هلا اختى حياج بديرتج الثانية الكويت ،،،، شوفي بالنسبة للتنزيلات حاليا بالكويت فيه تنزيلات وااي واسعار خيالية بس انتى وقتجج اعتقد والله اعلم راح تكون مخلصة من فترة الخصومات لأن عندنا محلات الشايع واللي اهية تحت اسم ( ماذركير و bhs وريفرايلند ودبنهامز و نكست وغيره من محلاتهم آآآآآخر يوم يوم 31/01/2009 موافق السبت .
واما بالنسبة الي مهرجان هلا فبراير راح يكون ان شالله من السبت 31/01/2009 كبداية افتتاح المهرجان الي غاية نهاية شهر فبراير بس هل راح يكون فيه بعض المحلات فيها خصومات !!!! احتمال ان شالله تحصلين بس اهم شي لازم تروحين مجمع الافنيوز فيه وايد محلات وكلها تقريباخصومات شي موطبيعى بس ان شالله تحصلين المقاسات من الزحمة .
واما بالنسبة للدراريع وبصراحة انا اول مرة اسمع عن هذي الاخت مصممة ( التونسية ) بس والله روحي مجمع الاوقاف اللي في الديرة كله داريع هندية وبعد عندج الفروانية فيه بعضة تفصال والبعض الاخر جاهز وتلقينهم عندمجمع العربيد ومجمع مبارك الصيفى فيه وحدة ينقالها ( أم هشام ) هذي الاخت مصرية تجيب دراريع من مصر بس والله شغل حلو ونظيف وهمن اسعارها وايد حلوة تناسب الجميع ،،، وبعد عندج مجمع الحمرا مول والعربيد بلازا كلهم في منطقة الفروانية
وإذا انتى راح تسكنين في منطقة السالمية روحي سوق سيتى سنتر ويسمى ( سوق الاحمر ) عند دوار الجوازات معروف كبير واايد تحصلين فيه جم محل يبيع دراريع حلوة بس الغالب هو طابع ستايل الهندي من الخامات،،،
وان شالله اكون قد وفيت في طلبج يا الغالية وحياج الله بديرتج الثانية الكويت ،،،،

يزاج الله خير وماقصرتي

ياحياتي حياج الله بالكويت بتنوريها ان شاء الله شوفي الحين الكويت كلها خصومات خطيرة 75% شي عجيب وممتده الى آخر شهر يناير وبالنسبه الى الاسواق : عندج في ( الفروانية ) مجمع العربيد خلف جمعيه الفروانية هذا يصمم دراريع تروحين وتشوفين الموديلات اشكال والوان طبي وتخيري و عندج بعد في الفروانيه مجمع مبارك الصيفي للعبي والملافع ومجمع الحمرا مول والعربيد بلازا- هذا غير عن العربيد اللي خلف الجمعيه وهالمجمعين يكونون متلاصقين يم بعض فيهم احذية ودراريع وقمصان نوم وعطورات ومكياج و فساتين سهره و كل شي بأسعار جدا حلوه ورخيصة ... اما منطقه (السالميه) مثل ما قالتلج اختي كويتيه فيه سوق السالميه سيتي سنتر عند دوار الجوازات هذا مجمع كبير فيه كل اللي يطري على بالج وايد حلو واسعاره حلوه ,, وعندج مجمع المارينا مول هذا يختلف مجمع كشخه فيه محلات عالميه مثل زارا و مانجو و اتش اند ام ومورجان و اويسس وبربريز وبول اند بير وانيرجي و و محلات شنط غاليه وساعات مثل شوبارد وروليكس وتاغ هيور و اوميغا و واحذيه وماركات رياضيه وعندج بعد بالسالميه مارك اند سبنسر و عندج بعد سنتربوينت اسعاره روعه احذية وشنط وملابس وبجامات واكسسوارات وتحف وملابس اطفال و طبعا عندج مجمع الافينيوز احلى مجمع بالكويت هذا مو بالسالميه على الدائري الخامس طبعا فيه كل شي اكشخ من مستوى المارينا وفيه محلات اكثر يبيلج يوم كامل فيه ... وعندج مجمع الاوقاف كله دراريع تناسب كل الاذواق خاص فقط بالدراريع .. ومجمع الصالحيه عاد هذا توب شانيل و لوي فيتون و فرساجي و ديور و ماكس مارا و بولغاري و كله بوتيكات.... بس تعبت بتجيني الولاده من كثر الكتابه

حياكم الله بديرتكم الثانيه
العربيد بالفروانيه فيه دراريع اشكال و الوان اسعارهم حلوه
الاوقاف حلو لكنه فخم و غالي

اشكركن والله من كل قلبي