قرأت كثير من التقارير بهالمنتدى ....... عشت معاها لحظات حلوة ....
احببت اندونيسيا ... زوجي احبها .. قضينا فيها اروع سفرة ...... وما خلاني اتردد في وضع تقرير الا ندرة
مشاركة الاقلام النسائية في هذه البوابة .... بوابة اندونيسيا ...
بس فكرت ليه ما أفيد غيري مثل ماستفدت ..... خصوصا اني بطبعي أحب اجمع كل شي من معلومات وفواتير وكل كل شيئ استعملتة برحلتي
حتى كنت اكتب مذكرات يومية.. (وزوجي يقول خلي عنك الكلام الفاضي تتعبين نفسك بالمذكرات... وانا استمتع فيها مو تعب)
دونت فيه كل شئ تحركاتنا .. فنادق .. اسعار .. حتى تكلفة الوجبات الصغيرة ........
وكتبت مقدمة لتقريري ... وجيت طلعت الفلاش الميموري الي مخبيتة بدرج مقفول ... علشان استعمل
بعض الصور ....... بالتقرير ....
لقيت الطامة الكبرى .....
اللي بالجأ لاعضاء هذا المنتدى .. وعشمي كبير انه الاقي حل لمشكلتي ...
علشان انزل تقرير لو حبيتو ....!!! (ابتزاز) ^_^ لانة كل شي جاهز ماعدا الصور ...بس
خلوني اقول لسالفة كلها من البداية عشان تفهمو وتساعدوني .....(معليش احب كل شي يكون وااضح)
في سفري لاندونيسيا .. صورت صور كثيرة وروعه .. بكاميرتي النيكون Coolpix 4300
مدري هذا اسمها .. بس هذا المكتوب عليها .. 4 بكسل
فيها ميموري 120 ميجا .. بأول الرحلة لما امتلأت الميموري .. انا شسويت ؟؟
رحت محل ستوديو بسوق الاتريوم عندهم ونسخت الصور على فلاش ميموري (جايبتة معاي) وحطيتة بمجلد بوسط الفلاش ميموري ... الى هنا تمام
بنص الرحلة امتلأت الميموري مرة ثانية ... رحت لنفس المحل ونسختهم بالفلاش ميموري بمجلد آخر ...
الطامة الكبرى الي بكتني لما رجعت .... فتحت بس المجموعه الثانية والمجموعه الاولى بح ....
جيب شسويت .... استسلمت للامر الواقع وقلت باكتفي بصوري المجموعه الثانية .... طبعت منهم مجموعه وانبسطت فيهم ........... ومسحت ملف المجموعه الاولى الخربان
الطامة الاكبر .......... لما الان رجعت لصوري (المجموعه الثانية الي فتحت معاي أول) لقيتها مو راضيه تفتح .... تخيلو اخش على الملف بالفلاش ميموري الاقيه فاضي ( 0 مجلدات)
وأشوف حجم الفلاش الالميموري يبين انه مليان يعني مو فاضي ..........!!!!
كيف ووش أسوي ؟؟؟؟!!!!!
كيف اطلعها .... والله ثم والله هالصور غالية عندي كثير .. ومو مدح فيها روعه (اشوقكم )
وكنت في كل ركن أصور وبكل زاوية ماخليت شي ماصورتة لدرجة زوجي كل مامشينا بمكان يقوول
شوفي شوفي منديل طايح بالارض صورية !!!!!!!! يتطنز علي ... (انا مجنونة تصوير وهو لا )
بليز ساعدوني خلو تقريري يشوف النور.. سامحوني عالاطالة بس والله من حرقة قلبي .... وسلامتكم
ملحوظة : ياريت كل عضو يذكر طريقه بحفظ صورة غير الطباعه .. وشراء ميموري أكبر سعه