تجربتي في المروة ريحان من روتانا في مكة المكرمة (تجربة سيئة)
السلام عليكم
انا توني رادة من العمرة عسى الله ان يتقبلها .. اللهم أمين.
سكنت في المروة ريحان من روتانا .. خذنا جناحين كل واحد تكلف 9995 ريال لخمس ليال .. كان اغلى الاجنحة المعروضة في بوكنج ..
نحنا السنة الماضية سكنا ابراج زمزم .. استغفر الله شهر واحد من نفس السنة لانه كانت اجازة المدارس العام الدراسي الماضي في شهر واحد ...
بعد خذنا جناحين بغرفتين و حجزنا جناح بغرفة .. المهم .. لما وصلنا حاولو يقنعونا انه في قوانينهم الغرفة العادية تساوي عندهم الجناح بو غرفة .. طبعا يوم ردينا عليهم انه هذا كلام غير منطقي و غير مقبول .. و تمينا واقفين على روسهم عطونا بداله جناح بغرفتين بس الغرفتين هب ماستر .. غرفة بحمام .. و غرفة اصغر و حمامها برا .. و الصالة صغيرة جدا و فيها بس طاولة للطعام ...
بينما الجناحين كانوا بغرفتين ماستر .. و الصالة فيها كنبة و تلفزيون و غرفة طعام ...
المهم هالمرة قلنا ما في داعي نحجز في ابراج زمزم خلينا نختار المرة روتانا ... يعني فندق بادارة روتانا اكيد بيكون بروفيشينال و لا بيحاولون ايسوون حركات مثل زمزم ...
المهم حجزنا و لما وصلنا .. و عطيناهم اوراق الحجز .. بدت الحركات .. "الجناح الثاني الظاهر انتو اتصلتوا و كنسلتوه"! .. انا صراحة ما شفت من الغضب .. قلت له اسمع .. هذا الموقع الي حاجزين من خلاله نحنا نحجز و نروح عن طريقة امريكا و بريطانيا و اوروبا عمره محد قال في خطا و لا سوا حركات .. قال الموظف: انا ما قلت مشكلة .. صبروا بشوف ... المهم الحجز طلع هب مكنسل ولا شي ..
يينا للدفع .. قلنا بندفع نص بالبطاقة و نص كاش .. المهم الكاش وايد 9995 ريال .. عطيناه 10000 امارتي قال بعد تدفعون لي 450 لانه الريت كل 97 هلله تساوي درهم (اتصوروا) .. انزين اوكي لو هذا هو الريت كيف الباجي 450؟؟ صراحة الي ما يعرف يحسب ينقص عليه في هالاماكن ..
المهم قلنا له رد فلوسنا نحن بنبدلهن برا و بنرد .. يوم سرنا نبدلهم .. عطونا زيادة على فلوسنا 150 ريال ..
دشينا الاجنحة عقب ساعات لانهم ما كانوا خلصوا التنظيف (عاد و التنظيف) .. و تفاجأنا انه الاجنحة الي عطونا اياها هي نفس الجناح الصغير الي عطونا اياه زمزم بدل جناحنا الي بغرفة والي ما قدروا ايدبرونه شهر واحد .. يعني غرفة ماستر .. غرفة صغيرة .. صالة يالله يالله حاطين فيها طاولة طعام و ثلاث كراسي .. يعني هاذيل ناصبين علينا ..
والاضاءة الله لا ايراويكم ... ظلالالالالالالالالالام .. جنه شهر العسل ... اللمبات منبطه ولا يبدلونها .. والجناح التشطيب ماله جنة بيت درجة عاشرة .. و الشطاف .. محد يقدر يستخدمه الا اعتى المصارعين ... ولا حتى في غلاية .. و الطباخ مفصول طبعا .. و الحمام يلوع الجبد .. ضيج ... و طريقة التشطيب مقرفة .. في اشياء بنية في الزوايا .. ابدا ما حبيته ..
لا و في اليوم الثاني متصلين بالوالدة : شو رايكم في مستوى الفندق؟ قالت له لا بيض الله ويهوكم .. ولو انا ما مرضنا في هالعمرة كنا بنشوف لنا مكان ثاني .. بس ليش التعب .. اظن كلهم جي ما عليهم رقابة .. يمكن الافضل انه الواحد يسكن غرف منفصلة .. يمكن هم الاجنحة الي ما يعرفون يتصرفون فيها ..
انا صراحة ما انصح اي حد يهمني امره ينزل في المروة روتانا هذا
المرة الياية قررنا نحاول في : رتاج، رافلز، برج الساعة .. والله يوفقنا في مكان يسوا
والله حسافة اسم روتانا الي ما تعودنا منه الا الافضل يصير مستواه جي ...