وان غضب مجنون ليلي
اتيت الديار ديار جاكا ....اقبل ذا الجدار وذا الجدار ...
وحب الديار سكن قلبي وحب من سكن الديار
قبل نسنتر خلونا نتفق علي شي عشان ما نزعل من بعض
وتوصل الامور للشرطه ومحاكم وطلبات ..
وهات الرجال وود الرجال
الشباب اللي بيجون مصفين الطبلون
ويقولون وش محببكم بديره الشغالات ....
الظاهر ما عمركم شفتوا خير
برد عليهم :تراها ديره شغالات فخلوها لنا الله لا يهينكم
وعساني اسافر يوم ماالقي مخلوق فيها غير اهلها
للعلم
جوازي مختم عليه من هلديار
..تشيكوسلوفاكيا ..بريطانيا ..سويسرا ..المغرب ..مصر ..
سوريا ..لبنان ..الامارات ..الفلبين ..ماليزيا..
وطبعا ...اندونيسيا
وكنت قبل فتره طويله
اشوف مواضيع الشباب بالنت عن اندونيسيا وتولعهم فيها
واضحك عليهم وهذا بلا ابوك يا عقاب .....
تطنزت فيهم ...والطنزه تلحق
في اول وثاني سفره واخر سفره الوضع دايم
طبيعي
@@المشكله @@
..انك عارف كل الاوضاع ....
اذا جيت تبرمج لرحله جديده وترتب لها ...
تاخذ معلومات عن الديره اللي بتروحها وترتب كل الامور
ويوم تطمر لمكتب الحجز
تقل يخمك سوال ؟؟
مجرد سوال بس لموظف الحجز ...
في حجز لجاكرتا ؟؟
يجاوبك : اي فيه
تقول له : عندك واحد نفر وصلحه ...
ولا تدري الا انت مسنتر بمطار
سوكارنوا هاتو
لا يجي واحد مطفي النور يقول سحر
اقول لك من 1417ه
وسعر الصرف يومها كان 260 الف روبيه للميه دولار وانا اروح للديره
ولا عمري شفت هلسوالف
بس هذا السحر الحلال فخلونا بسحرنا مسحورين
للنوعيه هذي من الشباب
يرحم والدي اثنين عقبوكم
اذا لكم راي ومو عاجبتكم الديره بس من اسمها
فروحوا للي تبون ولا رجعتوا من سفركم
ابشروا بهديه نزين لكم احلي تقرير لرحلتكم
واذا اقنعتوا عشره اشخاص معكم بان اندونيسيا وع
فمع التقرير بنعطيكم احلي بوسه
ما طاح من النجوم خف من السماء
هذاالتقرير بيكون مقسم لقسمين
راح اكرر فيه ما كتيته بموضوعي السابق الجميله والوحش
عن اهم المعلومات المفيده للزوار الجدد للعمه من طقطق لسلام عليكم
واغلب الصور اللي فيه بتكون منتقاه من تقارير وتوجيهات اللي سبقونا للعمه
ومن ارشاداتهم وتوجيهاتهم فجزاهم الله خير علي جهدهم
واستميحهم باستخدام صورهم وترتيبها
بيكون عن رحلتي في اغسطس 2008
مع رجال شرواكم تعرفنا عليهم في الرحله
وهذولا ومقالبهم وخط سير الرحله
بنعرفه في الجزء الثاني واللاحق من التقرير
@@تعريف بانودنيسيا الموقع والخطوط والتضاريس وخلافه@@
مصدر المعلومات اسلام اون لاين
الموقع: في جنوب شرق آسيا.
المساحة: 2 مليون كم2،
وتتكون من 33 مقاطعة.
العاصمة: جاكرتا.
العملة الرسمية: روبية إندونيسية.
اللغة الرسمية: الإندونيسية.
عدد السكان: 242 مليون نسمة،
ويمثل المسلمون 88% والبروتستنت 5% والكاثوليك 3% والبوذية 1%.
