السلام عليكم ورحمة الله وبركاته
اسعد الله اوقاتكم بكل خير ..
في الحقيقه لم اتوقع في حياتي ان ازور دوله افريقيه غير عربيه ولكن هذي هي الاقدار .. والصدف ..
كنت جالس في البيت فاضي ما عندي اي شغله دخل علي اخوي الكبير قالي خوي قلت خوي
بس على وين قالي كينيا .. قلت كينيا !! انصدمت قلت وش نسوي في كينيا ؟؟
قالي ماعليك انت بتخاويني ولا لا قلت اخاويك طبعا من الملل ابي اسافر واغير جو بس متخوف..
كينيا شو فيها قلت شو رايك اوديك المغرب لاني دايما اقول مستحيل اسافر لدوله غير المغرب
حتى لو كانت اوروبا .. قالي المغرب ما اعرفها بس كينيا راح تعجبك قلت انا اعرف المغرب وطبيعته
قالي بالحرف الواحد انا رايح كينيا تبي معي اهلا وسهلا ما تبي كيفك
قلت يالله المهم سفره واغير جو .. متى رحلتنا قالي باكر الساعه 8 الصبح .. يعني ساعتين عندي
قبل لا يبند السوق واروح السوق واخذ الاغراض الي ناقصه واجهز نفسي والصبح ونحن في مطار
دبي الدولي
قصينا التذاكر الشخص 2600 درهم
الناقل الرسمي طيران الامارات
طبعا رتبنا مع صديق اخوي وفي واحد بيستقبلنا في المطار هناك تعامل المطار جيد ولكن فيه بعض التعقيدات
في الطياره عطونا كروت وعبيناها يوم عطينا الموظف قال في كروت ثانيه عبوها قلت ما عطونا الا هالكرت
قال روح عب غيرها طلع الظغط عندي ومن العصبيه عبيت له 4 كروت مختلفه وعطيتها اياه
بصمنا بالعشر وصوره عالطاير و 25 دولار ضريبه دخول ونزلت وخذيت اغراضي والا وحده تلاحقني
وترمس في الفون وانا كنت اتريا اخوي راح اييب ترولي او عربة العفش والا هاذي واقفه عندي
وحملت اغراضي ومشيت والا تلحقني وبعدين مع هاللصقه والا تقولي لو سمحت قلت له شكرا
قالت وقف .. قلت انتي من قالت امن امن ولا بسه مدني وين عايشين المهم تفضلي قالت
انتو من وين قلت الامارات ماعرفت قلت من دبي قالت اوكي تقدرون تروحون مشيت والا احصل
اخر شخص اعتقد انه جمارك ونفس السؤال من وين قلت دبي قال وين الكرت قلت اي كرت انا
عطيت صاحبك قبل شوي اربع كروت وماعندي كرت اذا تبي كرت عطني واعبي لك ضحك قال
ممكن اشوف هالشنطه قالت تفضل يقصد العزبه قال ها شو قلت عيش او رز قال
عندنا رز احسن عنه رز كيني قلت ان شاء الله بنجربه اذا عجبنا بنحمل منه اكياس ههه
قال اوكي روحو مشينا من عنده والا صاحبنا ينتظرنا ورحنا معاه لمكتب سياحي في المطار
بس اسعارهم غاليه 180 دولار عالشخص الواحد المهم صاحبنا احمد الي استقبلنا قال
اتركوهم في برع مكاتب ارخص منهم المهم رحنا فندق في العاصمه نيروبي لواحد صومالي
ريحنا شوي ورحنا نتمشى في نيروبي وتعشينا ونمنا اليوم الثاني رتبنا اغراضنا على اساس
بندور مكتب قال صديقنا احمد شو رايكم اعطيكم سائق صديقي عنده سياره بيك اب
يوديكم وانتو عطوه الي تعطونه قال اخوي تعرفه صديقك قال اعرف ومضمون ومسلم بعد
قلنا ابرك الساعات وينه خله يجينا الحين وجانا صاحبنا الجديد سالم او كما يناديه اخي سويلم
شفنا تواير السياره حصلنا واحد تعبان وبدلناه وبدلنا ايل او زيت السياره ودعسنا على ماساي مارا
المسافه تقريبا 5 ساعات الطريق نصه قار والنص الثاني ترابي وصلنا المحميه فالليل ورحنا شفنا
اكثر من منتزه لين حصلنا واحد مرتب وعطان بسعر 5000 شلن على الشخص الواحد
نسيت اقولكم ان الدرهم الاماراتي ب 20 شلن كيني و 100 دولار 8000 شلن كيني
حبيت اعتذر عن جودة الصور لان الكاميرا صار لها خلل فني وصورة من الفون الجود من الماجود
هالحيوان يشبه الوعل الي في النص اذا ذبحته بعد نص ساعه يطلع من لحمه دود
نهر مارا كما ذكر لي
فرس النهر صوره بعيده
هالحيوان ابو الدود
وراي تمساح ما انتبهنا له الا بعدين على كتفي اليسار لونه ترابي ينتظر بقر البفلو ينزل للنهر
ياكبر التمساح عالطبيعه
الغزلان في كل مكان تقريبا حتى خارج المحميه
كل بقره معاها طير
لبوه تنتظر فريستها
استراحة محارب
فريناها بحصا ما قامت
فريناها بالثانيه مطنشه
فريناه بالثالثه وكانت حصاه كبيره وزي مايقولو الثالثه ثابته
هالصوره من شرفة الخيمه وهي تطل على النهر من مخيم اروبا كامب الشخص ب 4 الاف شلن
غرزنا في الوحل وقلصنا صاحب الحراثه
اعتذر مره اخر عن جودة الصور و حقكم علي
التكلفه الاجماليه : 1500 دولار المده 6 ايام
امنى اني نقلت ولو صوره بسيطه عن ماساي مارا
السموحه اذا فيه قصور اول تقرير لي
دمتم بود