مشكور على الوصف
وانشالله انك استانست بالرحله
امتعتنا بالتقرير
بس اخوى الصور مب طالعه؟؟
حاول ما عليك امر تنزلها من موقع ثانى

ناصر أبو ابراهيم
أخي الفاضل / ناصر
أشكركم على هذا التقرير الممتع والذي تجولنا معك بقطر ورأيناها هذه المرة من خلالكم .. وملاحظاتكم ، وكنا نتمنى رؤياها من خلال صوركم .. إلا أنها غير ظاهرة ..لطفاً .. أعد تحميلها مرة أخرى .. حتى تزداد متعتنا .. وفقكم الله للخير..

سرد جميل الله يعطيك الف عافية...الصور ماتطلع عندي,,

ماشاء الله
وربي سعدت بهذا التقرير الجميل
لكن للاسف الصور مثل ماذكر الاخوان غير ظاهرة

.
ولا صورة طالعه في الموضوع

1. صورة لصالة التزلج اللي فيه:


2. صورة للطريق وصور للقلعة:


3. صور من فندق بسم الله:


4. صور من سوق الطيور:


5. صورتين من داخل السوق:


6. من طريق الرجعة:

رحلتي إلى قطر 24-26/12/2007
السلام عليكم ورحمة الله وبركاته
أولا أحب أن أشكر الاخ رجل شرقي على الدليل الذي أصدره عن دولة قطر.
خلال أيام العيد فكرت وين أروح بالاسبوع الباقي من الاجازة فخطرت قطر ببالي فعرضت الفكرة على صاحبي فأيد الفكرة.
طلعت من المدينة المنورة ظهر الاحد ووصلت للهفوف الساعة الواحدة مساءاً واستأجرنا بفندق جميل اسمه فندق الهفوف شارع 13 اخذنا غرفة مزدوجة ب 350 ريال كان الفندق جميل وهادئ بتنا فيه ليلتنا.
صباح الاثنين مشينا إلى قطر 160 كلم من الهفوف إلى سلوى وتقريبا 80كلم من ابو سمرة للدوحة وصلنا الحدود وخلصنا الإجراءات وحنا بالسيارة صلينا بحدود قطر الظهر والعصر.

• قبل فترة اشتريت جوال نوكيا 6110 نافيقيتور بصراحة ما احتجت أي سؤال من أحد عشان أي وصف بس ادخل فيه اسم المحل اللي ابغاه سواء كان فندق أو سوق أو مطعم أو متحف وعلى طول يوصلني هالوليدة بالضبط للمكان اللي اطلبه.

حددت فندق اسمه شيزان بشارع احمد بن علي 99 الدوحة من خلال دليل الاخ رجل شرقي وادخلنا اسمة بالجوال فدلنا على الفندق. كان الفندق أقل من متوسط ذو ثلاثة نجوم ما يستحق وحدة منها لكن كنا تعبانين وكان فيه بوفيه مفتوح لا باس فيه عشان كذا قررنا نتغدى وننام. صحينا الساعة اربع العصر واخذنا لفه على الكورنيش ومرينا سوق شعبي قلنا لفة ناخذ فيه يوم دخلنا واذا قرية كاملة داخل الدوحة انبسطنا فيها بالمرة دخلنا محل يبيع سيوف قديمة وغالية وهذي بعض صورها:
لقينا فندق اسمه بسم الله جميل جدا بوسط السوق اللي كله محلات شعبية من كل شكل, تعشينا عند وحدة تسوي اكلات شعبية اسمها ام احمد تبيع جريش ومرقوق وهريس ومكبوس ومخبوط أو خبيطة المهم أن الاكل عندها من أجمل الاكل اللي أكلناه في قطر.
طلعنا من السوق ومرينا المنطقة الجديدة اللي فيها ناطحات السحب الجديدة, لقينا مول يوم دخلنا مواقفه كانت دورين ما لقينا موقف واحد فاضي ما ادري وش الزحمة هذي على السوق ملينا من البحث عن موقف وطلعنا ومع طلعتنا لقينا واحد طالع وقفنا مكانه, دخلنا السوق اللي طلع اسمه سيتي سنتر ذكرني بالستي سنتر بدبي مريته عام 1999 يوما كان من اشهر ما في دبي وكان زحمة مثل كذا, لكن مريت دبي قبل فترة فإذا كلها مولات مثل ذا وأكبر فصار ماله قيمة ومصير هذا مثله.