ويُعَدّ الجاويون أصحاب العرق السائد
بنسبة 45% والسندان 14% والمادور 8% والملايو 8%، والنسبة الباقية أعراق أخرى،
وذلك وفق إحصائيات عام 2006.
الأنشطة الاقتصادية:
تعتمد على تصدير
البترول والغاز الطبيعي والمطاط والمنسوجات والأخشاب
وتستورد الآلات والكيماويات ومواد الغذاء.
الاستقلال: استقلت عن هولندا عام 1949م
الطقس وهذا مصدره من راسي
اذا طلعت منطقه مرتفعه
برد شوي يعني تقول 20/18 درجه في اعلي درجاتها ليلا
ولا جيت مدينه ساحليه فالجو فيه شويه رطوبه
والمطر يزيد وينقص حسب الموسم وفصول السنه
طبيعه الماسات والشيويات ((السكان ))
شف هلصوره تكفي عن الف كلمه يالبي قلب هلضحكه
@@صور مختلطه بلاتركيز لعاصمه البلاد@@
جاكرتا القبيحه والجميله
والي ماودنا نشوفها لكنها هي كما هي
بجمالها وقبحها
راضي فيك بكل علاتك وابيك
الصوره القادمه خليط من ازقه وشوارع جاكرتا
لكن لكي لا تنصدم ويصدمك راعي ليموزين >>رجعنا للبثاره
هذه جاكرتا التي نحبها بماشيتها
((لايروح بالك بعيد مافي دبش تمشي بالشارع ))
((ماشيت = زحمه سير))
بقرف احيائها الشعبيه
بضحكه من لم يعرف الضحك في حياته
الشعب الاندونيسي شعب الابتسامه
وان كان الفقر يذبحهم من الوريد للوريد
@@وجاكرتا مدينه ناطحات السحاب @@
@@وقلب من لا قلب له @@
عمله البلد الرسميه هي الروبيه الاندونيسيه
واحد يسال يقول وش يكفين باليوم من قروشهم
وهذا سوال يبيله جلسه
شف وانااخوك
مثلا
الخمسه الاف روبيه
هذي تفتح فيها عداد التكسي
مهب كل التكاسي بعضها باربع الاف وبعضها باكثر
بس الغالبيه من التكاسي تفتح عدادها اول ما تركب بخمسه الاف روبيه
حلو
والعشره الاف
دربها درب
العشرين الف
يقضون الحاجه وقت الزنقات والمقاضي
اما الخمسين والميه الف
فهذولي الورقتين الكبار في عملتهم
واكبر مشوار بالتكسي في زحمه جاكرتا
ماراح ياصل الخمسين الف روبيه
الا اذا انت كاشت بالتكسي
عموما وباختصار الديره غلت شوى
والميزانيه الافضل فيها حسب رايي الخاص هي
0دولا في اليوم
ممكن تنقص يوم وتزيد يوم وحسب عدد المرافقين
نقطه مهمه لي ما يعرف يتعامل بعملتهم
شف وانااخوك
كل ريال = 2350روبيه
يعني لا قلت لك مثلا بالتقرير اخذنا
فيلا بقيمه 470000 اربع ميه وسبعين الف روبيه
نقسم هلمبلغ علي 470000/2350=200ريال
طبعا قيمه الريال تتغير مابين 2350و2400
وبيكون الفارق بسيط غير محسوس
يجيك سوال يوش من جنب اذنك ماشي مليون
وش اسوي
اذا وصلت للمطار وين اروح كيف اتكلم ابي امي ابي ابوي
بسيطه متستصعبهاش ....
