بسم الله الرحمن الرحيم
السلام عليكم ورحمة الله وبركاته كيف حالكم اخواني اعضاء منتدى العرب
في بوابة السلطنة ...
اعذروني على العنوان لأني بصراحة اكتب وأنا مظايج ....
أولا : بدأت أتجول في الشبكة العنكبوتية لعلي أجد شيأ يعجبني أو شي معقول
للسكن في صلالة فوجدت معلومات كبيرة ووافية في منتدى العرب المسافرون ومواقع
أخرى وأرقام وإيميلات كلهم فقط لخدمة زوار صلالة بل كلهم أعتقد أنهم من صلالة
وهذا مايميز أهل صلالة الكرم والجود وهذا مب غريب على أهل عمان .... ولكن الغريب
إني لما بدأت أتصل أكلم شخص عطني شقة ثلاث غرف في تاريخ 15/ 7 قال أوكي
موجودة قتله وين قال في صلالة الجديدة قلت ياسلام هذا المكان اللي أبيه قتله كم السعر
وياليته ماقال لأنه حبطني قال 120 ريال قلت ليج قال موسم وأنا بنفسي قاعد أقول موسم
يعني أستغل ولا شو بالضبط بس مع ذالك الريال كان يكلمني باحترام وبلباقة ويعرض علي
أماكن ثانية لاكن للأسف أقل سعر عندده ولغرفتين فقط ب 85 ريال قتله الأسعار نهائية قال
ايه نهائية لأنه بعد أيام (الأسعار بترتفع) ... قتله جزاك الله خير وماقصرت معاي وسكرت عنه
اتصلت لين كذا شقق أبغيها بتاريخ 15/7 وأقل واحد قالي للغرفة 60 ريال قلت لاحول اللي يرد
علي كان هندي قلت يمكن قاعد يلعب علي سكرت عنه قلت أراسل الجماعة اللي خذت إيميلاتهم
من النت و المنتديات كيف حالكم طيبن الحمدلله بغيت شقة بالتاريخ الفلاني موجودة إيه موجودة
كم السعر 85 قتله وين قال بصلالة الجديدة قلت شو السالفة كلهم على 80 و 90 100قلت خلني
أبحث عن منطقة بعيدة نوعا ما عن المدينة .. قلت خلني أجوف السعادة طرشت إيميل حق
ريال وقال موجودة كم السعر 85 قلت أعوذ بالله شكلنا ما بنسير صلالة السنة قلت حق واحد
للي اتصلت به ليج جي الأسعار وايد مرتفعة قال لأنه موسم من إي الموسم لازم نرفع الأسعار
قتله أسعاركم اللحين كيف قال شقة ثلاث غرف .. وخلني أقولكم وين في الرحاب للشقق 44 ريال وجوف
الفرق .....
اخواني أهل صلالة لاتزعلون مني لأنه هاذي سلبية كبيرة أصبحت واقع عندكم في صلالة وممثلها
شجع التجار وكل واحد قاعد يدور على بقرة يبي يحلبها وتنزل له فلوس ...
اخواني أهل صلالة أنتم ليس بغريب عليكم الكرم وليس غريب عليكم حب خدمة السياح
وهذا شي مب يديد عليكم ولكن مع هذي الأسعار أعتقد أنه سياح صلالة سيقل كل عام إذا اسمترت
الأسعار بهذا الشكل ...
إخواني ولو كل واحد منكم يقدم عندكم في وزارة السياحة أو المكان المسؤول عندكم في صلالة عن
تنظيم السياحة في موسم الخريف بأن تضبط مثل هذي النوعية من التجار أو تقوم الحكومة بتسعير
الشقق في موسم الخريف للبعد عن المشاكل ولكسب أكبر عدد من السياح لصلالة ....
إخواني أهل صلالة إعذروني إذا كتبت شي مايعجبكم ولكم هذا واقع ولازم نتكلم عنه
لأن 600 ريال أصرفها كنت للسكن في 20 يوم مب 10 أيام ...
ولي تكملة للموضوع ...
أخوكم : Mohamad >>>