- وهذا قليل فيكم يالنشاما..
- لما تعزم عالسفر
- تجهز للسفر
- في الطيارة
- في المطار
- التاكسي من المطار الى بتايا
- الى الفندق
- المطاعم العربية والمقاهي
- المطاعم التايلندية
- مطاعم اخرى
- التجوال والتمشي في المدينة
- كيف تختار رحلتك؟؟
اخواني اخواتي الاعزاء السلام عليكم,,حبيت اني اقدم بعض معلومات والنصائح والتوجيهات اللي اكتسبتها بفضل من الله من خلال زياراتي لارض تايلند وبالاخص مدينة بتايا احاول من خلالها اني استفيد وافيد فيها الاعضاء والزوار الكرام..
وهذا قليل فيكم يالنشاما..
لما تعزم عالسفر
توكل على الله ولاتنسى تعلم اهلك لان كثير من الشباب يكذب على اهله ويقول انا مسافر الكويت ولا دبي ولا مصر والبعض يقول رايح أخذ عمره ..الخ لا تكذب على امك وابوك لانهم والله يقعدون يدعون لكم من اول ماتطلعون من البيت الين ماترجعون وفي كل صلاة وهذ اللي يكون حافظ لك في ديرة تكثر فيها المشاكل والمصايب..ربي يحفظكم
تجهز للسفر
بيومين عالاقل جهز شنطتك ولاتنسى سجادة الصلاة والكاميرا وطبعا اللاب توب وعليك بالملابس القطنية الخفيفة ترى بتايا رطبة وحارة بعض الشئ..اتصل باكثر من مكتب صرافة علشان تسال عن سعر الدولار او البات وطبعا يختلف من مكتب لآخر اختار السعر الاعلى واصرف كامل المبلغ اللي خصصته حق السفرة بات ولا دولار وشيل شنطتك فوق راسك لين تحطها بيدك في السفتي بوكس حق الفندق ..
في الطيارة
لا تنسى دعاء السفر واثناء رحلتك بتعطيك المظيفه استمارة دخول تايلند لازم تعبيها بشكل كامل وصحيح حتى لا يعرقلونك ويسألونك وين رايح وين بتسكن الرحلة طويلة وقد تصاب الله يكفينا وياكم الشر بجلطات خفيفه قد لا تشعر بها لذا تحرك كثيراً وأشرب سوائل قد ما تقدر ( قرأت هذا الكلام في مجلة طبية )
عند الهبوط
حاول انك تتحرك مباشرة موتنظر الركاب لما يغادرون من الطيارة علشان ماتوقف طابور طويل واتكون في الصف الاخير عند ختم الجوازات..
في المطار
وبعد الخروج من الطيارة تمشي في الممر يجيك يمين ويسار امش يمين مسافة 100مترتقريبا بتشوف على يسارك كاونترات الجوازات اذا شفتها زحمة روح حق الكاونترات اللي على يسارك في الآخر ولاحظ ان الناس مايروحون لها لان مامكتوب عليها جوازات الاجانب بس ماعليك اذا شفت موظف قاعد عالكونتر عطه جوازك كأنك ما عارف شئ بتشوفه بيخلصك والناس لحينها صافته طابور..خلف الكاونترات مباشرة في درج متحرك نزولا تنزل وبتشوف حزام استلام الامتعة دور أي واحد فيهم عليه اسم رحلتك تاخذ شنطتك ومقابل استلام الامتعة في بوابة صغيرونة تطلع منها وخل مشيتك طبيعية لان في واحد قاعد هناك مجرد ما يشك فيك بقولك افتح الشنطة للتفتيش..ماعلينا منه..تطلع من هذي البوابة تمشي يسار ويكون على يمينك ويسارك مكاتب حجز فنادق ورحلات وصراريف كمل على بوابة الخروج عندها بتصيدك وحدة من تاكسي اللوموزين معاها دفتر فواتير بتسالك where u go تقولها بتايا بتقولك come with me اسالها عن نوع السيارة اللي بتعطيكم تقولك كامري2004 وسعرها 1800بات إلين بتايا وفي وحدة ثانية بتقولك فولفو وسعرها 1600بات جربتها مرة وما اعجبتني ومن يومها ما اركب الا الكامري2004 لان في غيرها 2002 الشكل القديم لاتاخذها لان الاولى اجدد وفيها مشغل cd,,طبعا بتسلم الفلوس اول شيئ وبتاخذ وصل بالمبلغ
التاكسي من المطار الى بتايا
في التاكسي اسال السايق يمكن يكون عنده اشرطة اوسي دي عربي لاني مرة وحدة طلب مني التاكسي سي دي (اغاني عربية) كنت جايبه معاي فاعطيته..طبعا الطريق بيكون حوالي ساعتين بس ما بتحس فيه من روعة المناظروالجبال الخضرة حواليك..
