ياهلا فيك بالبحرين وتنور الديرة بوجودكم
بس لاسف انت ذكرت انك بتتي مع الوالدة فايمكن مااقدر اساعدك كثير لان الحريم الكبار وهم البركه طبعا الاماكن اللي يفضلونها غير الاماكن اللي التناسب الشباب
يعني خلني اقولك للوالد طبعا السوق ثم السوق فالسوق
عندنا سوق الذهب حلو طبعا سوق محرق اهو وسوق المنامه يعتبر قديم بس الحريم الكبار امهاتنا مايطيب خاطرهم الا اذا زاروه وانا افضل سوق المحرق عن سوق المنامه عندهم دراريع بسيطه واشياء بسيطه
وطبعا المولات اكيد عارفها السيف, العالي ( هادي بيناسب الوالده اكثر من السيف) ,الدانه (مو حق تسوق بس للسينمات ممتاز اريح من السيف )
ضروري يوم اتودي الوالدة تفطر بالرتز كارلتون (الميرديان سابقا) جو الافطار الصبح حلو حيل امي دايم اتحب انروح اهناك طبعا
بعد النوفوتيل يهبل اذا بتسكن فيه وحتى لو ماسكنتو ممكن اتروحون على غدا او عشي روعه
المتاحف عندنا متحف واحد على حد علمي لان اتعرف اهل الخليج وخاصه البنات يحبون المتاحف فيعرفونها زين ومايحبون الاسواق كلش
بس تعبت زين انت خبرني شنو تبي اتعرف وانا اذا اقدر اساعدك حاضره ياخوي
وسلملي ع الوالده واتمنى تقضون ايام حلوه بالبحرين

اهلا ومرحبا فيك بين اهلك
هذا برنامج متواضع وإنشاء الله يفيدك..
اليوم الأول:
السكن في (( ميركيور جراند )) يقع بجانب منطقة السيف .. والإطلاع على منطقة السيف بما تحتويه من مجمعات, وزيارة كورنيش الملك فيصل و النادي البحري.
اليوم الثاني:
زيارة متحف البحرين , بيت القرآن, محمية العرين, بيت الشيخ عيسى القديم الموجود في منطقة الجسرة, قلعة البحرين, صناعة الفخار في منطقة عالي ... وغيرها.
اليوم الثالث و الرابع:
الذهاب الى جزيرة حوار.
اليوم الخامس:
وهو يوم التسوق: التسوق في الأسواق الشعبية مثل ( سوق المنامة , سوق المحرق ) وبعض المجمعات مثل ( مارينا مول , مجمع الدانة , مجمع البحرين , مجمع اللؤلؤ ) واذا تحب شراء الذهب في فندق (( هوليدي إن احسن أنواع الذهب وتشكيلاتها موجودة هنا )) بس غالية شوي ,والمجمعات التي حول الفندق.

• ملاحضة: لاتنسى الحلوى البحريني و المتاي.

وإنشاء الله تستمتع في الرحله.

• ملاحضة: ترى كل عامل تكسي بحريني هو مرشد سياحي لا تحاتي .

محمية العرين
كيف أوصلها دورت وتعبت ماحصلتها أبغى وصف مفصل من السيف
وجزيرة حوار كيف أسوي حجوزاتها من الرياض على أي مكتب وموقع المكتب بالبحرين
والف شكر