حياكم الله بديرتكم اختي الكريمة الابراج واكوا بارك paintballبموقع قريب عند بعض مجرد خطوات اما سيتي سنتر والفنار بمنطقة السالمية عندكم حديقة الشعب ومارينا مول وبعد الكوت مول بمنطقة الفحيحيل واذا رحتي الافنيوز مول روحي لكافيه اسمه لورنزو كراسيه بيضاء واطلبي منه سويت اسمه ملفيه راح يعجبك وتدعيلي ههه

17/11
الصبح تروحون مارينا كرسنت على البحر مقابل مارينا مول في مطعم اسمه زيت وزعتر بعدين تعبرون الشارع للمارينا مول تتسوقون وتشوفون المجمع لانه قريب. عقب تروحون المركز العلمي هم قريب. بعدين قريب من المارينا مطعم فريج صويلح تتغدون فيه.
العصر او المغرب تروحون مجمع الافنيوز يبيله نص يوم تسوق ومقاهي وبالليل ادشون سينما.
18/11
تروحون مجمع الفنار والمجمعات الي حواليه وبعدين سيتي سنتر , المغرب تروحون الابراج وسوق شرق وبعدين عندكم الاكوابارك او المباركيه او يوم البحار كلهم يم بعض انتوا وزعوها .
19/11
الصبح تروحون الفحيحيل مجمع المنشر تسوق العاب بعدين تعبرون الشارع من كل الجهات اسواق ومجمع الكوت سوق ومطاعم وسينما , عقب تروحون مجمع كويت ماجيك العاب للاطفال وسوق . العصر عندكم مجمع 360 ومنه تاخذون طريق المدينه الترفيهيه .
( حديقة الشعب مو بعيده من المارينا = paintball kuwait مو بعيد من الاكوا بارك
= في مطاعم شعبيه في المباركيه تصلح للريوق والعشا والغدا )
بالنسبه للمسرحيات اذا لقيتوا حجز شوفولها يوم.

مجمع 360
اكوابارك مدينة مائيه
حديقة الشعب
مجمع الراية

انا اقترح 16-11
ترتاحون ساعه و بعدها تروحون سوق شرق تتمشون بالسوق و تتعشون
17- 11
تفطرون بمرينا كرسنت و بعدها تتمشون بالمرينا الي وقت الغدا بعدها تردون ترتاحون و على العصر تروحون المركز العلمي تدشوف قاعت الاكتشاف و الاكواريم و بعدها سينما اي ماكس تطلعون تتعشون بالابراج الكويت وبجذي ينتهي اليوم ال 17 .
8- 11
يكون يوم الجمعه تروحون الافنيو راح ياخذ منكم نص يوم لان وايد كبير تمشو بالسوق و بعدها دشو السينما وعلى العصر او يمكن المغرب تردون ترتاحون و في الليل تروحون مسرحيه انصحكم لطارق العلي في ميدان حولي .
9- 11
يوم السبت روحو الستي سنتر لي العصر وبعدها المدينه الترفهيه لي الليل
ما انصح تروحون
1- الاكوابارك لان الجو بارد
2- النافوره الراقصه لان مافيها شي
انشالله اكون فدكم

حياج اختي نورتي الكويت
مليون بالمية راح يون عيد و الدنيا زحمة و لأن الجو راح يون حلو و بارد و الناس منتشرة في كل مكان و الحديقة المائية اكوابارك راح تصكر محد لاحظ من الاعضاء مع تقديري لهم
ابراج الكويت في مدينة الكويت في منطقة دسمان قريبه من اكوابارك جدا قريبه لدرجة انج تروحين لها مشي
و الافنيوز بعيد عن العاصمة داخل منطقة اسمها الري على الدائري الخامس شوي بعيد مو حيل
و سيتي سنتر يعني قصدج سوق السالمية في مدينة السالمية على نهاية الدائري الخامس
و مجمع الكوت بعيد جدا عن العاصمة 50 كيلو في مدينة فحيحيل على البحر يستاهل الروحة له ما دام محمد عبده مغني فيه
و مجمع 360 قريب من المطار و راح تشوفينه على طريق الكويت - المطار في ضاحية الزهراء
و سوق شرق في مدينة الكويت في منطقة شرق ( الحي الشرقي ) و حلو السوق كبير و راقي و فيه محلات ماركات و تقليد حلو حق العايلة الكبيره
و سوق المباركية الشعبي حلو حيل في مدينة الكويت منطقة المباركية سوق يستاهل المجيئ
و المسرحيات لازم تحجزين قبل العيد بأسبوع على الاقل صعب تحجزين في العيد اذا حجزتي في العيد لازم 23 24 -11 تشوفون المسرحية هذا يلي اعرفه عن المسرحيات
و المركز العلمي على البحر في السالمية حلو حيل
و اذا كان في بالج مطعم راقي ترا الكويت كلها مطاعم على البحر و داخل السالمية يعني لا تحاتين
و حياج الكويت مرة ثانية
اخوكم : ولد خمس نجوم