الوصول الى بتايا
ان شاء الله توصل بتايا بالسلامة,,بتشوف التاكسي بياخذك حق الشركة اللي تابع لها(ليموزين تاكسي) علشان يعلمهم انه وصل بتايا ..
الى الفندق
طبعاً أنا أتوجه مباشرة إلى منطقة العرب.. وتكثر فيها الفنادق..منها: فندق الفي سي(750-850 بات) والمارين ينسباي(700بات) ومارين منشن(550 بات) و وايت روز منشن(550-600 بات) و p.n منشن(400بات) ورايت سبوت ان ان (550-750بات) تختارون لكم فندق من هذي الفنادق على حسب إللي يعجبكم بعد السكن لا تنسى تشتري شريحة جوال تايلندي والمتوفره في كل سوبرماركت او محلات واسواق في كل مكات تلقى يبيعون شرايح ..
المطاعم العربية والمقاهي
منتشرة وبكثرة ولديهم توصيل إلى الفنادق.. ماعليك إلا إنك ترفع سماعة الغرفة وتطلب من الرسبشين إسم المطعم وهم بيقومون بالاتصال فيه أو خذ الرقم وانت اتصل .ومن هذه المطاعم ..مطعم زهرة الخليج..مطعم أبو عبدالله.. مطعم ابو سعيد.. مطعم أبو سارة.. مطعم أبو كريم..مطعم أبو النور..مطعم ومقهى المواردي.. مطعم أرز لبنان.. ومقهى رضوان للشيشة عنده شيشه ممتازة هذي تقريباً جميع المطاعم العربية الموجودة في بتايا .. وبعضها يقدم الشيشة مثل ابو عبدالله والمواردي وابو كريم ورضوان معسل تفاحتين
مطاعم الوجبات السريعة
الماكدونالز والكنتاكي والبرجر كنج والبيتزا هت وغيرها....
متوفرة في كل مكان..واسعارها جيدة.. على شاطئ بتايا بيتش ..ومركز الرويال جاردن ومركز البيج سي .. وغيرها من المجمعات إللي راح أذكرها أدناه..
المطاعم التايلندية
متوفرة بكل مكان وأسعارها رخيصة .. وراح يعجب البعض أو الاقلية .. وأنا واحد منهم.. ومن وجباتهم المعروفة .. (كبت كونج)>>أرز مع ربيان..، (كبت بو)>>أرز مع قب قب .. ، (توم يوم)>>شوربة سيفود.. ، ...وغيرها من الوجبات..
مطاعم اخرى
وهي عبارة عن مطاعم صينية أو يابانية أو أوروبية منتشرة في أماكن كثيرة ومنها:
مطعم صيني يعد الأشهر في تايلند إسمه: MK في بتايا موجود في مجمعين:مجمع البيج سي ومجمع كارفور..ولا يفوتكم هذا المطعم صراحة أنا من المداومين عليه.. وبشكل يومي.. أسعاره ممتازة وأكله صحي 100% ..لدرجة إنك لما تخلص الأكل يجيبون لك فاتورة فيها كمية الفوائد والفيتمينات التي حصل عليها جسمك من نفس الوجبة اللي أكلتها..وعلى فكرة طريقة الأكل بالأعواد.. لكنها سهلة جداً .. وإللي لاحظته إن كثر ما أجيه ورغم الزحمة إللي أشوفها في المطعم والحجوزات اللي صايرة عليه.. إلا إن عمري ماشفت شخص عربي فيه.. فيعني لو زرتوه وشفتوا شخص واحد عربي تأكدوا إن هذا بيكون أنا.. (اقربو يالنشاما)
التجوال والتمشي في المدينة
بمجرد ماتوقف أمام فندق الفي سي بدون ما تأشر راح توقف لك تكاسي بتايا (وانيت) تركب في الصندوق بدون ماتقول للسايق وين تبي تروح.. ويكون خط سيره من أمام فندق الفي سي بخط مستقيم وعلى طول 5 كيلومتر إلى دوار الدولفين .. إللي هو في آخر بتايا.. وبعدها يعود التاكسي على شاطئ بتايا رجوعاً إلى قرب فندق الفي سي مكان ماركبت .. وهذي الجولة كلها راح تكلفك 10 بات لكل شخص أي: ريال واحد فقط ..
