- -
- -
- مافي رقم تلفون عندي له علاقة بالصين الا اتصلت فيه ..
- لكن انا مو رايح الصين عشان اعمل علاقة اجتماعية
- الشاهد يا شباب
- لكن كانت هذه مناسبه اشكر الرجل عليها.
- ونسيت اذكر شئ اعتقد انه هام ..
- لاني كنت غاية في الاحباط رجعت اقرأ مواضيع الصين كلها وانا في الصين ..
تقريري عن قوانزو
بسم الله الرحمن الرحيم ..
ولو اني تأخرت بكتابة التقرير لكن هي مشاغل الحياة..
اقول والله المستعان ..
منذ عدة اشهر اخطط لزيارة الصين ..
ومرة متردد ومرة مشغول الخ الخ ..
المهم عندما قررت .. وعزمت قرأت لاحد الاعضاء ان جواز السفر يجب ان يكون به صلاحية 6 شهور
نظرت جوازي والا به 6 شهور الا كم يوم...
وجدت رقم حارس السفارة كان واضعه الاخ كردت
اتصلت به .. سألته ( هندي الجنسية ) ياحليله ..
قال دام كويتي عادي يمشون ..
فعلا رحت بنفس اليوم مشى الحال ..
ذهبت للسفارة الاربعاء وطلبت فيزا مستعجلة مادري ليش بس دفعت 6 دنانير زيادة اي 12 دينار مع اني ما استفدت من الاستعجال شئ
المهم المستعجلة 12 دينار والعادية 6 دنانير
وايام فتح السفارة سبت اثنين اربعاء من 9 الى 12
الموظف يتكلم عربي بس الظاهر فصحى .. بعد ما سولف وياه انجلش جا واحد ثاني كلمه عربي ..
التذكرة:مريت مكتب قلت له ابي الصين الكينية .. قالوا 240 قلت اوكي
وبالطيارة اكتشفت ان اللي معاي ناس ماخذه على 230 واحد ثاني ماخذ على 232 يعني المكاتب بكيفهم الظاهر
الوصول الى دبي وتنتظر 7 ساعات بصالة رجال الاعمال وهي صالة محترمة وحلوة .. والمكتب يعطيك ورقة تدخلها مجانا ( ولو كان الدخول بفلوس بتكون عليك الساعة ب75 درهم على ما اظن ) ...
الصالة بها انترنت ومقاعدة وثيرة وبوفيه مجاني .. وكل شئ تمام .. وكلو مجاني
-
قبل موعد الطائرة بساعتين تروح تعمل البوردنج .. واحرص انك تروح بدري وتقول للموظف اريد المقعد اللي ما امامه الا المضيف .. بصراحة شغل عدل كانك حاجز درجة رجال اعمال مع انك على السياحية .. هذي فاتنني بالروحة بس بالرجعة .. ضبطت وياي كرسي على كيف كيفك ..
خرجت من دبي بالطائرة الى قوانزو وكانت مدة الرحلة 6 ساعات و35 دقيقة على ما اذكر .. والوصول قوانزوا 7 او 7 ونصف صباحا ..
وكنت امشي على راحتي واكتشفت اني لو مستعجل افضل لان وصلت طيارة ثانية وما جاني دور لختم التذكرة الا الساعة 9 يمكن المهم طولت جدا في المطار بسبب اني تأخرت 5 او 10 دقايق عن بقية القروب اللي في الطائرة.
-
وصلت المطار ماعندي عملة صيني ومن كثر ما يخرعون فينا الشباب بالمنتدى ويحذرون من العملة توهقت البنك قافل ومافي الا كاونتر صغير مدري مكتبة يناديني يصرف لي وانا مطنشه ، لقيت لبناني كان معاي في الطيارة قلت له يا عمي شوف لنا هالعملة مزورة او لأ .. وصرفت مبلغ قليل يمكن 30 دولار لزوم التاكسي ..