صورة لصالة التزلج اللي فيه:

كان فيه عرض بهلواني بالسوق شفنا يمكن اخر خمس دقايق منه وخلص اخذنا لنا لفتين بالسوق وطلعنا, السوق كله محلات ملابس ومستلزمات رجاليه ونسائة ماركات وسوق هايبر مادري ويش بنده أو كارفور أو واحد يشبهلهن وملاهي داخلية ومطاعم ومن هالشغلات طلعنا من السوق على فندقنا.
الصباح طلعنا من الفندق ورحنا لفندق بسم الله اخذنا غرفة فيه وحطينا شناطنا وما قعدنا كنا مقررين اننا ناخذ لفة على قطر طلعنا من شمال الدوحة على الوعب والمدن الشمالية وصلنا إلى مدينة الشمال ومنها إلى ام ضلوف ووصلنا لقلعة عثمانية

صورة للطريق وصور للقلعة:

نسيت اسمها يبدو لي أنها من عهد إبراهيم باشا يوم اسقط الدولة السعودية الاولى عام 1233 هجري لانه ارسل حملات على امارات الدولة السعودية وكانت قطر والامارات وعمان من ضمنها حيث تم الامر بإيعاز من البريطانيين حيث كانوا يستخدمون السواحل هذي بطريقهم للهند وبعد ما اصبحت امارات تابعة للدولة السعودية يبدوا انهم واجهوا بعض الصعوبة في التعامل مع امراء المنطقة الجدد والبريطانيين معروف عنهم دهاءهم السياسي الذي جعلهم يوعزون للعثمانيين تطهير المناطق دون ادنى تدخل منهم.
وين رحت انا نواصل رحلتنا المهم دخلنا القلعة اللي يبدو انه مبنية بالكامل من جديد مثل ما يظهر بمعرض الصور الموجود فيها. صحيح انه ما فيها حراسة أو غيره الا عامل باكستاني نشمي يعزم كل من جا القلعة جزاه الله خير قال اسوي لكم شاهي وافقنا له وشربناه بعد ما لفينا بالقلعة وبصراحة ان شغلها حلوة وشكلها حلو خاصة للي يحب التصوير وفيه كم صورة اخذتها فيها, وبصراحة لكن شغل القطريين ذا احسن من أنهم يصكون القلعة. عشان ما فيه احد يديرها.
صور دكة الباكستاني:
النعناع
طلعنا من القلعة ونزلنا على دخان وغيرها من المناطق اللي تبدو انها ابار نفط أو غاز يعني مناطق صناعية
الين وصلنا طريق 5 جنوب مفرق ام سعيد عبينا بنزين من محطة عند المفرق وعلى فكرة عندهم نوعين بنزين سوبر ب80ه وممتاز ب70ه عبينا ورحنا ل ام سعيد اللي فيها شغل كثير فيه كورنيش جنوبها بس ما ادري هو عام والا خاص لانه مكتوب على اللوحات بييتش بالانقليزي دون اسم شيء غيره توقعت انه خاص فرحنا لأم سعيد. ومنها طلعنا للدوحة.
من الجولة ذي ما شفت بقطر نفود أو جبال الجغرافيا اللي مريت عليها عبارة عن حزوم ومشكلت ارضها وعرة بالحيل مثل ارض الصمان تكسر اليسارة وما تقدر تمسي وسطها الا بسيارة رفيعة وعشان كذا الجيوب القطرية رفيعة تلقى الجيب بالعادة رفيع بالحيل وفوق كذا الكفرات بالون يرفعن السيارة زيادة. وفوق كذا يبدو انهم مثلنا السنة ذي ما مطروا ابدا لان الارض مغبرة وما فيها أي ربيع عسى الله يغيثنا والمسلمين اجمعين.
رجعنا للدوحة ودخلنا بالوليدة مطعم اسمه شاطر عباس ووصلنا لبابه, المطعم ايراني نظيف لكنه غالي واكله وسط ما عنده مميز الا الرز والباقي خاصة المشويات يدحاها من هالتتبيلات المبالغ فيها اللي تخلي اللحم ماله طعم ما تذوق لحم بس تذوق التتبيلة وفوق كذا التتبيل مهو مميز أكثره صلصة. كان جمب المطعم سوق ما ادري وش اسمه صلينا فيه المغرب والعشاء ورجعنا لفندقنا اخذنا لنا راحة شوي ونزلنا بعدها للسوق الشعبي سوق واقف اللي فيه فندقنا, والسوق ذا ما تمل من الجلسة فيه, قعدنا عند ام احمد نشرب من هالشواهي اللي تسويها شي بالحليب وشي حليب بالزنجبيل وسادة ومع النعناع. ومن الاشياء اللي يلاحظها الواحد إذا جلس بالسوق اكثر من مرة ان الوجيه تتكرر عليك فيبدوا انه مكان يتردد عليه القطريين بصفة مستمرة لاني شفت واحد تعشا امس عند ام احمد والليلة تعشا عند ام عبد العزيز جارة ام احمد. الزبدة انه اللي يجي لقطر وما يمر سوق واقف يعد روحه ما جاء قطر.

