مرحبا فيج أختي .... وحياكم الله في البحرين ....
ممكن حبيبتي ... تشوفين الدليل السياحي المثبت ....
فيه فنادق وأماكن ترفيهية ومطاعم ... وتقارير سابقة حلوة ...
ممكن تشوفين اللي يناسبج .... وأي سؤال ... حاضرين لج ...

الغالية
مشكوره الغاليه بس يا ريت ترشحيلي على ذوقج الفندق المناسب ابغيه يكون راقي وفخم وقريب من الاماكن السياحيه ..
وخبريني شو الاماكن السياحيه اللي تنصحيني فيهم ...لانه انا لو فتحت الدليل اكيد بشوف وايد وبحتار لكن ابغي اخذ ارائكم احسن وخاصه منج لانج مشرفه البحرين فيا ريت ترشحيلي وبكون شاكرة لج

نور بوظبي
حياج أختي ...
طبعا انا برشح لج ... ولج حرية الاختيار ...
التفاصيل ...
فندق الريتز كارلتون هو أقرب وأفخم فندق لمنطقة المجمعات وموقعه في ضاحية السيف ..
غراند ميكور ... شقق فندقية ممتازة ... قريب جدا جدا جدا لمجمعي السيف والعالي
شقق إليت غراند .. شقق فندقية راقية .. قريبة للستي سنتر وباقي المجمعات ..
اليت سويتس مقل شوي من اللي ذكرتهم ... لكنه حلو وقريب أيضا للمجمعات ..
الاماكن السياحية ...

• المجمعات (السيف - العالي - الستي سنتر - مودا مول - الدانة - مجمع البحرين - مجمع العاصمة(للأسر المنتجة) ) .. تشمل محلات التسوق وملاهي للأطفال مطاعم ومقاهي (ودور سينما في السيف والدانة)
• الأسواق الشعبية (سوق المنامة - سوق المحرق) .. سوق واقف - السوق الشعبي ..
• العديد والعديد من الاختيارات بالنسبة للمطاعم والمقاهي داخل المجمعات وبرا المجمعات ...
• منتزه عين عذاري ... العاب للصغار والكبار ..
• جنة دلمون المفقودة (حديقة مائية كبيرة) .. للكبار والصغار ... وليلة الخميس للنساء والأطفال فقط ...
• متحف البحرين الوطني ... يعطيج نبذة عن حضارة البحرين وتاريخها ...

هذا اللي في بالي حاليا ... وارجع اقول لج حبيبتي ... ادخلي عالدليل السياحي ...
تفاصيل هالأماكن كلها تلقينها فيه ... وشوفي خبرة الناس اللي زاروها ... عشان تروحين وانتي متطمنة ...
وحياج الله ...

مشكوره حبيبتي كفيتي ووفيتي يزاج الله خير ...معروفين هالبحرين بالكرم وما يقصرون يعلكم ذخر يا رب