وتقدر في أي لحظة تفكر إنك توقف تضغط على زر جرس في صندوق التاكسي.. فيتوقف ..
المراكز التجارية:- مركز البيج سي (حلو)
- مركز رويال جاردن (حلو)
- مركز مايك مول (مركز تسوق 5 طوابق) فيه كل شئ
- مركز TOPS (تسوق وبولينج)
- مجمع كارفور
- مجمع LOTTOS
المكاتب السياحية
تشوفها وين ماتروح .. وتقدم جميع الخدمات..
حجز وتأكيد حجوزات/ تاكسي/ فنادق/ وغيرها الكثير....
الرحلات
ياكثرها في بتايا والمدن إللي حواليها..
كيف تختار رحلتك؟؟
نفس الشي تروح قدام فندق الفي سي بتشوف باصات صافته.. والكل ينادي على مجموعة من الرحلات.. ومعاهم استكرات وصور لهذي الرحلات.. وعليك بالمكاسر معاهم.. ومن هذي الرحلات:
- الشلالات >>ساعتين خارج بتايا
- حديقة الفيلة>> في بتايا
- حديقة مزرعة التماسيح>>بجانب حديقة الفيلة..
- حديقة (كاوكياو) أي: الجبل الأخضر..قمه الروعة.>ساعة خارج بتايا..
- حديقة (تايجر زوو) >>قريبة من حديقة كاوكياو..
- حديقة الثعابين >> في بتايا
- حديقة بتايا بارك
اماكن اخرى
- عالم تحت الماء
- البيج بودا
- شاطئ جامبتيان
الجزر
جزيرتين حوالي عشرين دقيقة من شاطئ بتايا بالزورق السريع..
وبمجرد ماتوصل إلى شاطئ بتايا بتشوف البعض يناديك ويقول: آيلاند آيلاند.. أو جزيرة جزيرة ..وسعر الرحلة حوالي 600 بات
تجد فيهم البرشوتات والجيت سكي ولعبة الموزة الممتعة وميدان للرماية ويوجد على قمة الجزيرة
البلياردو
تجد طاولات البليارد التي على شكل سنوكر منتشرة في بتايا في الفنادق والبارات والديسكوهات.. وفي سفرتي الأخيرة شفت صالة جديدة مقابل مركز مايك مول شوبينج من أجمل صالات البليارد وأرقاها.. (بس غالية شوي)
البولينغ
مجمع TOPSوهو عبارة عن صالة بولينغ دولية مكونة من أربعين خط..
ويوجد غيرها ولكنها تعد الأفضل والارقى..
الدراجات الناريه – السياكل – الدباب
لا انصح فيها تكثر حوادث الدراجات الناريه في بتايا بشكل رهيب ومخيف انتبهو وسبق اني كتب موضوع عن الدراجات الناريه وخطرها .
بلاي ستيشن
يمكنك ممارسة هذه اللعبة في لوبي فندق الفي سي أو على طريق بتايا الثالث PATTAYA 3RD RAOD فيه محل بس حق هذي اللعبة..
انتباه : لحد يختار منتخب البرازيل لاني حاجزه من الحين..خ
في النهاية اتمنى اني قدرت اقدم ولو القليل لافيد فيه الاعضاء والزوار الكرام
أي استفسار انا حاضر
اخوكم طيار2006