اتحدي احد يقول هلكلمه خمس مرات بسرعه
شف وانااخوك
قبل تروح هناك اذا انت راعي فرفره بالنت هذا الموقع بيفيدك
هذالموقع فيه خريطه تشوف المحل الي بتسكن فيه
مثلا وش حوله اسواق منتجعات متاحف الخ
وبيكون الشرح لموقع بمثال
انا ودي اسكن بالانتركنتننتال مثلا بجاكرتا
ولا اقولكم خلوا الصوره تشرح لكم
وهذي خارطه فندق الانتر بعد ما بحثنا عنها
ولو تدقق ممكن تحط يسار تلقي كلمه hotel
وتطلع لك كل فنادق الديره عاد انتم خربطوا فيه براحتكم
وهذا رابط الموقع
http://cybermap.cbn.net.id/?map=jkt
طيب اذا انت منتب راعي فرفره بالنت وودك تاخذ الزبده
خلك معي وبوديك وطي
مستعدين ولا جاكم النوم ؟؟؟
بسم الله نبدا اللهم لا سهل الا ما جعلته سهلا
انت طبعا بتطلع بطياره ....
قل قسم ايه بطياره اجل بطلع بالموتر انت وخشك
طيب لا تدف
شف يبو الشباب
انت بتطلع من مطار جده مثلا وبتنزل بمطار اسمه سوكارنوا هاتو
اللي هو مطار جاكرتا
طبعا مطار جده ازين من مطارهم
مطارهم مثل ما قلت من قبل كنك بمطار تبوك بس فرق اللون
والصدق ان بغيتوه مطاراتنا كلها خمه قرشوع عند مطار جاكرتا :112:
ركز معي ....
بالطياره بيعطونك
كرت دخول للطياره
وبعض الاحيان الكرووت ما تكفي فيجحدك المضيف
اذا صاروا الاجانب اللي هم حنا يلسعوديين واجد بالرحله
فحاول انك تاخذ هلكرت اول ماتطلع عشان تريح دماغك وما تحلقه كابوريا
اذا وصلت للمطار ولا لقيت قلم تكتب فيه :112:
وش تكتب بهل كرت
وليش اكتب
وعشان ايش
ومن قاله
ووشو له اكتب معلومات بهل كرت و...
اقول تلايط بس....
وخذ هلكرت واكتب مثل ما تشوف بالصوره اللي تحت
خلك مركز معي عشان ما تتنكد باخر يوم برحلتك
هلكرت اذا كتبته بياخذون منه ورقتين ويعطونك ورقه وحده
هلورقه اللي بيعطونك اياها
مهب تفهي لا شفت الخضره والطبيعه وتضيعها
هذي طال عمرك تحطها جنب الجواز
لانك لا بغيت تسافر وترجع لديرتك بالسلامه
بيقولونك وين كرتنا
عاد اقعد بها لا ضيعته
بيمصعونك كم دولار وبعينك حبحر
ولا تنسي
مع كل شخص لابغيت ترجع للسعوديه بيطلبون منك 100 الف ريال .....
اقصد روبيه لا تنهبل علينا
طيب وصلنا للمطار وين نروح
مايبيلها ذهانه تروح لاندونيسيا :112:
اليوم بنلزخ شكلي
اخلص علينا وين نروح
لا تعصب ابشر بسعدك
شف هلصوره
شفت هلبزر اللي بالصوره فوق وش يناظر
تراه منسفه بحديقه المطار طبعا بزر وعقلله صغير
اي هين الوعد قدام يلي تطنز بلبزر
تنبيه
من هذه النقطه عد نفسك قيم اوفر نو واي تو ريتيرن ....
من هذه النقطه كامو سلامات عيد الفطر
من بعد هلخطوه ...
كل خطواتك تحكمك ...
وانت اللي ...من عرفت الدنيا علي كيفك تمشيها..
باختصار
من هنا يبدا طريق الا عوده
الداخل مولود ...والخارج ....
اجراءات الفيزا
هذي مسويه قلق في البوابه مدري ليه !!
