وعليكم السلام هل في بالكم تاجرون سياره في سويسرا ؟! تراها جزء من متعة السفر
ديفون وأنسي قراب من بعض ممكن تسكن في وحده وتزور الثانيه
الوصول باريس والعوده من جنيف ممتاز عشان خط الرحله بكون ارتب
حاول تكون في جنيف في وقت مهرجانها الصيفي السنوي يكون بنهاية جولاي
حط في بالك انه سفرتك في الصيف وبعد العيد يعني موسم سياحي خليجي قوي جيد انك بديت الترتيب من الان عشان تستفيد من العروض
والله يتمم لكم على خير

الله يجزاك خير ومشكورة على التجاوبأفضل أستاجر سيارة في الأماكن الريفية
مثل ديفون وأنسي وأنترلاكن
يعني في بالي أستأجر سيارة بآخر يوم لي في باريس
وأسلّمها في أنترلاكن !
أبي أرائكم في برنامج الرحلة وكم تحتاج كل مدينة ليوم ؟
وهل 30 ألف كافية لسير الرحلة ؟

ممكن من باريس الى جنيف بالقطار ومن هناك تتاجر السياره
لانه المسافه بالسياره حوالي 5 ساعات
باريس يبي لها 5 ايام حلوين
مناطق سويسرا الافضل تشوف بوابة سويسرا الخبراء يفيدونك افضل
ممكن هالموضوع يساعدك شوي في تحديد الايام حسب الانشطه في المنطقه
جنيف ,, اين تذهب فيها ,, واين تذهب منها https://artravelers.com/p/re/902765

الله يعطيك العافيةومشكورة ماقصرتي
أنا أفضل المدن اللي فيها أنشطة وفعاليات مشوّقة وإجتماعية والمدن الريفية للإسترخاء والرومانسية
فمبدئياً حددت:
باريس: 5 أيام
ديزني لاند: يومين
زيورخ: يومين
أنترلاكن: 4 أيام
جنيف: يوم
أو العكس في خط سير الرحلة
والسيارة صعبة أستأجرها لأن زيورخ من نظرتي القصيرة إنها ماتحتاج سيارة
عندي مجموعة أسئلة ياليت تفيدوني

• هل 30 ألف كافية لشخصين ( طبعاً من غير التذاكر)
• باريس يكثر فيها المتاحف والتراث ولست ممن يستهويها، هل 5 أيام كثيرة لو حذفت هالأشياء من برنامجي ؟
• أفضل استئجار سيارة في المدن الريفية ولكن زيورخ مخربه الموضوع

من رأيكم أحذفها وأحط بدالها ديفون وأنسي ؟ وأستأجر سيارة من باريس وأسلمها في المحطة الأخيرة ( جنيف ) ؟
ولا أكنسل سالفة السيارة وأخليها زي ماهي ؟

الميزانيه محد يقدر يحددها لانها تختلف من شخص للثاني حسب أسلوب معيشته
وبما انك شهر عسل يعني السالفه يبي لها بحبحه شوي
الميزانيه ان شاء الله كافيه لانه الوقت قدامك طويل وراح تكون عروض كثيره على الطيران والفنادق
التسوق حسبته مستقله يعتمد عليكم
الايام نفس ما قلت لك تعتمد على الانشطه الي ناوي عليها في كل منطقه ودام ما في بالك متاحف وقصور وآثار ممكن تقلل المده
شوف هالموضوع فيه شرح لأهم معالم باريس حدد الي يعجبك ومنه نحدد كم يوم يناسبك في باريس
يومين ديزني ما تحسها كثيره ؟! خصوصا انه ما معاكم أطفال وحركتكم اسرع وأخف
عموما اذا ناوين يومين ممكن تزورون الاوت لت القريب من ديزني في احد الايام يبي له ساعتين او ثلاث بالكثير
جنيف قليل لها يوم لانه يمها مناطق كثير تستحق الزياره

هذا الموضوع نسيت أحط الرابط
جداول سياحيه ل عاصمة النور و النار :

..
انترلاكن قليل فيها 4 ايام وكثيره 5 على باريس
دزني بعد يكفيها يوم ممكن باريس كلها مع دزني 5 ايام
زيورخ دامها يوم ما بتفرق معك اذا معك سياره او لا
جنيف الافضل تلغيها وتسكن في انسي دامها الاقرب لمطار جنيف
وتزور المناطق اللي حولها بالسياره وبنفس اليوم ممكن تروح منطقتين بعد
شوف البوابه السويسريه بيساعدونك كثير بخصوص ترتيب خط سير من بعد باريس
واشوف الميزانيه كافيه دامها بدون التذاكر ووجود السياره بيريحك من ميزانية القطارات

الله يعطيكم العافية وأعذروني كان أزعجتكم
الأماكن المقرر زيارتها في باريس:
قوس النصر، الشانز، الكونكورد والمسلة، اللوفر، بيرسي
برج ايفل، نهر السين، حديقة لوكسبورغ، الحي اللاتيني
هضبة مونامرت، جاليري لافاييت
الاديفانس، حديقة بولونيا
هذي الأماكن اللي بزورها بإذن الله
وقسمتها تقريباً على حسب القرب من بعضها. وراح يكون بالأيام
هل ترتيبي والتقسيمة للأيام كافيه وصحيحة؟
وأبي أزور متحف الشمع بس ماني عارف أقرب مكان له بالضبط وبأي يوم يكون !

..
غابه بولونيا محد ينصح فيها بالليل كلها سكارى وامور ثانيه
وبالصبح بقاياهم
متحف الشمع قريب من الغاليري لافيت بمنطقة الاوبرا
حديقة لوكسبورغ الافضل من بدري والحي الاتيني بوقت نهار قبل الغروب
برج ايفيل افضل وقت له قبل الغروب وبعد الغروب