لأن مافي أي إشاره تحذيريه،والحمدالله إنه الله نجى بناتي وبخبركم كيف:
بنتي عمرها 8 سنوات زحلقت قدمها بجانب الفتحه والله سلمها لو كانت أقرب جان طاحت في الصدع ، المهم هي رجعت على ورا وشافت اختها (10 سنوت) تقترب من الفتحه وهي ماتدري صرخت فيها ونبهتها ولان بنتي هذي وايد فضوليه وتحب تستكشف((طبعا انتو تسألون أنا وين ، أنا قريبه منهم بس ومشغوله أصور ولدي بوسنه و10 شهوروأبوهم شاف شلال صغير وراح يشرب منه))بس القدر.............
نكمل... بنتي تقربت من الفتحه وقفت جنبها تشوف شوداخلها ولان الثلج هش بسبب الحراره الجزء اللي واقفه عليه تكسر تحت قدمها وانزلقت ودخلت في الفتحه ولان الله سبحانه اراد أن يحفظها جعل لها أسباب تنقذها ، في جزء من الفتحه من الداخل تجويف صخري ضيق الفتحه في الجانب اللي بنتي سقطت فيها ولأن بنتي صحتها زينه ( شوي سمينه)إنحشرت في الفتحه، صرخت البنت التفت شفت المنظر ركضت خدامتي مسكت إيد وحده ركضت أنا مسكت الإيد الثانيه نسينا الولد الصغير تركت خدامتي إيده وركضت تمسك ولدي بعد ما شافتني ممسكه ياليد الثانيه صرخت باسم بو العيال ولأن الصرخه غريبه بسرعة البرق ركض وسحبها من الحفره، مسكنا بعض تحركنا جهة المخرج من غير ولا كلمه في حالة ذهول..
أنا أكتب ودموعي على خدي وأحمد ربي مليون مره على سلامتهم..
.
6- في نفس الرحله السابقه المأساويه ونحن في طريق عودتنا التفت رجلي في الثلج مما جعلني أعاني من الآم فتره واضطريت أروح المستشفى عندهم.
7- بنتي الصغيره انزلقت عند الحوض مره وتعرضت لشق عميق تحت الذقن ، ومره تعرضت للغرق في حوض المنتجع والعنايه الالهيه انقذتها وبعدها حلفت محد يسبح في الحوض.
8- ولدي الصغير مره كان يركض ولأنه طفل صغير انصدم راسه بطرف طاوله من الخشب الطبيعي على الحد وجاءت الضربه عند طرف العين والله سلم عيونه وضربه قويه جدا أثرها لين الحين باقي.
الحمدالله .. الحمدالله.. الحمدالله.. على سلامة عيالي ، وادعو انه الله يحفظهم لي ، ويحفظ عيالكم ، ونصيحتي لكم ارقوا أولادكم دايما ، وفي السفر قبل كل رحله قولوا مع أولادكم أدعيه تراها تحفظكم ، وسامحوني إذا طولت عليكم .