1. أهم الاماكن بفينا :


2. بتشوف نفس الاماكن لانها عاليه جدا.


3. وفيه ناس تسوي استعراضات يني شحاذه بادب


4. بالنسبه للمواصلات المترو

السلام عليكم ورحمة الله وبركاته
مساكم الله بالخير جميعا يشرفني ان اضع بين ايديكم تفاصيل زيارتي الاولى للنمسا وهو ما طلبه مني اخوي
الغالي اخر الفرسان وكنت قد كتبت موضوعها في منتدى اخر من زمان وهاانا انقله لكم هنا .
الله يسلمكم من كل شر ابا اقولكم من طقطق الى سلام عليكم باسلوب على شكل سالفه والموضوع اللي باكتبه ان شاء الله وبحط فيه الصور بعدين لاني مشغول جدا هالايام .
حجزي كان على امسترادم لاني كنت ناوي اجلس فيها بالعوده كم يوم لكن ماكتب الله هالشي وصلت لامستردام وبدلت طياره وبعدين على فينا نزلت لفينا ما فيه جوازات ولا شي دخلت سيده من الطياره للشارع واخذت تاكسي من المطار الى فندق الماريوت بحوالي ثلاثين يورو واغلب سكان الفندق من السعوديه وفينا مدينه راقيه جدا واهلها محترمين والنقاب عادي بفينا كل الشوارع تقابل فيه السعوديينوالسعوديات بعبايتهن ولاحظت كثر المصريين فيها واكثرسواقين التكاسي مصريين مدرسين وبالصيف يكدون تكاسي فيه نظرات من بعض الناس وخصوصا الاطفال للعبايات لكن عادي جدا طنش .

أهم الاماكن بفينا :

1- قصر شمبرون :قصر كبير لملك وفيها حدائق وغابات خياليه تدخل من سور القصر مجانا وتتجول في ساحاته وحدائقه لكن نفس القصر بفلوس وما انصح احد يدخل له لان اغلبه اصنام وخرابيط مالها داعي عليك بالحدائق والنوافير اللي ورا القصر وفيه عربات تجرها الخيول بس غاليه اركب بالعربه الكبيره سعرها حلو 8 يورو أوفر من الصغيره ب30يورو وجزء من غابات القصر يوجد حديقة حيوانات الله يكرمكم لكنها عاديه الدخول بما يعادل 130 ريال وصغيره ما فيها زود .
2- براتر: مدينة الملاهي وهي عباره عن ملاهي صغيره لكنهم مكبرينا بالشوارع ومباعدين بين الالعاب حتى تكون كبيره .
3- برج فينا منه تشوف فينا اسمه (دون ناوبارك ) احس ماله داعي لانك لو ركبت لعبة العجله (الدائره الكبيره )

بتشوف نفس الاماكن لانها عاليه جدا.

4- سي قروتي : وهي عباره عن مغاره مثل هيت اللي بالرياض كان هتلر يصنع فيها الطيارات ايام الحرب العالميه الثانيه وما احد يدري عنه وهي بارده جدا فيها صقيع لدرجة انهم ياجرون بطانيات احجامم صغيره تلفها على جسمك عم البرد .
5-حديقة لكسمبورج : هذي احسن مكان بفينا تستاهل يوم كامل حديقه كبيره جدا تحس بجو الادغال والاشجار الكبيره
وبوسطها بحيره مليانه بط وبجع وانواع الطيور وتقدر تستاجر قارب مشحون على الكهرب او قارب يدوي وتتمشى بالبحيره وتطعم الطيور.
6- شارع الكارتنر : شارع تسوق طويل ومهوب صاحي واغلب المحلات مسويه تخفيضات وبضاعته افضل شي

وفيه ناس تسوي استعراضات يني شحاذه بادب

7- شارع ماريا هلفر اعتقد اسمه كذا قريب من الكارتنر بس بضاعته وسط ورخيص .
8- مدينة التسوق الشوبنق سيتي :مبنى من دورين كبير جدا والله يسر لي طريقه اروح له وارجع بسعر خيالي بس 15 ريال لان التاكسي لو يوديك بيطق 400 ريال بالراحه لانه برا فينا الطريقه كالتالي تسأل عن الاوبرا وهي في بداية شارع الكارتنر مقابلها مكتب الخطوط المصريه والسوريه اقطع الشارع واجلس عند مكتب الخطوط كل ساعه يجي باص من مدينة التسوق خاص بشركة ايكيا ومكتوب عليه ايكيا دعايه لون ازرق اركب معه يوديك مجانا وللعوده اول ما توصل اطلع للدور الاول واسأل اي موظف ايكيا عن تذكرة العوده ياشر لك على الكونتر اللي يبيعها قيمة التذكره يورو وربع والاطفال مجانا .

