1. فصراحة من بداية الرحلة إلى نهايتها كانت مرتبة بفضل الله ثم بفضلكم


2. أغراض الرحلة /

رحلتي إلى إيطاليا الأناقة والجمال وسويسرا الهدوء والرومانسية ونمسا البساطة والريفية
قبل البداية أحب أشكر كل أعضاء الموقع خصوصا الفاعلين فيه والشكر موصول للقائمين عليه

فصراحة من بداية الرحلة إلى نهايتها كانت مرتبة بفضل الله ثم بفضلكم

بداية فيه أشياء مهمة وأكيد انها ماتخفى على كثير منكم وحبيت أذكر فيها مثل :

• القارمن ضروري جدا بالسفر ولا غنى عنه ( وأنا استخدمت برنامج نافيقون navigon بالايفون وكان جدا رائع وببلاش عن طريق الجلبريك تحمل خريطة أوربا ثم بعد ذلك تدخل على البرنامج وتحصل جميع دول اوربا تحمل الدول اللي تبي تزورها وذلك بالضغط على اسم الدولة وتحملها علما انه شغال على ال جي بي اس ولا يحتاج انترنت وأنصح يكون التحميل عن طريق انترنت سريع لأنه ثقيل جدا
• الماء بأوربا نوعين بغاز وبدون غاز وطبعا هم يفضلون اللي فيه غاز ويعتقدون انه يعطي طاقة للجسم

وبالمناسبة أول ماتجي بلد اشتر موية من السوبرماركت وخليه معك وين مارحت لأن الماء بالأماكن السياحية غالي جدا ومبالغ فيه ( بعشرة ريال وأحيانا ب 15 ريال وحجمه نص لتر ، بينما لتر ونص بالسوبرماركت بريالين أو ثلاثة .... فرق

• استئجار سيارة ضروري بالدول اللي فيها تمشية وقطع مسافات طويلة مثل سويسرا والنمسا وغيرها ، واستغربت على بعض السياح يستأجر صاحب تاكسي أو مرشد سياحي يوديه ويجيبه وهذا من غير الخسائر المادية يقيد حريته .

وأنا استأجرت من شركة اورب كار وشركة حلوة وبدون تحديد كيلوات وسرعة بالإجراءات .

• بالنسبة للجوال والإنترنت : الاستقبال بشركة الاتصالات السعودية مجاني على بعض الشركات اللي هناك وأول ماتوصل الدولة تجيك رسالة من شركة الاتصالات تبين لك اسم المشغل اللي تضبط جوالك عليه ويكون الاستقبال مجاني ، وتاخذ شريحة بيانات من موبايلي تشغل عليها الانترنت وكأنك بالسعودية وكذلك الظاهر بأغلب دول الخليج .
• أول ماتوصل الفندق خذ خريطة للمدينة وخله يحدد موقع الفندق .
• القطارات مواعيدها بالدقيقة فلازم تلتزم بالمواعيد بالضبط وأول ماتحجز خله يعطيك برنت للرحلة خصوصا إذا فيها تبديل قطارات : فتحصّل بالبرنت المسار اللي بتوقف فيه والمسار اللي بتحرك منه بالقطار الجديد وأحيانا مايكون بينهم وقت طويل فلازم تستعجل .
• أي محل تشتري منه أغراض اطلب منه تاكس فري taxfree وتختلف المحلات فبعضهاتعطيك من خمسين يورو فما فوق وبعضها من سبعين فما يضر تسأل عن أي مبلغ تشتري فيه

وهذا الأمر عبارة عن ضريبة تاخذها الحكومة على المبيعات ولكن لا يشمل السياح فأنت تستردها عن طريق المطارات يوجد فيها مكاتب وتعطيها الأوراق فتسترد هذه الضرائب ويجيك مبلغ لابأس به وبالنسبة رجعوا لي قرابة الالفين ريال وهو يرجع على مجموع مبالغ مشترياتك ، وخذ احتياطك ان النموذج يكون مختوم ولايكون فيه تعديل ولو بسيط .

أغراض الرحلة /

صيدلية + شمسيات + نظارات شمسية + رز + جبن + شنطة تعلق على الظهر + كواية + غلاية ( يوجد عند المحلات غلاية وكواية طقم خاصات بالسفر خطين 110 و 220 ) + شنطة أفياش دولية بحجم الكف تقريبا أخذتها من ساكو رغم إني ما استعملتها لأن أفياشنا ماشية هناك لكن احتياط .
يتبع ----)