السلام عليكم و رحمة الله و بركاته
ان شاء الله بعد العيد عندي رحلة ترفيهية الى تايلند انا و صديقي و ان شاء الله تخطيطنا بيكون كالتالي :
دبي بانكوك و البقاء في مطار بانكوك لمدة ساعتين و من ثم الذهاب الى شانج ماي بالطائرة و المبيت فيها لمدة ثلاثة ايام
طبعا اخوكم زار شانج ماي مرة قبل تقريبا 3 سنوات فعارفنها عدل و حفظتها تقريبا لأني تميت فيها اسبوع قبل و عرفت كل الاماكن الاماكن اللي الواحد يقدر يزورها و يغير جو فيها طبعا هذي المرة بتم فيها 3 ايام بس و بعدها بالطيارة ان شاء الله بنروح جزيرة بوكيت بنتم فيها 4 ليالي و طبعا هذي اول مرة اروح فيها هذي الجزيرة و متحمس لها بشكل كبير لاني وايد سمعت عنها و خاطري اروح لها و اشوف شو يميزها و طبعا قالولي انها احلى من شانج ماي (( بحدد بعدين ))
المهم اللي بغيته منكم بس او من اللي عنده خبرة وسبق له زار جزيرة بوكيت التالي:
ممكن اعرف مكتب سياحة ( مسلمين ) يودون رحلات لاني ارتاح للمسلمين و احس انهم اكثر امانة من غييرهم و خاصة في مثل هذي الدول
مثلا في شانج ماي اعرف شركة سياحة مسلمين و سبق و ان رحت معاهم و وايد ارتحت لهم و فرق كبير كان في السعر بينهم و بين الشركات الثانية
المهم اللي يعرف عن شركة سياحة مسلمين في جزيرة بوكيت يخبرني جزاه الله الف خير و بكون منون له
اما الاستفسار الثاني
بغيت من اللي زار هالجزيرة و عرف فيها كل شي
شو هي احلى الرحلات اللي ممكن الواحد يزورها و تكون مميزة يعني شي ما شفته من قبل طبعا ياليت لو تخبروني عن احلى 3 رحلات مميزة و بكون شاكر لكم
و اخيرا الاستفسار الثالث
سمعت قبل عن رحلات يكون فيها غوص بحيث ننزل البحر و نحن في نص الرحلة هل هذا صحيح اذا صحيح شو المطلوب مني من حيث ادوات السباحة يعني باختصار شو اودي وياي في مثل هالرحلات علشان اتجهز لها عدل مدل!
و ان شاء الله ما تقصرون وياي و اذا عندي استفسارات ثانية بكتبها هني ان شاء الله اذا حصلت منكم تجاوب و كلي امل فيكم
و اسف على الاطالة و ان شاء الله بيكون في تقرير مفصل مني لهالرحلة بعد العودة بالسلامة
دعواتكم