صور من فندق بسم الله:

بعد ما جلسنا لنا ساعة بجلسة ام احمد وتقهوينا صحصحنا شوي وقلنا نروح للسيتي سنتر عشان نشوف العرض من بدايته وقلنا للوليدة اللي معنا ودنا للستي سنتر وما قصر وصلنا للسوق اللي ما ياخذ غير ما به من السيارات, دخلنا السوق لكن ضيعنا مكان العرض وبعد لفلفة ما لقينا شي ما ادري هم خلصوا قبل نصل والا ما سووا عرض اليوم المهم مريت محل اضن اسمه شومارت مسوي تخفيضات وشريت من عنده بعض الاغراض.

صور من سوق الطيور:

رجعنا من السوق ومرينا الفندق وقررنا ان نتعشى بمطعم جنب ماكدونالد اللي بدوار رمادا قريب المطار اسمه البتراء. دخلنا له يبيع فلا فل وفول وشاورما ما اعجبنا لا هو ولا المطعم الهندي اللي جنبه فاقترح خويي نتعشى بالماكدونالد وفعلا رحنا له وقلنا الشكوى لله وتعشينا عنده لانه كان عنده حركة لان شكل المطعم هذا يجهز الطلب قبل يطلبه احد فتلقى الطلب اللي طلبته بارد وماله طعم بالعادة, لكن الحمد لله كان الاكل طيب.
شفنا على الكورنيش ساحة داخل البحر يبدوا انها لتصوير المنطقة الجديدة المقابلة جلسنا فيها وسوينا لنا شاهي كانت الجلسة حلوة لكن كان مهب الهوا بارد شوي وأخذت منها صور مشي حالك ومريت من الصبح بكرة وصورتها:
رجعنا للفندق اخيرا للنوم وكنا ما نشوف الارض من التعب.
صحينا الساعة 10 أو 11 تقريبا وطالعنا مع الشباك فاذا باب دكان ام عبدالعزيز مفتوح قلنا تمام لعلنا نلقى عندها شيء للفطور, لكن للأسف كان العامل يرتب وقال انهم ما يفتحون الا بعد المغرب.

صورتين من داخل السوق:

قررنا اننا نمشي من قطر ضفينا عفشنا وحاولنا نمر المعارض فاذا بكثير من المحلات تبند على قولة اخواننا القطريين يعني تغلق ابوابها بعد الظهر وما تفتحها الا بعد العصر قلنا أجل نتوكل على الله مسكنا الخط الساعة وحدة تقريبا فيوم تعدينا اشارة رمادا فاذا هذا مطعم كريب أوي يلوح لنا لاننا من كثر المدح فيه قعدنا ندور عليه قبل امس لين تعبنا وما لقيناه عاد يوم شفناه قلنا لا بد نمر عليه وفعلا تغدينا عنده وبصراحة الاكل عادي و اسعاره مبالغ فيها وديكوره جميل جدا. على سبيل المثال كاس العصير المشكل ب 20 ريال؟ المهم طلع حسابنا 130 ريال.
تغدينا ولله الحمد والشكر ومشينا الساعة 2 طلعنا من قطر بحدود الساعة اربع بحفظ الله ورعايته.

من طريق الرجعة:

من الملاحظ أن الاعمال بالبلد جارية على اشدها فعلى سبيل المثال الطريق الرئيس اللي جاي من السعودية اربعة مزدوج بكل طريق أربع مسارات لكنه مقفل من اوله لاخره بسبب اعمال الانشاء بالطريق. صفوف سيارت النقل الكبيرة بالالاف دون مبالغة فمن حب ان يشوف قطر بعد اكتمال البناء يصبر خمس سنوات على اقل تقدير عشان يشوف بلد مختلف تماما عما هو عليه الان.
كانت هذي لمحة عن رحلتي لقطر في اجازة عيد الاضحى عام 1428ه أحببت عرضها لمن أراد الاستفادة.
أسأل الله التوفيق لاهل قطر وأنه يجعل النهضة هذي عونا لهم على الطاعة
ويسدد أهلها لما فيه الخير لهم وللمسلمين .
والسلام عليكم ورحمة لله وبركاته.

MiSS DoHa
شكرا اخوي على المرور والحمد لله استانست بالرحلة
والصور في البوم الصور الخاص فيني نازلة لكني اخطأت في الربط وان شاء الله انها تظهر بالرد السابق

qatr
أشكركم أنا على مروركم وبصراحة موضوعي هذا ما هو الا رد بسيط لهذا المنتدى العظيم والذي لا استطيع ان اوفيه حقه وما تقريري هذا الا رد بسيط له
والصور ان شاء الله تكون ظهرت بالرد السابق والا سوف اضع رابط البوام الصور الخاص بالرحلة

MEDAN
حياك الله اخي وشكرا على المرور