( ومرة ثانية بصرف من عند النصابين لان التحذيرات في المنتدى ) انا اخذتها بزيادة شوي .. والامر عادي جدا وسهل مجرد اقضب ورقة العملة .. ودقق فيها شوي راح يبين معك .. واصرف مبلغ بسيط ..
المهم طلعت من المطار الا كام تاكسي بره المطار .. قلت له سندادي على توصيات الاخ كردت .. فهم بسهولة قلت الحمدلله
كم سعرك يا الاخو .. قال 150 قلت مافي 100 قال 120 وكتبها لي على الموبايل ..
قلت ما فرقت كثير .. ركبت معه والى سندادي ووطأت قدمي ارض الصين لاول مرة ..
وصلنا الفندق وشفت مكتوب عليه new mainland عرفته من كلام الشباب بالمنتدى ..
الاستقبال بالفندق .. اريد غرفة قالوا مافيه غرف .. الا بزنز بسعر 600 وشي باليوم قلت ليش . قالوا عندنا اجتماع معرف ايش .. وكل شئ محجوز ..
المهم قلت ابي تلفون وصفوا لي غرفة .. اتصلت على الاخ مالك اللي من طرف الاخ كردت .. قلت له الحقني .. الوضع كيت وكيت .. وابي اسكن ..
قال اتصل فيني بعد 10 دقايق
اتصلت فيه قال حجزت لك بفندق park view
قلت ماشي الحال وكان السعر باليوم 280 .. ومشينا الحال ..
اظن اللي بفندق سندادي كتبوا لي اسم فندق بارك فيو .. عطيته للتاكسي وصلني هناك ..
وكنت راكب التاكسي اشوف 3 او 4 عدادات .. يتحركون قلت ايهو فيهم عداد الفلوس .. الا طلع اكبر واحد فيهم ولونه احمر ..
المهم
والاخ مالك مشغول .. قلت له ماينفع عمي .. تجيني اليوم بشوفك ..
بعد ساعتين الوقت كان ظهر او قريب العصر جا الاخ مالك طلع لي الغرفة
يوم فتحت له الباب
قلت له .. انا من سمعت اسمك مالك ظنيت شخص اسمر جدا وطويل وعريض .. من اسمك مالك .. الا طلع صيني ابيضاني وقصير .. وقعد يضحك ..
جلست معه شوي .. ثم طلعنا الى السندباد غيرنا فلوس .. ثم قالي انا بمشي .. قلت له اليوم الاحد الاسواق قافله شرايك شو اعمل
ضحك علي قال الاسواق ما تقفل ..
قلت اجل الحقني انا اخوك حامي جدا ..
ركبت تاكسي .. قاله سوق الملابس .. ورحت بروحي اول يوم للسوق تمشيت فيه من 3 ونص العصر الى 5 ونص العصر .. من طلعت بره لقيت فندق سندادي قريب من السوق .. قلت زين دلينا شئ ..
المهم رجعت ارتاح قلت للاخ مالك ابي مترجم
قال انا مشغول وادز لك مترجم
الصبح داز لي مترجم اسمه يوسف
ولد صيني عمره 26 ... بس ماشاءالله عليه كرهني بالصين بسبب بروده .. وكان بارد برود عجيب غريب ما شفته بحياتي .. لدرجة ساعات اكلمه سرحان ما يدري عني او يسمع بس يفكر بشئ ثاني ..
سالني وين تروح قلت له اي سوق .. المهم طلعنا احد الاسواق نسيت اي سوق بالاول طلعت .. بس على ما اذكر سوق لعب الاطفال وهو مجمع كبير وقريب منه مجمع اخر كبير ايضا متخصص لعب اطفال ..
وهنا كانت المفاجأة لاني سائل عن اسعارها قبل ما اجي السوق
لقيت اسعار الجملة عندنا بالكويت = او اقل من الاسعار في هذا المجمع .. واسقط في يدي ..