بالنسبه للمواصلات المترو

والمترو بفينا سهل جدا انا ما اعندي لغه والحمد لله مشيت اموري وصورت بالكميره طريقة استخدام المترو حتى يتعلمون اللي ما يعرفون له .اشتريت تذكرة لمدة اربع وعشرين ساعه قيمتها خمسه يورو بس ما دخلتها بجهاز العبور خليتهامع بالبوك واركب من مترو لمترو والى الان جديده ما استخدمتهابس ترا الشرطه عندهم يسوون تفتيش عند المترو احيانا يسألون عن التذكره مر من عندهم وخلك واثق لاتناظرهم ما يسألونك ولو ارتبكت سالو عنها .
اول ما توصل الفندق اطلب الخريطه وبتلاقي فيها خريطة المترو وخطوط المترو اربعة الوان ازرق واحمر وبر تقالي واسود وكل خط له اسم يعني الاحمر اسمه U1وهكذا .
عند الفندق يجون المصريين ويعطونك كروتهم يودونك رحلات وتمشي لكن لاتروح معهم داخل البلد مثل البرج والملاهي والشمبرون ونهر الدانوب ورح معهم للاماكن اللي برا فينا مثلا السي قروتي يقولك ب80 يورو يوديك واذا شديت معه نزل للسبعين والسعر المعقول 60 يورو مثلا انا اخذت تاكسي مصري والله انه حبوب وداني للسفاره اسجل الجواز والسي قروتي وحديقة لكسمبورج وجالس ينتظرني لاطعه عند الحديقه بس ب98 يورو لان ستين سي قروتي و12 للسفاره لان مبناهم الجديد بعيد نوعا ما عن وسط البلد و25 للحديقه وهذا هو المشوار الوحيد اللي ركبت فيه تاكسي غير المطار
بالنسبه للبرامج السياحيه القروبات غاليه نوعا ما .
وامر مهم جدا اذا وصلت للفندق حط بطاقتك الصراف بالسيفتي بوكس وخل معاك الفيزا عشان لو ضاعت محفظتك لا قدر الله يصير عندك سبير مجرد وجهة نظر شي ثاني خذ معك كاش لان بعض المحلات ما يحاسبون بالفيزا .
المساجد بفينا كثيره والنهار طويل جدا يمديك تروح لاي مشوار ببالك .
هذا عن فيننا باختصار :
الحجز بالقطار الى سالزبرج سهل لان كل نصف ساعه رحله والطريق روعه صوره خياليه سبحان الله العظيم
سكنت بفدق ريسانس موقعه حلو لانه خطوات عن محطة القطار وجمبه مسجد جامع ومقهى انترنت بس الفندق للاسف خايس غرفه ولا بريال لكن المثل يقول كل دقه بتعلمومه ......
سالزبورج مدينه صغيره هاديه وحلوه ولاحظت ان شبابها مثل شبابنا بالسيارات يطيحون ويغيرون ملامح السيارات والنقاب فيها عادي جدا بس بعض القروبات اللي تجي لسالزبرج تحس بنظراتهم بس عادي ما عليك منهم المشي حلو حلو وممتع بسالزبرج صحيح الجو مشمس اغلب الاوقات لكن الاشجار كبيره امش بظلالها البلد القديم فيه شارع تسوق حلو والجلوس على النهر ممتع جدا وفي سالزبرج تاجير سياكل تلقى بمحطة القطار وعند البلده القديمه والايجار يبدا من ساعه الى شهروساعرهم معقوله القلعه اللي اعلى سالزبرج توصل لها من السوق والتاكسي لن تحتاجه في سالزبرج ابدا
يوجد حيقه فيها انواع الورود وتنسيقها حلو عند فندق كراون بلازا وتقدر تروح لميونخ من سالزبرج وترجع بنفس اليوم بس لاتنسى جوازك خله معك لانه قبل توصل ميونخ يفتشون الشرطه عن الجوازات .
