السلام عليكم ..
كل عام وانتوا بخير ان شالله ..
بما ان القاهره الحين تنادينا .. وحنا لبينا النداء
وبما ان موعد السفره قرب انشالله .. "كلها 4 ايام" .. حبيت اقدم لكم بعض
النصايح الطياريه .. عالسريع يعني ..
انا صارلي 8 سنين وانا من مدمنين القاهره .. صيف وشتاء . لازم مرتين بالسنه
ومع هذا كل ما اروح اكتشف اشياء يديده .. فا حبيت اني افيد واستفيد منكم انشالله
نصيحه .. اقتراح .. رأي .. ما يضر بس المهم الكل يستفيد من تجارب الغير
نبدي ..
اول ما توصل المطار .. يتهافتون عليك مكاتب اللموزين .. طب وتخير .. بس اسأله عن السياره قبل
بعضهم مو مكيفه .. واسعارهم كانت قبل سنتين 50 .. والسنه اللي فاتت 65
اخذ معك دولارات .. لان بعض الفنادق ياخذون تأمين بالدولار فقط .. يعني جنيه ما ينفع لازم عمله
صعبه .. فا عشان لا تتوهق اصرف دولارات "وانا انصح تصرف فلوسك كلها دولارات" وكل يومين تصرف
ديربالك من كروت المطاعم اللي يحذفونها عليك بالتكاسي
اذا بخاطرك مجبوس .. عندك قندهار .. او المطعم الهندي اللي بجراند حياة .. اكل نظيف ولذيذ
لذة القاهره بتكاسيها .. يعني فرفشه ما بعدها فرفشه سوالف ضحك استهبال .. بس اذا كان الجو حلو
اما اذا بالنهار .. او الليل في رطوبه ومكتم الجو .. اجرلك سياره عشان ما تتبهذل
(( ابعد مشوار ب 15 جنيه)) هذا وانت مبحبحها معاه .. واذا من فندق لفندق (خمسه جنيه) مو اكثر
ملابسك .. اذا بتغسلها بالفندق .. يطلع عليك اغلى من بيع السوق .. هذا اذا انت مطول بالسفره
اما اذا بحدود خمس ايام .. عادي غسل بالفندق ما تفرق .. وديربالك من اللي يوزعون كروت مغاسل
ترى كله شغل بيت .. يعني لا دراي كلين ولا يحزنون .. تعامل مع مغسله .. هو يجيك لين الفندق
ويعطيك وصل .. وسعره رخيص مو غالي ..
"المنيمم تشارج " صار بكل مكان .. تأقلم مع الوضع .. عادي (اهم شيء لا تعصب) لأن محد درى عنك
اذا ناوي تسهر بأحد مراكب النيل .. (السرايا _ صن ست _ الفرعونيه _ السلطانه_البيت بيتك_ وال... _ وال .....)
اذا كنت مأجر سياره بسواق .. خله يحجزلك قبلها بوقت .. ويفضل انت بنفسك تحجز المكان .. وتشوف
وين موقعه من الاعراب .. يعني عالساعه 8 .. تقريبا عشان تاخذلك طاوله حلوة
اذا في مقهى تمره يوميا ,, وبأستمرار .. ضبط نفسك معاهم ما فهمت .. صح ؟
بحبحها .. يعني قرقش مخباتك .. عشان من يشوفك داخل .. على طول يجيب لك شيشتك
مضبطه على سنقة عشره .. ويضبطلك طاوله .. يدلعك يعني بس مو تكشت فيه .. عشان المره الجايه
ما يكسر فيك .. ويطنشك
بتقولي ماله داعي اعطيه .. بقولك عيل انطر طاوله تفضى .. او توهق بطلب بارد
او ساعه لين يجيك الطلب ترى كلهم جذي .. حتى الفنادق الفايف ستار
"دار القمر" مطعم للريوق .. ماعليه كلام .. حلو والله فيه افرع وايد منه .. بس انا ارتاح للي بشارع الجامعه

• بوفيه جراند حياة .. مو طبيعي والله

مقاهي حلوة انصح فيها .. خصوصا .. عقب الساعه 3 الفجر .. لين تطلع الشمس
"لوكيشن" جامعة الدول العربيه ... "كلبس" قريب من ماكدونالدز "جامعة الدول " برضو
"مقهى جراند حياة" احلى وقت فيه .. من الساعه 6 العصر لين المغرب .. يطل عالنيل .. مباشره
"حديقة الماريوت" حلوة القعده فيها .. "لوبي رمسيس هلتون" هم بعد حلو
في مقهى بعد احلى مافيه .. انه هادي .. "حديقة هلتون النيل" اذا احتجت شوية هدووء .. روحله
فرايديز حلو .. والفش ماركت .. بس دايما زحمه (اسأل على زعبولا) يضبطك بطاوله
المطعم الدوار اللي بجراند حياة .. روعه .. (نظام يسوي الاكل قدامك بالطاوله) بس يبيله حجز من وقت
جرب تركب خيل بالهرم .. بس حاول انك تروح قبل لا تشرق الشمس .. يعني الساعه 5 الفجر عالبراد
وقبل الزحمه .. اركب خيل على الجو الفظيع وارجع (ترى سعر الخيل 50 جنيه) مو اكثر
"ملاحظه اخيره" انت مسافر تستانس .. وتنسبط .. اول شيء .. لا تبخل على نفسك
يعني دلع نفسك .. عالاخر .. مو تقول هذا ارخص .. وهذا اوفر .. وهذا مادري شنو .. كلها جم يوم
تسنانس فيها وترد لديرتك ..
وثاني شيء .. لا تخرب سفرتك بشيء تافه وما يسوى .. كبر عقلك .. مهما تشوف "اشتري دماغك"
على قولة اهل مصر
هذا اللي حضرني الحين .. اي سؤال .. استفسار .. انا حاضر
وياليت اللي عنده نصيحه .. اقتراح لا يبخل فيها .. وسفره سعيده انشالله للجميع