وللعلم فقط .. كنت لما امشي ويا المترجم دائما سؤالي يكون كالتالي
اسأل لي عن سعر الحبة وسعر الكمية ، واذا كانت كمية كم يقصدون فيها 10 او 100
ولاحظت انو ال10 او 20 ما تفرق كثير بالسعر عندهم مع 100 حبة .. لكن الفرق بين حبة و10 حبات او 20 حبة كبير ..
واقول بقلبي .. يعني الزبون اللي يشتري من الكويت ،، اذا في خراب ولا شئ يرجع للمحل يبدل القطعة ويبهدله .. اما هناك لا سعر ولا كفالة ..
وقلت يمكن هذا بسوق الالعاب فقط ..
ورحت لسوق التلفونات اليوم الثاني
وتم التأكد شرعا من ان السوق الصيني قريب جدا واحيانا اغلى من سعر جملة الكويت .. واي صاحب محل هواتف راح يلاحظ هالشئ .. اسعار نوكيا يمكن اغلى من الكويت اذا ما تساويها بس الاكيد مو اقل منها ..
وتحطم الحلم الصيني على قولة اخونا " الرقة العظيمة "
وبدأت رحلة الاحباط ..
قلت يمكن الخلل بالمترجم ..
اتصلت في مالك قلت له ابي مترجم ثاني .. قال هاا اشوف الخ الخ ..
واكتشفت ان مكتب مالك مكتب صغير جدا ولا عنده غير يوسف وساعات يستعين بمترجمين من بره .. وهكذا المكاتب بينهم اللي ينضغط يطلب مساعده من مكتب آخر ..
المهم ظلينا مع يوسف .. لليوم الثالث سوق المواد الغذائية ..
والاسعار كجملة نار نار .. قلت اذا باخذ القطعة بهالسعر كم ببيعها للزبون ( لاحظوا احسبها للزبون ومو موفية معاي ) فما بالكم لو اقول ابيعها لمحل ..
لكن المواد الغذائية هي بالاصل لاحظت فيها ارتفاع بالسعر عندهم ..
اليوم الرابع مالك ما دز لي احد وانا بقمة الاحباط ما اتصلت فيه .. وكل تحذيرات المنتدى في بالي وشغلي يا حلوه اقوم الصبح بدري من 9 الين ال6 فر مع يوسف لين غثيته من المشي ..
حتى وصل مرحلة .. اقوله السوق اللي هناك خل نشوفه .. هو من التعب او البرود او الكسل يقول .. البضاعة هناك مثل الي شفناها ماله داعي نروح
واقول بقلبي خوش خوش جاي الصين عشان كل شوي يقولي ماله داعي نشوف ...
المهم اليوم الخامس او السادس بعد ما شفت كل يوم سوق ومن ضمنهم سوق الاحذية ايضا .. وصلت مرحلة من الاحباط ...
لا سعر زين ولا يحزنون ( وفي الحلقة الجاية راح اقولكم ليش مافي سعر زين ولا يحزنون ) هنا فقط بتكلم عن اللي حصل معاي على السريع ..
وبدأت اغير التكتيك .. وزني نزل 2 كيلو بهال6 ايام .. اكل خفيف ومشي طول النهار .. وارد الفندق بروحي مقابل السي ان ان نص الكلام افهمه ونصه مادري ايش .. واللاب توب مو شغال على كيبل الفندق ( خلل بجهازي ) .. المهم طلبت غرفة بكمبيوتر .. ويزيدون السعر 40 ريممبي قلت ماشي بس بشوف شئ عربي .. وظليت بغرفة الكمبيوتر الى نهاية السفرة ..
صارت قومتي بدل الصبح صارت الظهر .. ومع اني مالي خلق اشوف لا سوق ولا شئ بس متحسف شلون انا بالصين وما اطلع ..
وادق على يوسف اقوله ودنا اي سوق يا شيخ .. والتغيير اللي حصل اني صرت اقوم من النوم متأخر .. بدل النشاط اللي كان ..
