- فندق ميريديان الهرم
بعد التحيه لاعضاء هذا المنتدى الرائع سابدا بتقريري المفصل عن مصر وهو اول تقرير اكتبه وانشاالله بيعجبكم بس الله الله بالتشجيع والتصفيق
لاننا لازم ننحاش من حر الرياض بدينا نفكر وين تكون الوجهه وفكرنا بتركيا ورتبنا الحجوزات ولكن بعد حرب لبنان قلنا الشمال مايصلح ومافيه الا ام الدنيا وناسه وفله وامن وامان وفوق كل هذا دوله عربيه وساعتين وانت هناك خصوصا انها كانت مصيفنا قبل العام الماضي
اعضاء الرحله
انا وزوجتي والعيال صرفناهم على خوالهم لاننا خذناهم معنا في ذيك السفره واتعبونا وراح وقتنا في الملاهي
استعدادت الرحله
القرار كان مفاجئ ولقينا حجز ذهاب بسهوله بس بدون عوده ورتبنا حجوزات الفنادق من مكتب الصرح لكن الفنادق الرايقه كلها فل وكانت حجوزاتنا كالتالي
مريديان الهرم ليلتين وبعدها شيراتون المنتزه بلاسكندريه ليلتين واخيرا ماريوت الزمالك اربع ليالي
رتبنا الشنط وقررت ان حجم الشنط يكون صغير عشان تكون معنا وما نظطر للشحن وننتظرها ساعتين في مطار القاهره كما حدث في رحلتنا الاولى
انطلقنا الى مطار الملك خالد صباح يوم الخميس وكان اقلاعنا الساعه ثمان وحولت اربع الاف ريال الى دولارات وكانت الاجراءات سهله جدا وجلسنا في انتظار الطائره والناس دايخه وفيها النوم واعلن عن صعود الطائره وصعدنا وبدت الرحله ويازين الذهاب عكس العوده اللي بقول لكم بعدين وش صار فيها
الوصول الى القاهره
وصلنا الى المطار وكان فيه منظر احزنني وهو توجه الشباب للسوق الحره وشراء ماحرم الله فهل هذا شكر النعم بوصولهم بفضل من الله بالسلامه :112:
طبعا محد قدنا شناطنا معنا وختمنا الجوازات والاجراءات سهله جدا
الفائده الاولى من هذا المنتدى
مافكرت اتفق مع احد يستقبلني كما اوصى العديد من الاعضاء طلعت للتكاسي واخذت ليموزين مكيف بثمانين جنيه الى ميريديان الهرم وخذت شريحة فودافون في الطريق ويازين شعور الوصول واول يوم فله
فندق ميريديان الهرم
فندق رايق وما ثشوف الا اوربيين وناس في حالها وغرفه حلوه ورايقه وصلينا الظهر والعصر جمعا وقصرا ونومه لقبل المغرب وصحينا وطلعنا لمطعم فلفله:36_1_30: :116: اكله ماله داعي وتاكل وانت خايف بس الجوع شين دعينا بسم الله الذي لايضر مع اسمه شي وبدينا ناكل بس اي كلام شي يسد الجوع بس جلساته الخارجيه حليوه وطلعنا من فلفله على الفندق صلينا المغرب والعشا وطلعنا على كايرو سنتر وما اشبهه الابفندق التعمير بمكه الله يشرفها زحمه وتجمعات شحاذين ومحلات اي كلام وبعده اتجهنا لفيرست مول او الفورسيزون الجيزه زحمه وهبال:36_11_4: :36_3_15: :36_6_2: وقلة حيا ومسخره واتوقع يكون رايق الصباح والظهروطلعنا منه لشارع جامعة الدول العربيه ومقهى العمده تحديدا والذي قريت عنه في هالمنتدى ولكن :112: :112: ساوافيكم بما حصل بعد الاطلاع على ردودكم وبقية التقرير ستكون مصوره الى اللقاء
شاهين العرب