بالنسبة للجحاب لا حرج المراة تلبس لباسها الاسلامي في برشلونا يوجد الكثير من المسلمين الاسبان و العرب وسوف تلتقي في الشوارع حتى الاتي تردين النقاب ....

1) السكن لانه اهم شي دخلت على موقع البوكنق ممتاز جدا من ناحية الاسعار وجمال الفنادق ولكن الاهم هو الفنادق الامنه الامنه الامنه وايضا النظيفه والمتوفر حولها الخدمات سواء من سوبرماركت ومطاعم وغيرها
لذا ابغى من الاخوان والاخوات الذين سبق لها الذهاب هناك يزودوني بأسماء الفنادق الرخيصه والامنه ومتوفرة الخدمات التي ذكرتها وراح احجز عن طريق البوكنق.
الفنادق جميعها آمنة ...تطمن
2) كيفية الصرف من الصرافات واللغات المستخدمه في الصرافات مع العلم انا من السعوديه وابغى اعرف ايش البنوك الموجوده لدينا هنا ولها خدمات هناك في برشلونه
تأكد من العلامات التي خلف البطاقة هل فيه مثلا علامة فيزا اكترونيك
5)ابغى اعرف افضل البنوك لدينا اللي تعطيك بطاقة فيزا تحمل مبلغ اكثر من 3500 ريال لانه اغلبها يعطيك 3500 ريال فقط وانا ابغى اقل شي يكون فيها 4000 ريال تكون كافيه للسكن لمدة 10 ليال وايضا شراء تذاكر المباراه
اتصل على البنك و شف هل ممكن ترفع حدك الائتماني مؤقتا
فبطائق الراجحي مثلا .... من ممكن أن تدفع مقدما ويكون حدك الجديد
7)التكاسي اسعارها هل رخيصه ام تنصحوني بالباصات او المترو؟
التكاسي غالية جدا
الأفضل المترو والباصات

1) السكن
أفضل منطقة للسكن هي شارع الرامبلا، ففيها جميع ما تحتاج، و يمكن أن
تقضي في المناطق المجاورة له أكثر من يوم مشياً على الأقدام.
2) كيفية الصرف

• انصح بأن تحمل معك المبلغ نقداً، و أحرص ألا يكون فيه فئة ال 500 يورو، فستتسب لك بمعاناة هناك لصرفها.
• بامكان استخدام اي جهاز صراف، بشرط أن تكون تتطابق إحدى العلامات

الموجودة خلف بطاقتك على العلامات الموجودة عليه، مثل Maestro و Cirrus
و Plus ، بغض النظر عن أسماء البنوك.

• اللغة الانجليزية مستخدمة، بالإضافة إلى الأسبانية.

5)ابغى اعرف افضل البنوك لدينا اللي تعطيك بطاقة فيزا تحمل مبلغ اكثر من 3500 ريال
حسب علمي، بإمكانك إيداع مبلغ إضافي في حساب البطاقة، بغض النظر عن
سقفها الائتماني.
6)من ناحية الحجاب والبرقع
أؤيد لبس الملابس الملونة عموماً، و غطاء الوجه باللثام.
7)التكاسي اسعارها هل رخيصه ام تنصحوني بالباصات او المترو؟
المترو و الباصات هي أوفر وسيلة للمواصلات.
8) ع فكره الميزانيه كافيه ؟
كافية بإذن الله

https://artravelers.com/ اشكرك يالغلا والله ريحتني من ناحية الحجاب يسلمو
الليل والنهار / يسلمو ياذوق على الرد الرائع
سعود بن محمد / الله يعطيك العافيه شرح وافي وفادني كثير يسلمو
انتظروني واستحملوني ههه فيه استفسارات كثيره في القريب العاجل

