1. السلام عليكم ورحمة الله وبركاته


2. الحين بنسوي الشيك ان


3. ندخل الطيارة باسم الله

السلام عليكم ورحمة الله وبركاته

من أبوظبي الى نيويورك كانت رحلتنا في يوم الخميس الموافق 24/8/2014 ,,, ولمدة شهر ,, قضيناها مابين نيويورك وفلوريدا ( أورلاندو) تحديدا ,, طبعا والت ديزني .
الناقل كان طيران الاتحاد وللامانة أول مرة أجربه وكذلك أول مرة أسافر من مطار أبوظبي الدولي ,, متعودة على طيران الامارات ومطار دبي الدولي,, وكنت بالفعل حاجزة على طيران الامارات والغيت الحجز بسبب الخدمة الرائعة الي قدمها طيران الاتحاد ,, الا وهي احم احم بدينا نتكلم بالفصحى ههه الله يستر. الخدمة هي ان اجراءات التشيك ان لمطار جون كينيدي او اي مطار في أمريكا تتم من مطار أبوظبي الدولي .... يعني كل الاجراءات الامنية انخلصها من مطار ابوظبي الخاصة بامريكا من تفتيش واسئله واستفسارات وبيانات الخ ,,, كاونترات خاصه بامريكا موجوده وتنختم جوازاتنا من أبوظبي دخول أمريكا
طبعا التفتيش كان دقيق واجد وماخلو شي مافتشوه باقي بس نحن ايحطونا تحت الجهاز وايسوولنا اسكان ههه
لكن اتم فبلادك ومرتاح وماشال هم الوصول , توصل نفسيتك مرتاحه ومعنوياتك أب أب أب .
نظرا لأني أول مرة أجرب طيران الاتحاد واكيد فيه منكم كذلك ماجربه , فباخذكم معاي جولة داخل الطيارة تكتشفونها بنفسكم وتتعرفون عليها مثلي .. خلكم بالقرب

الحين بنسوي الشيك ان

ندخل الطيارة باسم الله

اول مادخلنا جاني مضيف وقالي أنا بكون في خدمتكم وفي رعايتكم وأي طلب لاتترددين تطلبينه مني ,, وسألني شو أشرب طلبت اورانج جوس ,,, وللاطمئنان على بنتي الي ماتصبر عن اللبن لاني نسيت اخذ لها لبن والا بتحشرني طول الدرب ,, فسألته هل عندكم لبن ؟؟؟ فقال ::: الثلاجه متروسة لبن الحمدلله ارتحت .
وهذا خط رحلتنا من أبوظبي الى نيويورك ,, مرينا على قطر والبحرين وبعدها تفاجأت انا مرينا على اربيل فالعراق
ابصراحه خفت واستغربت ليه ماغيروا مسار الرحلات على أماكن غير امنه وخاصة بعد حادثة الطيران الماليزي ... والحمدلله مرت على خير وطلعنا صوب تركيا وبعدين البحر الأسود واوروبا وبعدين مرينا فوق مانشستر , قطعنا االمسافه بحدود 6 ساعات لين اهنيه وبعدين دخلنا أجواء المحيط الاطلنطي وقعدنا فيها 7 ساعات واشوي تقريبا وبعدين مرينا على اطراف كندا ونحن نازلين ووصلنا نيويورك
عطوا (الجوري) بنتي فدييتها ,, هدية ,, ومن ضمن الهدية كان فيه صور للحيوانات مع أسماءها ,,, واتفاجأت أن البنت تتخبل على الحيوانات وبالذات الجيراف والمونكي ,, والاليفانت .
قعدت اعلمها بعض الأسماء ,, وماشاءالله عليها حفظتهن, ذكية البنت طالعة علي ههه
وهاي الدرجه الاولى قدامنا
والحين جا وقت النوم ,,, سكروا الليتات ,, وشغلوا النجوم الي فالسقف .
للأمانه أنا مانمت ولكن بنتي وولدي ناموا , تقريبا اربع ساعاتوالحمدلله انهم ناموا في نص المدة ويوم صحوا كان باقي على وصولنا بالسلامه ساعتينبس ....
واو وصلنا فوق نيويورك وكانت شبيهه بلندن اكثير بالذات منطقة المطار نفس نظام البيوت وكلها خضرة
واتفاجأت أن المدرج على طول على المحيط يعني نحن نازلين على المدرج اول نقطه له المحيط ,, كان منظر روعة ابصراحه لكن ماصورته لان الموبايل مغلق وكان مكاني في النص ولكن اراقب من دريشة الجيران ههه.
هبطنا في مطار جون اف كينيدي الدولي ,,, وماتتخيلون الزحمه ,, لدرجة يوم نزلنا يوم خففت الطياره قعدنا ساعه وشوي يمكن لين وقفت الطياره ,, قدامنا طيارات سيد طويل ماشاءالله لدرجة انه استوينا سيدين اشوف جنبنا بعد سيد كله طيارات واقف ,, نوقف ونمشي اشوي اشوي ,, ههه ضحكت تذكرت زحمة دبي ,, اول مره اشوف بعد زحمه وسيدات واقفه في المطارات ,, والى ضحكني اكثر أن فيه جسر في المطار بعد تمشي عليه الطيارات
وأخيراوصلنا المطار ونزلنا من الطيارة بسرعه وعلى طول اول مانزلنا وصلنا سير الشنط حصلناشنطنا سيده وشليناها وعلى طول طلعنا بره المطار , ولاحتى شافوا جوازاتنا ولاشي ,, لذلك خدمة الطيران بالنسبه لمطار أمريكا كانت روعه ,, كانت الساعه فينيويورك 4 ونص .
نسيت أقولكم أن الهدف من رحلتيهي زيارة أختي والتسوق وسيرة والت ديزني. وكانت باستقبالنا هي وزوجها وبناتها الله ايحفظهم واستقبلتنا بحراره وخذنا شنطنا وطلعنا ..
هذا ماعندي لهذا اليوم خلكم بالجوار وانتظرواباقي التقرير
دمتم بود