احلا انا اول واحد يرد
المهم يا اخوان ترى المواضيع في هذا المنتدى تعتبر مراجع يحتاج اليها كل مسافر
يعني ما يهم التاريخ كان قديم او جديد

حياك الله اخوي راكان
وفي انتظار تقريرك

الله يحييك اخوي نمرو وتشرفنا بهالطلة وابشر بالتقرير

السلام عليكم
اليوم ابتكلم عن بداية الفكرة والحجوزات
بدأت الفكرة هذي منذ مبطي يعني من زمان وتبلورت الفكرة ( ياسلام على تبلورت) المهم بعد ما
تبلورت الفكرة في مخي قررنا انا وخويي ( بعدين تعرفونه ) قررنا ان السفر يكون في شهر جون 2004
مدري اضنه يوافق شهر 4/ 1425ه وكانت الخطة انا نروح لملقا ونلف اللى حولها ومنها الى غرناطة
ومنها الى قرطبة ثم الى اشبيليا ثم نرجع الى ملقا مروراً بالجزيرة الخضراء وطريف وجبل طارق ثم الى
ملقا مره اخرى ثم الى باريس 3 ايام ثم العودة الى الرياض قالت المدام طيب وش بنروح عليه ؟ قلت نروح
على سياكل اكيد على الطيارة قالت روقنا بس عن التريقة الا بس وش الخطوط الى بنروح عليها قلت
قلت نشوف الاسعار المهم دورنا على الخطوط اللي تروح ملقا ولقينا السعودية دايركت بس غالية
بخمستلاف وزود او الفرنسيية وتمر باريس او السويسرية وتمر زيورخ قلنا الا ناخذ وحدة من ذولي وننزل
في ديرتهم كم يوم فرصة حلوة المهم لقينا الاسعار اول شي كانت غالية حول اسعار السعودية وهذي الاسعار
طبعاً من النت ومريت كم مكتب سفريات لقيتها غالية رحت اسأل وادور مريت مكتب اعرف فيه واحد
عطاني الفرنسية باربعتلاف وستمية 4600ريال قلت ماش غالية قال انا ابدور لك واشوف قلت دور وانا
بتصل عليك واروح لواحد ثاني اعرفه (يا كثر اللي اعرفهم ) وقال السويسرية باربعة وثلاثمية 4300ريال
قلت يارجال دور لنا خصم اتصل على مكتب السويسرية وقعد يكلمهم ربع ساعة ثم قال اخر سعر عطونياه
0ريال قلت ممتاز اجل ابكلم خويي الاول اعلمه اني لقيت طيران يوم كلمته قال لي تعال الحين
هالدقيقة ( يقصد الان وحالا ) قلت ليه عسى ما شر قال لقيت لك الفرنسية ب2700 قلت 2700 روبية
قال انطم وتعال بغيت ازعل وما اروح لة واخذ السويسرية ب4300 عناد عشان اقهره بس تعوذت من الشيطان
وانا اركض له قلت يالله عطني التذاكر الحين بس تراني ابغى اربع ليالي في باريس في الرجعة اتصل فيهم
قالو بتزيد عليك التذكر 400 ريال للشخص قلت ما يخالف طبعاً ال400 ريال هذي حق التغيير من رحلة الى
اخرى عشان اقدر اجلس في باريس وهم يروحون للرياض ما ابغاهم يقعدون 4ايام عشاني
خلهم يروحون وبعدين يرسلون لي طيارة تاخذني بعد 3 ايام
الرجال قص التذاكر وعطانياها والحجز اوكيه وتمام والحين جينا في مشكلة حجز الفنادق ولقيت المكاتب
مايدرون وين الله حاطهم ورحت ابحث على النت ومن موقع لموقع واحدد لي
مجموعة فنادق واروح للمكتب قلت احجز لي من هالمجموعة وحددت له بعض الفنادق الي توقعت انها