حياك الله و بانتظار الاستفسارات

اخوي سعود بن محمد الله يعطيك العافيه ماتقصر انت وجميع الاخوان الموجودين

الحجاب كلش مب مشكلة ببرشلونه ...ممكن حجاب ملون وتتلثم به مع حتى العباية السوده الي نلبسها ...بس تحط عليها شال او جاكت عن البرد ....وبالنسبة لتذاكر المباراة احنا ما كنا مقررين نروح المباراة لأنا نازلين برشلونه يوم ويوم ثاني بنطلع كروز بالميديتيريان....بس لفينا التذاكر تنباع بستاندات الانفورميشن الي بالرامبلا حاطين صورة مخطط للملعب وكل جزء عليه السعر واخترنا وعطونا ورقة وقالوا لنا لازم تروحون قبل المباراة بنص ساعة واخذنا المترو العصر للملعب من الرامبلا ومع الخيل يا شقره مثل ما نقول الكل لابس فنايل البرشا واحنا وراهم سألنا بتروحون المباراة قالوا اي بس معاهم طبعا الجو غير الكل لابس لبس البرشا والاعلام والحركات تعيش جو المباراة من الصبح وانت بالرامبلا ووصلنا عند المحطة القريبة وطلعنا ومشينا مه الجمهور الغفير تقريبا 15-20 دقيقة لي وصلنا الملعب ودخلنا من احد الابواب الا الشباك الي لازم نعطيهم الورقة ونستلم منه التذاكر الاصلية يصير بالجهة المفابلة يعني لفينا الملعب كامل والا الطابور عالشباك طويل وسلمونا التذاكر (نفس الطريقة إذا شريت من النت)تاخذ لهم الورقة ويسلمونك التذاكر من الشباك ررجعنا اللفة الكبيرة للباب الي عنده مقاعدنا الاكانوا على وشك انهم يسكرونه وزين رضوا يدخلونا تعاملهم مب وايد زين بالغصب يبتسمون!لو متأخرين دقيقتين جان راحت علينا المباراة! فلازم تروحون بدري يعني ساعة ونص قبل المباراة تقريباً. احنا رحنا مباراة البرشا الي انغلبوا فيها ضد هركوليز 2/0 كشحناهم الظاهر!!!!كان الملعب مليان بينبط و الشمس حارة كانت.
وبالنسبة للمطاعم الاكل عموما معظمه سي فود ولا تفوتك الباييلا الطبق الرسمي الشعبي لإسبانيا زوجي كان يومياً طبقه الرئيسي....بس في الشوارع الجانبية للرامبلا كان في محلات اسلامية معظمها لباكستانية وكان في مطعم مغربي بس ما جربتهم بس كنت افضل مطعم او كافتيريا صغيرة لها فرعين بالرامبلا تبيع شوارما وفلالفل يعطيك الخبزة وانت تحط بنفسم السلطة والصلصة وكان العامل مسلم فقال لي انه حلال بس لازم تسأل عن اللحم إدا كان خنزير او لا خصوصا بمطاعم الوجبات السريعة فكنا نفضل السي فود او الدجاج دايما .برجر كنج وماكدونالد وكنتاكي متوفرين بكثرة ....بالنسبة للسكن معظم الفنادق القريبة من الرامبلا غالية دش بوكينج واختار بس الفترة الي رحتها انه (سبتمبر2010) كان في مؤتمر طبي وبعده مباشرة مهرجان الموسيقى فكانت الاسعار غالية 850-1000 ريال الليلة اول ليلة سكنا في سلكن رامبلا قبال الميريديان مع الفطور دقيقتين مشي للرامبلا يعني تطلع من الفندق تلف يمين الا انت بالرامبلا و وبعد الكروز قعدنا ببارسيلو رافال كان احلى بس تمشي للرامبلا تقريبا 12 دقيقية ....بس خلوا بالكم على فلوسكم يعني زوجتك لا تشيل شنطة كبيرة ممكن تشيل شنطة صغيرة الي تنشال على جنب وانت شنطة ظهر والبسها من الامام وايد نشالين
تره...صديقتي سافرت بعدي باسبوع جات وحدة تسألها شي بالخارطة واهيه تقول لها ما اعرف انه غريبة جان ايي واحد ويسحب الشنطة ويطير ....يسوون خخط شاغبوها بالخارطة وباقوا شنطتها .فخلوا بالكم ..ولازم تروحون سوق الخضار الي بنص الرامبلا(لا باكوري) خيال وايت استمتعت فيه الفواكه والسمك واللحم والمكسرات كل شي طازج وغريب حتى محل البيض مرتب وكل صور دجاج وقش يفتح النفس على البيضة حتى وهي نيه!!!وسلطات الفواكه الطازجة مقطعو ومرتبة بالعلب اشكال والوان والعصاير الفرش خلطات عجيبة,,,بس اسوأ شي باسباني انهم يسكرون الاحد كا مكان مسكر حتى سوق الخضرة....ما عدا المجمع الي عالبحر آخر الرامبلا اهو الوحيد الي يفتح ببرشلونه واذا تبي شوبينغ حلو ورخيص عندك c & a بضاعة ممتازة واسعارها جدا مناسبة .... وهو شامل ولادي بناتي رجالي حريمي من مجاميعه ويصير جريب من ساحة كاتلونيا الي يوقف فيها الباص السياحي ويتجمع فيها الحمام......وايد طولت بس حاضرة لأي استفسار

1. 4) التذاكر تنباع في كشك في شارع الرامبلا

1) السكن أفضل مكان على شارع الرامبلا وإذا حبيت سكن يسعر مناسب وموقع ممتاز أنصحك بفندق Turin ممتاز من حيث النظافة والموقع
2) بصراحة احنا ما احتجنا نصرف أبد من هناك..أخذنا كاش 500 يورو من البحرين وبقية الصرف كله ببطاقة الفيزا..على فكرة اهيا طريقة آمنة للصرف على حسب كلام الاسبان..أفضل من الكاش..ولكن لازم تحمل معك بطاقة الهوية أو نسخة من الجواز
3) يوجد في شارع الرامبلا وكذلك في المناطق اللي حوالينه وأفضل مطعم للشوارما والفلافل Pita على ما أظن اسمه

4) التذاكر تنباع في كشك في شارع الرامبلا

5)احنا بطاقة الفيزا كانت ب 10000 ريال تقريبا.. وكنا بحسابنا بموقع البنك على الانترنت ننقل لها المبالغ كلما خلص الحد الائتماني
6)أنا كنت ألبس بالطو طويل (ألوان مختلفة) مع حجاب ملون..بس لانه صارت لي حادثة مع وحدة عجوز شمطاء سحبت النقاب من وجهي في أول يوم في اسبانيا فخفت وخلعت النقابغير النظرات الغريبة من السياح ( كانوا يتركون الآثار ويناظروني خ)..وما شفت اي احد لابس الحجاب في الجنوب ولكن في برشلونة شفت..وللمعلومية ما شفت ولا وحدة لابسة نقاب..يمكن لانه الفترة اللي رحناها ما كان في عرب كثير
7)التكاسي أسعارها غالية ..أنصحك في برشلونة باستخدام المترو..سهل وفيه متعة كبيرة
8) ان شاء الله بتكون كافية
وأتمنى لك سفرة ممتعة..بس الجو بيكون برد ..احنا رحنا في نصف اكتوبر وكان الجو بارد وكل الناس لابسة ثياب الشتاء..فاخذوا احتياطاتكم من الملابس

غطيطه/ اله عليك شرحك وانا اخوك واضح حسيت اني معاكم بالرحله ههه اشكرك يالغلا والله استفدت الكثير منك
yarroo/ يسلمو كلك ذوق ماقصرت شرح وافي