1. أبشركم رحت وجيت لتايلاند وكنت مبسوط ورحله كانت خياليه يا ربي لك الحمد


2. أعهه نبدأ


3. الفندق هذا ابد قدام منطقه نانا اللي فيها السوق العربي


4. 3- ما عندهم الا خبز يابس وماء وببس وبفلوس بعد


5. 4- المواعيد والدقه في الرحالات الله بالخير


6. المهم يومين ثلاثة ايام في تشانق ماي تسدكم

السلام عليكم ورحمه الله وبركاته
يا هلا والله وسهلا فيكم

أبشركم رحت وجيت لتايلاند وكنت مبسوط ورحله كانت خياليه يا ربي لك الحمد

أعهه نبدأ

طلعنا من الطياره داخلين على مطار تايلاند طبعا الدخان ممنوع وفيه غرف خاصه بالمطار على يمينك اول ما تنزل طبعا لو مسكوك تدفع لهم غرامه ماليه قدرها 2000 بات = 200 ريال المهم طبعا تلف يمين ويجيك حق محل العملات صرافه صرفت عشان ادفع حق الفيزا المهم تمشي شوي عاد يجي على يدك اليسار مكان ولوحه مكتوب عليها visa وقف عندك تلقى لك ورق تعبيه طبعا يا اخوان كل واحد ينتبه للبوردينق كارد اللي خذه من المطار اللي وصله إلى تايلاند مكان الجلوس تراه مطلوب وخذوه مني ودبسوه في الجواز طبعا اذا رحت المكتب عشان تاخذ الفيز بيجيك من التايلانديين ناس لابسه فنايل صفراء تبع الجوازات واذا تبون النصيحه عطوه 200 بات = 20 ريال عشان يعبي لكم البيانات ويدخلها ويخلصكم بسرعه ( بخشيش ) يخلص كل اجرائاتكم ب 20 ريال سعودي
طبعا وختمنا الدخول ورحنا وخذينا العفش أنتبهو عفشك رح تلقاه على السير طالع لك ومكتوب عليه رقم الرحله طبعا انتم بتبطون ما طلعتو عشان الفيزا يعني شغله 30 دقيقه على بال ما تفيز يمكن تلقى عفشك على الارض
اول ما تطلع لا تندهش ولا تستغرب وخلك طبيعي وثقل ونصيحتي لك تاخذ تكسي من المطار يجي على يمينك ويسارك مكاتب تكاسي مسعره توديك للفندق اللي انت ساكن فيه صحيح انه شوي اغلى من التكاسي العاديه ولكن شركات آمنه خصوصا انك توك جاي الديره وما تعرف فيها شي الله يحرسك
سكنت اول ما جيت بانكوك في فندق اسمه اماري بوليفرد وبصراحه يا ليتني ما سكنته بتقولون ليش ؟؟ اقول لكم هذا الفندق رهيب مره وموقعه خيال من جد يعني في السنتر ولكن توقيت اللي سكنت فيه ما كان مناسب لاني المفروض خليت سكني فيه اذا جيت من تشانق ماي وفوكت

الفندق هذا ابد قدام منطقه نانا اللي فيها السوق العربي

بعدين نصيحه اخويه اذا معكم فلوس وتبون تسوون صرف شوفو منطقه نانا فيه محلات بالهبل صرافه ورخيصه جدا وحط بالك زين ترى تشانق ماي وفوكت ما يقبلون الريال السعودي يعني اصرف فلوسك من بانكوك ولا تطيح في الورطه حقتي بس يقبلون الدولار الامريكي وانا ما خذت دولارات واجد ويوم رحت فوكت توهقت معي سعودي ولا قبلوه
على العموم اماري بوليفرد فندق جدا رهيب بس يا ليت تخلونه في اخر المطاف بعد ما تزورون مناطق تايلاند لانه رح يكون قريب من منطقه التسوق مرره ولا تتعب ولا شي اللي تشتريه رح وده للفندق على رجلك
طبعا انا جلست يومين في بانكوك وكانت يومين لذيذات من عمري وتمشيت وعرفت الاسواق ولكن نصيحه عليك فيهم بالمكاسر يعني اذا قال لك 5000 بات انزل معه لسعر 2000 بات وهو اللي غالبك بعد
انتقلت إلى تشانق ماي على اشين خطوط في العالم اللي اسمها airasia من جد طيران فاشل بكل ما تحتويه الكلمه من معنى طبعا من وجهة نظري بتقولون ليش :-
1- الطيارات حقتهم تجيب الهم تحس انها مهرقله
2- ما فيه شي اسمه تحجز مقعد اركب في المكان اللي تبي ومن سبق لبق