المهم اخير شئ قلت مبدهاش بأا على قولة المصريين انا جاي اشوف موضوع التصنيع ..
جا يوسف الظهر مادري الضحى قلت له استاذي مابي اطلع اليوم ولا مكان بس ابي منك شئ واحد
وقعدت اشرح له فكرة اريد تصنيعها .. وهي فكرة سخيفة وبسيطة ..
قطعة قماشي اضع فيها قطعة الكترونية وهكذا ..
قلت الحين اكيد بيقولي نشوف مصانع والمصانع قريبة ..
الا الاخ يفتح الجهاز اللي عندي بالغرفة .. ويدش على النت .. ويدش على موقع علي بابا ويقعد يدور فكرة شبيهة بفكرتي ما لقينا شئ
قلت له حبيبي انسى هذي وعطيته فكرة ثانية ..
وبرضو نت وموقع علي بابا وقعد الاخ يدور لين انا شفت شئ قريب من فكرتي قلت له هذي تمام اتصل بالمصنع
وهو مستحي ويحاول يقولي لا خل نشوف بعد وبارد جنني بصراحة .. الا ضغطت عليه قلت يا اخي مستحي تتصل اتصل ..
لدرجة قالي ترى يعرفون انجليزي اتصل انت ..
كنت بموت من القهر ..
المهم كلمهم صيني شرح لهم .. قالوا ممكن نعملها
وكان المصنع بشينزن ...
قلت بقلبي اذا طلعت من هالسفرة اني اشوف مصنع واشوف شلون يصنعون وكل الكلام اللي قرأته بالمنتدى بس هالمرة بشوفه بعيني .. اذا كل هذا صار شوف يا الله كسبنا خبرة ( اكسر على قلبي ) ..
المهم اليوم الثاني قلت له نروح شنزن رحنا بقطار مدته ساعتين وعاملين شئ جديد في شنزن مترو .. ومن نزلنا من القطار ركبنا المترو .. ووصلنا الى تقريبا قريب من المصنع ..
انا قلت الحين هالمصنع الزين .. الا عمارة محترمة وفيها مكاتب ودشينا عليهم كم موظف جالسين واستقبلنا شخص وجلسنا على طاولة وجاب له كشكول على اساس يكتب تصميمي .. المهم قعد يوسف يسولف وياه شوي .. وانتهى دور يوسف
وتخيلوا يا اخوان ظلينا عندهم تقريبا ساعة الاخ يوسف ما تكلم الا اول خمس دقايق وباقي الكلام بيني وبين المسؤول بالمصنع .. بالانجلش المكسر مني والمكسر من الصيني المسؤول .. وماشين شحلاتنا فاهمين على بعض ..
وبقلبي منقهر على هاليوسف وعلى مالك بعد .. قلت ماشي اقل شئ دلوني المصنع .. فيهم البركة ..
طبعا سعر المصنع قطعة ما تسوى لها 100 فلس يعني او ريال الاخ عطاني سعرها 3 دولارات تقريبا وانا اضحك ومحترق من داخل بس ماشي معاهم اشوف اخرتها وياهم ..
والقالب تكلفته 27 الف ريممبي .. وسعر مبالغ فيه جدا .. لان القطعة سخيفة وبسيطة ولو ادورها بالسوق بلقاها بس هوا الظاهر استغشمني على ابو عربي وشاف الحبيب اللي وياي لا يهش ولا ينش ولا يقول ثلث الثلاثة كام بس قاعد يتفرج وانا هات وخذ مع هالمسؤوول.
ام المهم طلعنا من المصنع وكانت ضيافتهم ماي حار .. لا تستغربون ضيافة غريبة بس عجبني والله شربته كله ههه.
