الديمها قطر
31-10-2022 - 01:52 pm
استفسارات
1- شو احسن ايليت جراند او ايليت سبا, خاصه بالنسبه للاطفال.
2- جنة دلمون وين مكانها و اوقات دوامها.
3- اوقات العاب عذاري
4- توزيعات القريقعان ابي افكار جديده مليت من جدر الهريس والعيوز و البير وام خماس.
5- محلات ملابس البنات 9 سنوات للعيد و الافراح ابي شي ناعم و راقي استايل ايطالي يعني مو نافش ولامع.
6- محلات الدلال الراقيه و اواني التقديم
7- اذا فيه اماكن ثانيه حق اليهال غير المجمعات والمدينه المائية و عذاري قالوا انه في الفورملا مكان العاب لليهال الكارتنج صج
ادري استفساراتي و ايد بس سوري اهل البحرين كرما واهل قطر يستاهلون.
أهلا فيج أختي ... وحياج الله ...
1- شو احسن ايليت جراند او ايليت سبا, خاصه بالنسبه للاطفال.
إليت جراند أفضل للأطفال ...
2- جنة دلمون وين مكانها و اوقات دوامها.
3- اوقات العاب عذاري
الإجابات تلاقينها في الدليل السياحي ... مشروحة ومفصلة بشكل وافي ..
4- توزيعات القريقعان ابي افكار جديده مليت من جدر الهريس والعيوز و البير وام خماس.
محلات الحلويات منتشره في البحرين بشكل كبير ... والافكار ما تخلص .. ممكن تشوفين هالرابط: https://artravelers.com/p/re/164550
فيه أسماء لكم محل مختصين بهالأمور ... وفي محل اسمه لاماركيز ...
هذا موقعه..
وانتوا على شارع الفاتح ... الشارع الرئيسي اللي يقع عليه جامع الفاتح الكبير ...
لما تخلون الجامع على يدكم اليمين .... فيه إشاره ضوئية تجيكم ... فيها لفة يسار ... لفوا هاللفة ...
أول إشاره ضوئية بتصادفونها ... تدخلكم على شارع المعارض .... اتركوها ... وروحوا سيده ... بعد ثاني إشارة ضوئية ... بتشوفون المحل على يدكم اليمين ... وواضح وما في إلا هو في هالمنطقة ... جنبه أرض فاضية كبيرة ... فيها معرض للسيارات ..
5- محلات ملابس البنات 9 سنوات للعيد و الافراح ابي شي ناعم و راقي استايل ايطالي يعني مو نافش ولامع.
شوفي المحلات في الستي سنتر أختي .. فيها محلات حلوة جديدة مخصصة للأطفال ... إن شاء الله تلاقين عندهم طلبج ..
6- محلات الدلال الراقيه و اواني التقديم
في محل اسمه المحمود في شارع المعارض ... أغراضه كللش حلوة وراقية ... وفي محلات أكبري بعد عنده أواني حلوة وراقية ... وهذا موقعه في شارع الشيخ سلمان .. وانتوا جايين من الجسر ... تروحون سيده لا يسار ولايمين .. لين توصلون عند ماكدونالدز ... يصير على يمينكم ... تطوفونه وتروحون بعد سيده لين الإشارة المفروض انكم ترجعون على نفس الشارع ... وبعد مبنى السفارة الأمريكية .. تلفون يمين .. وتروحون سيده .... بعد ثاني إشارة تلفون يسار وبتشوفون المحل على طول على اليمين ..7- اذا فيه اماكن ثانيه حق اليهال غير المجمعات والمدينه المائية و عذاري قالوا انه في الفورملا مكان العاب لليهال الكارتنج صج
حاليا في مهرجان صيف البحرين ... تقدرين تشوفين الموضوع المثبت في البوابة ...
وعن حلبة البحرين الدولية ... نعم موجود الكارتنج ... وعشان الأسعار والشروط شوفي هالرابط: http://www.bahraingp.com/en/experiences/ultimate/karting