- السلام عليكم ورحمة الله وبركاته
- نقاط سريعه :
السلام عليكم ورحمة الله وبركاته
اخواني واخواتي اعضاء وزوار منتدى العرب المسافرون حبيت اعطيكم مختصر سريع لرحلتي الى القاهره وشرم الشيخ ليستفيد الاخوان وايضا من باب رد الجميل لهذا المنتدى الرائع .
انطلق محدثكم ابوشهد ورفيق دربه ابو رمزي ( عصابة راسي ) على متن احدى طائرات الخطوط السعوديه من الرياض صباح الخميس 8/6/2006 الى القاهرة وكعادة السعوديه فقد تاخرت الرحله لمدة ساعتين بدون اي اعتذار او سبب مقنع ( الشكوى لله ) .
وصلنا الى مطار القاهرة حوالي الساعه 12 ظهرا وكان السواق في الانتظار , متفقين معه من الرياض على 200 جنيه في اليوم سياره مستوبيشي م 2005 فل كامل تماتيك .
نقاط سريعه :
سكنا 3 ليالي في قراند حياة ب 170 دولار في اليوم في الدور 22 الفندق رائع من ناحية الموقع واللوبي والخدمات لكن الغرف ضيقه شوي اما المنظر من البلكونه شي خيالي . ملاحظه اطلب من الرسبشن تكون الغرفه تبدا من 38 وانت طالع علشان منظر النيل يكون احلى.
ذهبنا الى المتحف المصري والدخول ب 2 جنيه والمرشد السياحي اتفقت معه يشرح لنا ساعه ب 50 جنيه وكان المتحف حلو وانبسطنا فيه بالمره.
ذهبنا الى الاهرامات في الصباح على اني ماحبها بس علشان خويي واخذنا دوره فيها ب 40 جنيه وانتبهو لا يلخمونكم ترا اول ماقالو لنا الدوره ب 250 جنيه قلتله تبي 30 ولا توكل على الله بعدين وافق على 40 .
حجزنا في السفينه الفرعونيه سهره مع عشاء بوفيه مفتوح لمدة ساعتين في الليل ب 165 للشخص وكانت حلو مره واكلهم حلو وكان الجو في الليل روعه . سفينة قراند حياة حلوه بعد وكانت ب 220 بس خفت ان اللي يركبون فيها كلهم اجانب من الفندق .
مطعم ابورامي في السيدة زينب قسم بالله عندهم مشاوي شي خرافي ورخيص كيلو المشاوي مع المقبلات والببسي ومويه صحه ب 100 جنيه فقط , صحيح مكانهم لك عليه والله بس روعه الجلسه في اخر الليل وتفرج واضحك .
مطعم ابوشقره اكلنا فيه بصراحه اشوفه حلو واسعاره معقوله على انه فيه ناس يسبونه . وفيه مطعم اسماك اسمه كاستن في مدينة نصر قريب من ستارز مول 5 نجوم وعندهم سمك وقمبري شي ماهو طبيعي اكلنا فيه اكل حق سنه للصيف الجاي اسعاره غاليه شوي بس ماراح تندم على اللي تدفعه .
القراند كافيه على خبركم في الليل زحمه بس حلوه الجلسه فيه و المنيمم شارج 27 جنيه للشخص .
هلتون رمسييس اه ياهلتون رمسييس بعد الساعه 9 في الليل فيه رجه ودعثه غير طبيعيه معسل واغاني وسعة صدر وعالم تخترش , المنمم شارج فيه 35 جنيه اذا ماكنت ساكن عندهم .
لا يفوتكم الحسين بعد الساعه 12 في الليل سعة صدر بمعنى الكلمة يابتشوف عالم غريب وشي خيالي هذا يبيع وهذا يشحذ وهذا يغني , فلة احجاج جاني واحد يدق عود وجلس يغني لنا اغاني قديمه لين قلنا بس وعطيناه 20 جنيه قال ابي اكثر قلنا بكره ان شاء الله .
ستي ستارز مول في مدينه نصر سوق يبغاله يوم بالحاله سوق فخم بالمره وحلو وسعة صدر , وفيه 16 سينما في الدور 5 او 6 والله ناسي حضرنا فيه فلم لمخة راس فلم يضحك ب 25 جنيه للشخص الصاله حلو والتكييف حلو .
بعد مارجعنا من شرم الشيخ سكنا في هليون رمسيس ب 100 دولار في اليوم بدون افطار والحجز عن طريق النت لكن بشرط انك ماتغير ولا تكنسل كله علشان ابو رمزي استانس على شغلة اللوبي ....
نسيت اقولكم رحنا لشرم الشيخ عن طريق باصات السوبر جت ب 150 جنيه رايح جاي للشخص الواحد والرحله تاخذ حوالي 6 ساعات بس والله راحت مادرينا عنها سوالف وضحك لين وصلنا ,, وترا فروع السوبر جت في الترجمان ولهم مكتب بجوار هلتون رمسيس وعندهم في اليوم اكثر من 4 رحلات .
هذه نقاط سريعه عن القاهرة وسوف اكمل لكم تفاصيل شرم الشيخ لاحقا ...
ولكم مني اطيب تحيه
ابو شهد
أتمنى ان تكون زيارتكم سعيدة وموفقة
وأشكرك على التقرير السريع لكنه مفيد بما فيه من اماكن وأسعار
منتظرين النقاط عن شرم الشيخ
تحياتي ومحبتي لك