بسم الله الرحمن الرحيم
قبل أن أبدء في موضوعي أو تقرير المصور البسيط عن منطقة بوشناك في أندونيسيا ,, أود ان أقول أني من الطبيعي لن و لم أقدر أن أجاري المواضيع و التقارير الرائعه عن هذه المنطقة أو عن أندونيسيا ..
ولكن بإذن الله أقدر أن أفيد لو كان بالشيء القليل ,, حتى ول كان بمتابعت الصور الساحره فقط ..
سفرتي إلى بوشناك كانت في شهر 4 من هذي السنة و لم تكن السفره محض صدفه ,, فأخوكم كان يدور على مكان ريلاكس طبيعه و خضار على راحة بال و هدوء ,, فشاورني أخوي أن نسير هذي المنطقة و قالي أن يمدحونها وايد ,, قلت له فوقه و توكل على الله ..
كان مسار الرحلة أن ننزل في بانكوك يوم و عقبها نطير مره ثانية على الخطوط الطيران اير اسيا ..
اليوم الأول
طبعا كانت طيارتنا إلى أندونيسيا على الساعه 8 بتوقيت تايلند ,, رحنا المطار نخلص الإجراءات وندفع الوزن و ناخذ البوردنق ..
الربع يخلصون أمورهم ..
بعد ماخلصنا قلنا نتمشى في مطار تاي الرائع الكبير ..
و أخيرا بنركب الطيارة
بعد رحلة طيران ليست بالقصيرة ,, كنت اتحراها ساعه أو ساعه ونص بس طلعة 3ساعات و نص ,,
وصلنا المطار طبعا في أندونيسيا لازم تاخذ فيزتهم من هناك في المطار قبل لاتختم الجواز ,, و قبل الفيزا لازم تكون معبي فورم الدخول بالكامل وحاول أنك ماتنقص فيه شي ,, عسب محد يتفلسف عليك ..
بعدها أنطلقنا ناخذ العفش ..
و بالمره ناخذ بطايق للبلاك بيري و الأي فون ,, نصيحه لاتطلعون من عندهم لين ماتشتغل الخدمة ..
طلعنا من المطار و كان في نتظارنا السايق ,, يالله هوب على السيارة ,, طبعا الدنيا ليل يعني ظلام في ظلام ,, لا تقولي تبغي تشوف طبيعه ..
الصراحه كنت ميت يوع ,, يالله لو سمحتوا على أقرب مكان ,, طبعا في مول على طريجنا وقفنا و كلنا في هارديز على ماتوقع ,, و خليت عصافير بطني تسكت و تنام ..
و بعدها انطلقنا إلى المكان المقصود ,, طبعا صاحبكم حط راسه و خذا له غفوة صغيرة ,, لأن أصلا كله مرتفعات و ليل فما تقدر تشوف حاجه أبدا و بقولكم حاجه و أعتبروها نصيحة من أخوكم الصغير إذا كانت بس وجهتكم إلى بوشناك فحاولوا تروحونها بالليل ,, عسب تتفاجؤون بالمنظر في الصباح وتقولون سبحانك ربي واو ,, ولأن طريق الجبل في الصباح مزدحم بطريقة غير معقوله ..
ألقاكم في اليوم التالي بإذن الله ,, العذر على أي تقصير و على الأخذ من وقتكم الثمين ..