طلعنا قلت له دام وصلنا شنزن ناخذ لفه
دخلنا مجمعين او ثلاثة كلها كمبيوتر وتلفونات وما شفت فرق كبير بالاسعار عن قوانزوا .. او بصراحة مالي نفس اسأل لان المترجم معاي ما يشجع اسأل
مثلا انا سائل على تلفون نوكيا معين في قوانزوا
اقوله اسأل هنا
يقول قريب من اللي بقوانزوا
ماشاءالله وانا جاي درب من الكويت عشان اسمع كلامك ولا اشوف بعيني ..
المهم انا نفسي محبط ومالي خلق ارادده وساعات كثيرة اطنشه واسأل بروحي اذا شفت شئ عجبني وبرضو الاسعار عادية مش مغرية للشراء ..
صارت الساعة 4 العصر رجعنا بنفس دربنا الى قوانزوا ورجعت فندقي ..
بجذي حطيت في بالي انتهى هدف رحلتي ..
كان اليوم السبت وكان حجزي للرجعة الجمعة .. قلت مافي جمعة بروحي مالي خلق نفسي .. وحدة وغربة واسعار غالية .. والمصيبة اللغة ..
والله يا جماعة لو اقولكم زوري راح من اللغة العربية .. قمت اكلم اهلي بالكويت كيف حالكم وماذا فعلتم .. لان المترجم ما يفهم الا جذي واصلا لغة عربية فصحى غلط
يعني اقوله ممكن نحصل الشئ الفلاني بالسعر الفلاني ..
يجاوب يقول مختلف
بالله مختلف هذي شنو معناتها ؟
معناتها يعني ( حسب ) او على حسب .. يعني يعتمد ..
بس هو مريح حاله يقول مختلف ..
ومن هاللون كثير ..
والضحك وين ..
اذكر مرة ماشي معاه وانا طبعا اتكلم فصحى ..
ورجاء لا احد يعلق على هالبدلية ... لول
المهم قلت له يا اخ يوسف
هل ركوب البأص سهل ام صعب التعلم عليه او شئ جذي عن الباصات ؟
المهم انا قلت بأص وبقلبي بموت من الضحك .. والاخ ما درى هي بأص صح ولا غلط ..
بس ترى معذور يا جماعة
القاموس مافيه كلمة باص لول
الشاهد
رحت يوم الاحد قدمت حجزي الى يوم الثلاثاء وهناك قابلت شخص سعودي
دردشت معاه شوي ..
واكتشفت بعد يومين من خلال اتصال تلفوني مع الاخ تركي .. ان ذاك الشخص اللي بالطيران الكيني هو نفسه الاخ تركي ..
هذي اول مصادفة ..
والمصادفة الثانية ..
دخلت موقع مستعمل ابحث عن عرب او احد عنده مترجم
الا يطلع لي شخص يقول انا اعطيك ارقام مترجمين وذكر الارقام ومن ضمنهم ذكر رقم الاخ مالك
قلت والله انشهر الاخ مالك ..
ويسار ويمين ويطلع هذا الشخص هو اخونا الرقة العظيمة ابو عايشه .. سبحان الله هو موجود بالمسافرين وما اشوفه الا بموقع مستعمل ............
بعد ما كنت ملتزم بتحذيرات المنتدى 100% .. انقلب الوضع 360 درجة .. لدرجة قمت اعاند اي شئ مكتوب في المنتدى ..
ماهو قصورا بالشباب .. لكن كانت التحذيرات بزيادة حبتين خاصة .. أنها تكررت ..
والواحد يظن انه داخل الى سوق حرامية مو دولة محترمة ..
ومن كثر ما قالوا لاتتعامل مع العرب صار الواحد رايح حاط في باله ان العرب محترفين نصب ..
المهم
صرت ما اشوف عربي الا اقعد واسولف وياه .. باقي يومين طنشت السوق .. بس قمت اجمع معلومات
مافي رقم تلفون عندي له علاقة بالصين الا اتصلت فيه ..
لو القى صراف بالشارع كنت راح اصرف من عنده لان مسألة التأكد من العملة بسيطة ولا هي ذاك الزود .. مع ان حتى البقالات اذا جيت تعطيهم فلوس يحطونها بالجهاز لكن ببساطة لو تشوف الورقة تقدر تفرق من خلال عدة طرق.
