1. السلام عليكم ورحمة الله وبركاته ,,


2. يعني دفعت فلوس الي 4 أبواب, لكن الفوتشر بابين ونفس سعر ال 4 أبواب !

السلام عليكم ورحمة الله وبركاته ,,

CarHire3000.com موفع بريطاني على ما أعتقد, لتأجير السيارات بأسعار رخيصة. سبب رخص الموقع إنه هو يختار لك الشركة الي تأجر منها, يعني أنت تستأجر وبعد ما تدفع يرسلون لك الفوتشر وفيه اسم الشركة. هالموقع يستخدم في دول كثيرة, وكل دولة لها شركات محددة يتعامل معها. بأمريكا يتعامل مع:
أنا قارنت بين أسعار هالموقع واسعار الشركات الثانية وكان في فرق كبير بينهم! فقررت احجز منهم.
وطبعا صارت لي مشكلة معهم, وعشان كذا حبيت اكتب تجربتي عشان المره الجاية محد يغلط نفس غلطتي ..
أنا حجزت سيارة من نوع Economy أربع أبواب, شفروليت أفيو أو نوع يشبهها, وكان في مثلها بس بابين. وكان الفرق بالسعر بينهم 20 باوند يمكن, زي ماهو واضح من الصورة تحت:
بعد ما حجزت ودفعت المبلغ اونلاين, ارسلوا لي الفوتشر ويوم فتحته شوفوا وش طلع :

يعني دفعت فلوس الي 4 أبواب, لكن الفوتشر بابين ونفس سعر ال 4 أبواب !

طبعا أرسلت ايميلات لين دخت ولا يعبرون ولا يعطون وجه! قلت مافي إلا إني ادق عليهم, طبعا رقم بريطاني.
دقيت عليهم وشرحت السالفة للموظفة ما رضت تفهم تقول أنت حاجز بابين وسعرها 660 باوند هذا الي طالع عندي, قلت لها زين اطلعي عالموقع ودخلي البيانات الي أنا دخلتها المدينة والتاريخ وكذا وشوفي الخيارات الي تطلع. طبعا أنا كنت فاتح نفس الصفحة وطالعة لي نفس الخيارات الي بالصورة الأولى اربع ابواب ب 660 وبابين ب 640 باوند.
بس هي مو طالع عندها كذا! تقول قدامي الحين بالموقع بابين ب 660 باوند, طبعا ولا في أمل تقتنع :S .
أنا شفتها ما في أمل تستوعب, سألتها بكم ال 4 أبواب؟ قالت ب 680 على ما أعتقد, وطبعا بما إني بارجعها بمدينة ثانية كان في Drop off charge. سألتها بكم رسوم الدروب اوف , طبعًا لطعتي أكثر من عشر دقايق بعدها قالت ب 180 دولار وتندقع عند الشركة الي بتستأجر منها. قلت خلاص أجل غيري حجزي على كذا.
بعدها ب 10 دقايق ارسلت لي إيميل تقول فيه "باعلمك ان الدروب اوف تشارج 500 دولار" !! حتى بدون سوري او اي شي !!
خلاص وقتها ندمت إني حجزت عن طريقهم, لأنها بهذلة ! أرسلت إيميل ثاني وضحت فيه السالفة من بدايتها لنهايتها بالصور وكيف إنهم غلطوا بالحجز وإن الموظفة لطعتي بالتفلون وآخر شي عطتني معلومة غلط! لكن لا حياة لمن تنادي محد رد علي !!
بس الحمدلله يوم رحت الشركة ( الشركة الي طلعت لي Alamo ) طلع التشارج 350 دولار.
بنهاية الموضوع, إذا كان الفرق بالسعر بين هالموقع و شركات التأجير كبير, ونويت تحجز منهم انصحك بالحجز عن طريق التلفون. عشان تتفادى الأغلاط الي صارت لي, وميزة ثانية إن عن طريق التلفون تقدر تعرف اسم الشركة راح يرسلونك عليها وكم الدروب اوف تشارج قبل لا تحجز.
أتمنى إنكم استفدوا من تجربتي..
تحياتي,,