والسالفه كنك صاف بطابور فوال وتميس:112:
شف وانااخوك
لا دحدرت مع هلسيب
مثل البزر اللي تو تتطنز عليه
تلقي بوحهك حرف تي
تروح يمين وتلقي مكتب علي طول بيدك اليمين
هلمكتب تاخذ منه الفيزا
وهو قسمين جنب بعض يعني
لو يعطس اللي بالمكتب اليمين يسمعه اللي بالمكتب اليسار
لا منك نقدت 25 دولار عن كل نفر معك
بالمكتب اليمين تروح للمكتب الايسر ويطقك الفيزا
همن
تروح سيدا علي وجهك تلقي مكاتب الجوازات
وتختم اطلق واعنف ختم
مثل هدف بيتر شلتون
عشان خاطر عيون مشرفنا الطائر الجريح وخل مارادونا يرقد
والصوره بالف كلمه
همن
تروح تاخذ عفوشك
لا تنساها شفها بالقسم الاعلي بالصوره صور لسير العفش
وبالقسم الاسفل تلقي فيه
بنك وصراف
تصرف كم دولا ر ولا ريال لروبيه ولا تكثر بس حق التكسي
وحجز الفندق لا ن صرف المطار اقل من وسط البلد
وهمن تلقي ماس منجطل
ويفتش العفوش
مدام ما معك كليجا ولا فتيت مهب ناشدك وكنه ماشافك
لا طلعت من عند التفتيش بتلقي بوجهك مكاتب واجد
من ضمنها مكتب اسمه كاها لحجز الفنادق
وهو من افضل المكاتب يعيطك تخفيض رائع لاغلب الفنادق
وللفائده فيه شخصين يعملون في المكتب الثاني اللي بداخل جاكرتا
وتعاملهم رائع مع الكل اللي يعرفونه واللي ما يعرفونه
يتكلمون عربي بطلاقه
الشخص الاول اسمه فاروق وهذا جواله
7الشخص الثاني واسمه فهمي
8وجنب هلمكتب تلقي مكاتب تكاسي
انصحك بمكتب اسمه بلو بيرد لامانه وصدق سواقينه في الغالب
متفرقات مفيده من داخل اندونيسيا
الصوره الجايه فيها مواقع وارقام خطوط الطيران
العربيه والخليجيه في اندونيسيا ومكاتبها هناك
مااعتقد بتفيدكم كثير
لان اغلب الفنادق هناك فيها مكاتب خاصه بتاكيد الحجوزات
لكن ما يمنع نحطها للفائده
السفاره السعوديه في اندونيسيا
@@موقعها الرسمي علي النت @@
http://www.mofa.gov.sa/detail.asp?InServiceID=228&intemplatekey=MainPage
وبكذا نكون انهينا القسم الاول بالتعريف باندونيسيا
الصور تم عملها بالفوتو شوب
لاني عملتها بشكل سريع عشان الحق اكتب التقرير
وانا وعدت ان انزل التقرير للرحله بشكل سريع ووعد الحر دين عليه
فاعذروني اذا ما كانت قد المقام
الان وبعد ان حجزنا الفندق واخذنا تكسي من المطار
وانهينا القسم الاول
راح ندخل القسم الثاني وهو عن رحلتي في 2008 اغسطس
وعشان ما يزعلون علينا الشباب
بنعطيهم صور تصبيره علي فراق الاميره
@@ فندق ساروني قبله العرسان في الشيخ الاخضر@@
@@سيكابومي المدينه المنزوعه القلب وهي كلها قلب @@
@@فندق الورده السوداء في باندونق ..مدينه العشاق @@
@@قال ايش قال بركان .......افلقني ان زرته مره ثانيه @@
@@بحيرات وبرك المياه الكبريتيه اذا كنت ولد ابوك اجلس اكثر من ربع ساعه @@
@@اللي بيبر بشيبانه ياخذهم لهل مكان المخصص للعلاج الطبيعي بدكاتره متخصصين @@
@@رالي السيارات الصغيره من يفوز انا ولا ابو حاتم :112:@@
@@اروع مغامره انك تركب دباب دفع رباعي ....ووشي جائزه الفايز بالسباق @@
وغيرها الكثير باذن لله بس شويت صبر وفالكم .....جاكرتا ....