شاكلين
يا هلا و مرحبا فيك
فندق المرينا رائع و على شارع الخليج و نظيف وراقي
الجو حلو لاهو الحار ولا هو البارد
الاماكن كثيره
المركز العلمي
مجمع الافنيوز
مرينا مول
مجمع 360
المدينه المائيه اكوابارك
منتزة الشعب
المدينه الترفيهيه
سوق المباركيه
و في غيرها كثير

بالبداية حياكم الله بارضكم الكويت وتنورونها
وانشالله اني اقدر افيدكم بمعلوماتي
أول شي بالنسبه للجو
الجو طبعاً مثل دول الخليج الظهر الجو حار بس تعودنا عليه وبالليل الجو متعدل وجيد
ثانياً بالنسبه للامكان :
الكويت فيها مجمعات وايد حلوه ومنها الافنيوز / المرينا / سوق شرق / 360 / الفنار ....إلخ وهذا المجمعات فيها سينما وفيها العاب للاطفال وبعد فيها مطاعم وفيها قهاوي طيبه وقعدتها ما تنمل
ومن احلى الاماكن الترفيهيه بالكويت طبعا لان حر فلازم تزورون المدينه المائية / القريه المائيه وهم تقدرون تروحون حديقة الشعب أو المدينه الترفيهيه أو المركز العلمي ....إلخ
وعدنا اماكن شعبيه مثل القهوه الشعبيه لازم تزورونها وهم لازم تروحون قهاوي سوق المباركيه للان القعده هناك وايد حلوه
وثالثاً بالنسبه للفندق :
الفندق ممتاز من حيث الفخامه والموقع والغرف وكل شي يعني اختياركم للفندق 10 على 10
اتمنى من الله اني وصلت لكم بعض المعلومات على الكويت
وموفقين انشالله ورحله سعيده والله يحفظكم

مشكورين وماقصرتوا
غير الاسواق العاديه
ابي اسواق بضايع الكويت
وبعدين ناس قالولي روحي مري بشارع الاحمدي
وبعدين انا وزوجي فقط
ماعندنا اطفال

هلا اختى حياج الله
الاخوان ما قصروا بالردود واى استفسار احنا جاهزين للرد بايللى نقدر عليه يالغاليه
بالنسبه لشارع الاحمدى يقصدون ان فيه زينه ولمبات تزين الشوارع للاحتفالات ومناظر تستحق المشاهده
بصراحه ,شركه البترول مزينه الشوارع بمناظر مبهره بس للامانه ماادرى ان كان الى الحين او شالوهم !
وبما انكم خفيفين بدون اطفال انصحكم بزياره الافنيوز مول كبير وفيه عده كافيهات مميزه ومطاعم
تستحق التجربه منها مطعم رايس يقدم الاكلات الكويتيه الشعبيه بتقديم حديث ومميز وجديد وعليكم بالعافيه
ها بس ترا اسعاره مرتفعه شوى ! بس يستحق التجربه ,وعندكم مطعم فريج صويلح بالسالميه شعبى واسعاره
حليوه بس اكله حلو ,
وبالنسبه للاسواق 360 مول جديد وحلو ,,,اما المولات العاديه المتواضعه اسعارهم عندكم بالفروانيه
الحمراء مول والعربيد مول وفى ابو حليفه كويت ماجيك وفى السالميه اسواق المعلم او يسمى سيتى سنتر السالميه
واى استفسار حاضرين ,

حاضرين للطيبين
اذا ما عندك اطفال انصحكم بالمشي بمجمعات الافنيوز و360 والمرينا وطبعا التمشي على البحر بالليل وقعدون على مطاعم وقهاوي المرينا الي على البحر وهم تروحون سوق المباركيه لان اسعارهم وايد مناسبه ومن المجمعات الرخيصه مثل ما قالت اختي ام البدر المعلم / المحاميد / الحمرا مول / سوق الفروانيه والجليب
وحياكم الله بديرتكم

وهم بعد انصحكم بهل مطاعم وضروري تروحون لهم لان اكلهم وايد حلو
مطعم شيلز موجود بالافنيوز وهم موجود بالبدع بس احلى مكان الي على البحر بجانب أبراج الكويت
مطعم الأبراج على البحر القعده فيه وايد حلوه والاكل هم بعض لذيذ
مطعم المياس مطعم لبناني من احلى واطيب المطاعم بالكويت
مطعم الصنوبر مكانه وايد حلو على البحر واكله هم بعد جميل
مطاعم شعبيه
مطعم فريج صويلح اكل كويتي وشي مرتب وفيه اماكن للعايلات
مطعم أيام زمان اكل كويتي وشي مرتب وفيه اماكن للعايلات
مطاعم سوق المباركيه بس انصحكم تروحون عشا مو غذا لان القعده بره حلوه بالليل
وموفقين وحاضرين للاسئلة

مشكورين
اختي ام البدر والاخ فيصل
والابراج حقتكم هل تستحق الزياره او لا
وفيها مطاعم واذا فيها وش احسن مطعم
وبكم سعر التذكره
وش احسن محل عندكم يبيع عبايات حلوه
وفيه اماكن عندكم حلوه تكون بعدالساعه 12 بالليل او لا

العبايات روحي الفروانية في كذا مجمع مثل العربيد وفي بعد دراريع يخاصونهم لك بعد يوم او بنفس اليوم اهم شي في الفروانية روحي الصبح ايام الدوامات لانه زحمة العصر او الليل ....وفي بعدفاتحين محلات جديدة باسواق القرين للشغلات الكويتية وهذا السوق جديد يعني ما عليه دوس بس تحصلين عبي ودراريع شغل بنات الكويت وتقدرين بعد تروحين المعارض تلاقين عروضهم بالجرايد
احلى الاماكن في الليل عندج المطاعم والكافيهات اللي جم فندقكم قعدات حلوة وممشى جميل على البحر والمرسى .....المهم عليكم بالعافية واختياركم للفندق وايد زين

شاكلين
بعد ال12 بالليل تقفل المولات تقريبا كلها بقرار من وزاره الداخليه لاسباب امنيه ما لكم الا التمشى
عالبحر والمطاعم وموفقين بزيارتكم