جيدة وطبعا الزينات كثير بس انا كنت ادور على الاسعار الرخيصة وتكون الفنادق لاباس لان الفنادق اي
شي يمشي الحال عشان حنا بنتمشى طول النهار ونرجع ننام ونطلع الصباح بدري
اهم شي يكون نظيف وفطورهم زين يعني الفندق ما رايح نستمتع في فخامته لو كان فخم فحرام ان الواحد
ياخذ شي غالي الا عاد اذا كان مريش هذا غير المهم كنا نبغى نحجز فنادق لاول يومين او ثلاثة والباقي
نحجزه من هناك يعني الديرة اللي تعجبنا نحجز فيها قد ما نبغا واللي ما تعجبنا نمرها وحنا ماشين ,
وبكذا نوفر وقت وخساير ما لها داعي حجزنا اربع ليالي في تورمولينوس تبعد عن مطار ملقا اقل من 10 كيلو في
فندق البينار وكان سعره 360 ريال لليله تقريباً وكانت المحطة التالية غرناطة وقلت لازم احاول قدر
المستطاع ان الفندق يكون قريب من قصر الحمراء عشان اقدر اروح للقصر في اي وقت وارجع متى ما
بغيت المهم المكاتب مثل ما سبق وقلنا داجين وفي رواية مفلين وقال اخر ما عندهم سالفة وسألت في
المنتدى وما قصرو الشباب جزاهم الله خير عطوني معلومات وافية وثمينة بس قلت ياولد ليش ما تبحث في
النت اكثر واكثر يمكن تلقى شي ورحت اقلب النت تقليب وافلفل عناوين الفنادق الين لقيت فندق الكساريز
كان مستخبي المهم عنوانه يدل على انه هو اقرب فندق رحت للمكتب وعطيتهم اسمة وحجزولي فيه 3
ليالي وصار عندي حجز 7 ايام وباقي 8 ايام في اسبانيا احجزها من هناك حسب نصيحة اخوي الشاب الله
يعافيه وباقي ليلتين في باريس قلت للمكتب دورلي فندق حليو ورخيص وتراني ما ابغا فخامة ولا شي انا
ابطلع الصباح بدري ومانيب راجع الا العشاء وانوم على طول بس اهم شي يكون نظيف دور قال مافيه اقل
من600 الى800 ريال قلت لا ما يمشي الحال ورحت ابحث في النت ولقيت فنيدق نجمتين الصور حقته في
الموقع تدل انه حليو وقيمته 370 ريال واخذت اسمه ورحت لراعي المكتب وحجز لي فيه وبكذا انتهينا من
حجوزات الفنادق والطيران بس باقي مشكلة ايجار االسيارة في اسبانيا لانه حسب نصيحة الاخ الشاب ان
استئجار سيارة اوفر واريح من التكاسي والباصات .... تعبت خلاص
نواصل ان شاء الله في وقت آخر عن ايجار السيارة وما بعدها

و عليكم السلام و رحمة الله و بركاته
هلا و الله و غلا
و الحمد لله و بعد صبر عامين بنشوف موضوعك إن شاء الله
نتمنى منك ذكر جميع التفاصيل في الموضوع إن شاء الله
و راح تكون لنا ردود تفصيلية إن شاء الله
تحياتي

ما شاء عليك اخوي راكان اسلوب ولا اروع
واصل في انتظارك

السلام عليكم
يا هلا ومرحبا اخوي الشاب اسفرت وانورت يا حي هالطلة
.
.
.
هلا والله اخوي نمرو منور يالغالي وما عليك زود وهذا من ذوقك
.
.
.
بواصل ان شاء الله بس بالتقسيط المريح (والله من قل الهمة)

متابع بشغف ..
أسلوب أكثر من رائع ما شاء الله عليك ..
تكفى كمل ..

السلام عليكم
يا هلا وغلا اخوي الاشبيلي ابشر بسعدك بكمل اليوم ان شاء الله
شرفني مرورك