وقمت اضحك على نفسي يوم وصلت قوانزوا ولا كنت فاهم شئ ..
وللعلم اتصلت بالاخ كردت .. ثالث يوم اشكي له الحال ....... انه الاخ مالك مسوي حاله مدير مو فاضي لنا والاخ يوسف المترجم طلع عيني ببروده وكرهني في الصين ..
وللامانة اقول الاثنين ما شفت منهم شئ
لكن انا مو رايح الصين عشان اعمل علاقة اجتماعية
انا كنت ابي ناس ملحلحة تفهم ذكية لما تجي تقوله ابي سعلة معينة يوديك على طول السوق الزين واذا مايعرف يكون نشط وذكي ويقدر يوصلك لاقرب شئ لطلبك ..
وعاتبت الاخ مالك لما كان معي الاخ ابو عايشة ( الرقة العظيمة ) قلت انا زعلان جدا انك مشغول وما شفتك الا في بداية السفرة .. وقعد يعتذر واخلاقه عالية .. لكن بصراحة مرة ثانية ابي ادور شخص اخلاقه حتى لو مو عالية لكن يفيدني بالبزنز مو جاي اتعرف انا ..
ايه خلوني اطلع اللي بقلبي ..
طبعا كلامي يمكن يزعل اعضاء كثيريين لكن .. ما بدهاش بأا بصراحة ما بي احد يروح ويرجع محبط .. وبتقرير اللي جاي راح اكتب النصايح وايش اللي لازم يسوي الشخص عشان رحلته تكون مفيدة ...
المهم يوم الاثنين قابلت الاخ الرقة العظيمة وخذينا لفة بكم سوق .. وسألته نفس السؤال شلون الاسعار الخ الخ
الا كلامه نسخة طبق الاصل من كلامي ..
قال الاسعار مش مشجعة .. والفلاش ميموري هو الوحيد اللي شافه رخيص وانا شفته بعد رخيص وما يندرى شنو مسويين بلاوي داخلة
والضحك وين ..
قالي انه كان يصحى بدري ونشيط وبعدين صار مثلي يصحى على كيفه ...
واكلم الاخ تركي وكان توه راجع من ايو
شلون الاسعار يا اخوي تركي ..
الا كلامه نفس كلامنا وسبحان الله كان يصحى بدري بعدين فتر مثلنا قام يصحى على مهله ... الظهر
والاخوان موجودين معانا يأكدون كلامي ..
..
طيب شلون ايو يا اخوي تركي ..
الا يقول باختصار
اييوو سوق ابو رياليين ..
لكن قال الاكسسوارات الظاهر النسائية حسب ما فهمت قال فيها اشياء زينة ..
قلت بقلبي زين ما تعنيت لها ولا كان زاد الاحباط اكثر واكثر.
الشاهد يا شباب
اخر ايامي صارت بس سين جيم تحري كل ما اسأل احد وين الاسعار الحلوة وين الشغل الزين
واكتشفت انو 90% من العرب اللي هناك مدوجين مو فاهمين شئ ولا يعرفون لا اسعار ولا يحزنون وفاتحين مكاتب على قولة المصريين بيشتغلوا بكل حاجة .. ولا ينفعونك بأي حاجة ومو بس العرب اصلا العرب ابرك مليون مرة من الصينيين المسلمين .. هذولي صج اللي ضايعين ..
وكل ما تشوف احد تلقاه يفتي على كيفه وكلام فاضي وخرابيط .. ( ومحد فيهم متخصص ) ..........
المهم من ضمن ما عملت اتصلت بالاخ سلطان اللي تم ايقافه بالمنتدى .. وكان له موضوع اي استفسار من الصين .. وكان الرجل قمة بالاخلاق وتعامل راقي .. واعطاني بعض المعلومات المفيدة .. لكن لم اجد سر الطبخة عنده ايضا ولا وجدتها عند احد اساسا .. وطلع اصلا مافي طبخة طلع الخطأ مني انا .. وسأوضح كل هذا في تقريري التالي ..