هذا باختصار جدا وبعد ما احمض الافلام ان شاء الله ويصير عندي فراغ باكتب موضوع بالصور والشرح الكامل اذا الله يسر ذلك .
بالنسبه للمواد الغذائيه انصح ان الواحد ياخذ معه اكله من هنا اوفر له واذا بغيت تشتري كوكا وماء انتبه تشتري من الاكشاك لانها غاليه جدا اسأل عن سوبر ماركت كبير تلقا كل شي سعره معقول ولاتنسى تطلب ريسيت من كل محل تشتري منه واذا رجعت بالسلامه تروح لمكتب الاسترداد بالخبر ويرجعون لك فلوسك من الضرائب ترى ابي الفايده للجميع ماهو داعيه للمكتب والله .
اشهر محلات التسوق بالنمسا وميونخ C&Aومحلات H M اسعارهم حلوه وبضاعتهم ممتازه
واذا تبي اجر الدنيا والاخره خذ معك مصاحف او كتيبات دينيه وحطها بالمساجد اللي تصلي بها خصوصا المسجد اللي بسالزبرج صليت فيه الجمعه عدد المصاحف فيه قليل جدا .
وانصح بعد ان تاخذ معك شنطه كبيره فاضيه عشان تحط فيها مشترواتك وما تتوهق.
بالنسبه لافضل خطوط اعتقد ان السويسريه حلوه لان مطار زيوريخ يعتبر موزع للعالم مثل امسترادم
اما انا رحت على الهولنديه وطيراتها الخطوط الطويله حلوه لكن داخل اوروبا صغيره وضيقه بس عندهم خدمه حلوه
وانت راجع على البحرين مثلا يوصلونك الدمام او الخبر او الجبيل على سياره خاصه مجانا
هذي اسماء فنادق بفينا سجلت اسمائها كلها في محيط شارع الكارتنروحواليه :
1- ماريوت
2-راديسون ساس ملاصق للماريوت
3-هلتون لكنه تحت الترميم الان
4-pension arenberg
5-am schubertring
6-romischer kaiser
7- imbrial
8-grand hotel wien
9-بريستول
10-kaiserin elisabethوهذا على الكارتنر
اما امطاعم اللي يقولو انها يعني مضمونه :
مطعم لورد جمب الماريوت ويقولو انه لبناني بس اللي يشتغلو فيه مصريين
وطعم الكردي حوالين الماريوت مصري
وفيه كشك بملاهي براتر اسمه المرسي مصري فلافل عنده لمحبي الطعميه
واذا كنت مشتهي رز تحصل الجوامع الاسلاميه داخلها مطعم وحلاق وخياط وهذي لاحظتها بفينا وسالزبرج وميونخ
اما الفنادق في سالزبرج:
1-gaststatten
2- بريستول موقعه خرافي وشكله حلو مره
3-كراون بلازا على الشارع العام واغلب سكانه خليجيين
4-altstadt خمس نجوم بوسط السوق
5-stienمطل على النهر
6-hotel europaعلى الشارع العام مقابل بوابة محطة القطار
7-austrotel hotelمقبال الحديقه
8-vier jahreszeiten 200متر عن الشارع العام
9-hotel stadtkrugبين الشارع العام والنهر لكنه صغير
10-hotel scherer
11-hotel sacher salzburg وهذا احلى واحد خمس نجوم مطل على النهر والبلده القديمه
12- ريسانس اللي سكنت فيه بس غرفه زفت والجامع اللي قريب منه فيه مطعم حلو خلف الريسانس17aرقم المبنى اللي فيه الجامع
تعقيب بسيط للمحافظة على الجوازات خصوصا اللي معه جوازرات كثيره اول ما توصل الفندق اطلب منهم تصوير الجواز ويكتبون على الصوره ان هذا الشخص مقيم لدينا وجوازاتك حطها بالامانات وريح بالك لكن للتنقل بين الدول يلزم الجواز .
اتمنى يعجبكم الموضوع وللاسف ما فيه صور فالعذر والسموحة