3- ما عندهم الا خبز يابس وماء وببس وبفلوس بعد

4- المواعيد والدقه في الرحالات الله بالخير

اللي افضل منه الطيران التايلاندي صحيح انه أغلى شوي لكن فلوسي هي اللي تريحني مب انا اللي اريحها طبعا الطيران التايلاندي من الافضل انك تحجز من المكاتب هناك لانه بالانترنت اغلى والمكاتب ارخص لا تقول خايف ما القى حجز ان ما لقيت رح على طيران airasia مالك الا خشمك ولو كان عوج وفيه اكثر من شركه طيران
وصنا تشانق ماي ركبنا مع التاكسي وصلنا لاحسن فندق في تشانق ماي اللي هو الشيراتون تقريبا ب 120 بات يعني 12 ريال طبعا غير الشيراتون في تشانق ماي لا تدور غرفه مطله على النهر ويالله من فضلك
فيه سواق تاكسي هناك تعرفت عليه وان شاء الله انه امين اسمه يوسف ومسلم اشترطو عليه يجيب سياره جديده ومكيفه ورقم جواله عندي ياخذ عليكم اليوميه تقريبا 800 بات = 80 ريال ياخذك من الساعه 8 الصبح ويردك الساعه سبع الليل ( وتراه يتتن اذا نزل من السياره ويتغبى انا شايفه ) انت وهواك خلوه يمشيكم من وإلى رهيب ويعرف كلش ويتكلم انقليزي وشوي عربي يطقطق ما عليه وصوته زين خلوه يقرى عليكم قران ويسوي لكم برنامج سياحي على تشانق ماي

المهم يومين ثلاثة ايام في تشانق ماي تسدكم

بعدها تروحون على الطيران التايلاندي إلى فوكت لان airasia ما عندها رحله دايركت لفوكت اول ما تطلع من مطار فوكت فيه مكان اسمه تاكسي ميتر على يمينك يوديك للفندق اللي تبيه ارخص من سواقين التكاسي اللي بيقابلونك عند البوابه اسفههم بس تركب ويشغل لك العداد ويوديك الفندق لين توصل وتحاسبه انا كنت حاجز في amari coral beach هذا اسم الفندق بصراحه فندق روعه واطلب غرفه تكون فوق عالي بس ترىكله خمسه ادوار بس كل ما ارتفعت عن سطح البحر كل ما حسيت بالخصوصيه اكثر يعني يمديك تجلس في البلكونه انت والمعزبه ولا احد يمك طبعا انا خذيت الروم Delux جدا غرفه ممتازه ورهيبه طبعا المسافه من المطار للفندق هذا حوالي ساعه خذ علي فيها التاكسي 480 بات يعني 48 ريال
طبعا فوكت حلاتها في النهار اما بالليل يا زينك تصك الباب من الساعه ست المغرب وتجلس في فندقك لانها بصراحه ديره فيها دشره مهيب طبيعيه ولكن حلاتها في الصباح الباكر فوكت تستاهل 4 ايام او خمسه بالكثير بعدين فيه هناك مكاتب سياحيه واسعارها رخيصه توديك للجزر مثل جيزه جمس بوند وغيرها
على فكره الفندق اللي سكنته شوفوني من الحين اقول لكم تراه هادئ جدا ما تسمع فيه صوت ولا صجه ولا تشوف فيه احد واجد ولكن فخم ومريح ويوسع الصدر
طبعا تعرفت على واحد تايلاندي سواق تاكسي ياخذني طول اليوم تقريبا ب 1000 بات عندي رقم جواله اذا حابين معه سياره هوندا جديده ونظيفه ياخذك من الساعه تسع الين الساعه ست المغرب واذا تبي شي تزيد شوي على العموم هو يسوي لك عرض ويمشيك من طق طق لسلام عليكم
بعدها رجعت لبانكوك كنت متعرف على سواق هناك بس طلع غالي بس يتكلم انقليزي ويشرح لك ومعي رقم جواله