لكن كانت هذه مناسبه اشكر الرجل عليها.
وكان من الناس اللي فعلا ارتحت بالحديث معهم واستفدت منهم جدا هو الاخ البحريني ... صاحب مكتب هناك وانا اخذت رقمه من تقرير الاخ السائح الهروي او الهراوي اللي كان تقريره عن الاثاث ..
المهم اتصلت فيه وتم تحديد موعد معه وللأمانة كان مفروض اجلس عنده نصف ساعة .. وجلس معي الرجل من 7 مساء الى 9 الا ربع مساء وانا طايح فيه بالاسئلة ولم اجد اجابات منطقة عند شخص اكثر مما لقيتها عند هذا الرجل .. وكان كلامه يذكرني بكلام اخونا ابو ضرار حتى اني شكيت يكون هو ابو ضرار .. لانه ضرب مثال ابو ضرار ذكر نفس المثال .. وكان عقلاني ومنطقي جدا واستفدت منه كثيرا .. وله مني كل الشكر ..
واتصلت بالاخ عمار وهو من طرف الاخ كردت ايضا وضيفني الاخ على شاهي .. وجلسنا ودردشنا شوي بالشغل وكان هدفي التعارف لما سيأتي مستقبلا مش اكثر وبعض الاسئلة ..
واليوم الاخير الثلاثاء هو يوم الرحلة اللي حصلت فيها عملية السرقة من الايراني لاخونا ابو عايشة ..
وسامحوني على الاخطاء الاملائية .. وكثرة الكلام لكن عندي بعض النصايح ساكتبها قريبا حتى يستفيد منها اي شخص يريد الذهاب الى الصين كأول زيارة له .. حتى لا يحصل معه ما حصل معي ..
وبس حبيت أأكد اللي يبي يروح على الكينية هي طائرة ممتازة ومافي اي شئ .. لكن فقط يخلي المكتب يعطيه ورقتين لصالة رجال الاعمال في دبي ورقة للذهاب وورقة للاياب .. وخليهم يضعون له خط تحت السطر اللي يعني انه مسموح له الدخول الى صالة رجال الاعمال .. لان بصراحة 7 ساعات مش شوية .. ولو تشوف الناس بره في الممرات يكسرون الخاطر ...
والاخوة اللي يدخنون مثلي الله يعينهم على الرجعة 9 ساعات تقريبا .. تصير ودك توصل بس عشان تدخن ..
وأي اسألة انا حاضر
وللعلم سأضع النصائح في رابط منفصل وسأضعه هنا باذن الله ...هنا في نفس الموضوع .. يعني اللي يبيهم يدور عليهم .. في موضوع منفصل او كرابط في هذا الموضوع.
بس عاد رجاء حار
استقبل أي شئ من التعليقات الا سالفة بأص ... هذي ياويله اللي يعلق عليها .. واللي يبي يعلق عليها او يضحك عاد اتحداه يتكلم اسبوعين فصحى من غيرا اخطاء ........
ونسيت اذكر شئ اعتقد انه هام ..
لاني كنت غاية في الاحباط رجعت اقرأ مواضيع الصين كلها وانا في الصين ..
ولقيت بعض الردود لامست الوضع اللي انا فيه تماما .. لبعض الاخوة والله لا اذكرهم بس اظن منهم الاخ اديب20 ويمكن برق الرياض او الاخ game .. لا اذكر بالضبط بس بجيب لكم باذن الله كلامهم تماما .. لاني عندما رأيت كلامهم .. قلت بالضبط 100% اللي مفروض اعمله المرة اللي جاية ..
والسلام ختام
يلامس الواقع وطبيعة اغلب البشر, بدون رتوش او ديكور
تسلم بارك الله فيك
ننتظر المزيد