1. lolh


2. عندكم مجمع الكوت والمنشر بالفحيحيل ، مجمع 360 على الدائري السادس

lolh

اختي الكريمه .. بأول شطر من مشاركتج ماتبين الأسواق ، وبالشطر الثاني تبينهم ؟؟!!
يمكن خانج التعبير .. شوفي وانا اخوج .. الأسواق اولها اكيد الأفينيوز وبياخذ منكم تقريباً يوم كامل لإنه حيل كبير وبركن من اركانه ikea اللي بحاجه لعدة ساعات بروحها .. عندج المدينة الترفيهية بالدوحة انصحكم فيها ، يوم الأثنين مخصص للنساء وبما انكم سعوديات بتاخذون راحتكم اكثر بهذا اليوم ، عندج ابراج الكويت ارشح لكم الريوق فيها الصبح ، المركز العلمي على طريق الخليج العربي ، إذا معكم يهال لا يطوفكم ترى حييل بيستانسون فيه خصوصاً الأوكرايوم .. تحبون المتاحف ؟
عندج سلمج الله متحف بيت الكويت للأعمال الوطنية بالشويخ ( وهو المتحف اللي يوثق الغزو العراقي للكويت ) وفيه رأس تمثال صدام حسين ( شاهدي تقريري عنه بعضويتي )
ومتحف الكويت الوطني على الخليج العربي ، وبالقرب منه بيت دكسن ( ديكسن هو المعتمد البريطاني بالكويت سابقاً )

عندكم مجمع الكوت والمنشر بالفحيحيل ، مجمع 360 على الدائري السادس

المباركية .. محلات قديمه وفيها تمشيات حلوه ، عدة اسواق متعدده من الملابس والدراريع الكويتية ، مكسرات ، حلويات ، مسابيح ، بشوت ، تحف وهدايا إيرانية مطاعم ، مواعين قديمه وتراثية ، كل شي تلاقونه بالمباركية ، يصلح للحريم وانصح لكم تروحون له من الصبح لين العصر ( اريح لكم من زحمات الليل )
المطاعم اللي تطبخ بطريقة قديمة وبأيادي كويتية ( مطعم فريج صويلح ) خلف المارينا مول ..
وعلى فكرة الكويت الحين موسم تخفيضات نهاية الموسم + مهرجان هلا فبراير ، فإستغلوا الفرصة والله الله بالصوايغ ( الهدايا ) للأهل والأقارب ههه
المولات عاد كل مول فيه مطاعم وانتم وذوقكم والله يهنيكم .. رحلة سعيدة ان شاء الله

ياهلا فيج أختي ..
اكيد راح تنورينا بالكويت ..
أخوي أحبك ياكويت ماقصر وياج أنا بدوري بقول لج اللي عندي وان شاء الله أكون كملت اللي كان ناقص الأخ أحبك ياكويت ..
عندج أبراج الكويت فيه مطعم رخيص وحلو تدخلين تدفعين الدخول وبوفيه كامل الفتره الصباحيه اي الفطور تشمل النساء فقط ماعدا يوم الجمعه ف هو يوم مكس أما الغداء والعشاء في كل الأيام مكس يعني رجال ونساء مع بعض ..
عندج مطعم قيصر في الفروانيه أنا أتكلم عن المطاعم الغير معروفه ومنطقه الفروانيه بكبرها اذا دخلتيها كأنج داخله مصرر روعه وبسيطه جدا .. وعندج مجمع الأفنيوز هذا يهبل فيه كافيهات مطله ع الشارع حلو الجلوس فيها .. وعندج الكثير من الأماكن في الكويت الأهم أنج تسكنين في الخليج عشان تكونين قريبه من جميع الأنشطه التجاريه من اسواق ومطاعم لأن فيه هناك شارع المطاعم حلوو جدا كل المطاعم تقريبا فيه ويوونس والسكن هناك تقريبا راح يكون مطل على البحرر ..
أي سؤال بخصوص أي مكان أنا حاضره ..
زياره ممتعه وحافله بالطلعات الحلوه ..
تحيآتي ..

الله يعطيكم العافيه ..
اخوي ( احبك ياكويت ) انا قصدي ان اغلب المواضيع كاتبين عن افضل الاسواق او افضل المطاعم افضل الاماكن السياحيه
يعني فقط تعداد ..
وانا للامانه اجهل مواقعها وقربها من بعضها يعني كان بودي ان يكون عندي زي الجداول السياحيه
مثلا اليوم الاول ( بحسب قرب الاماكن لبعضها وافضلها )
مثلا الذهاب للبحر ( وشرب القهوه والشاي ) بعدها الذهاب للمطعم ال... بعدها الذهاب للسوق الفلاني
او مثلا الذهاب للمركز كذا وبعها كذا وكذا ..
اتمنى فهمتوني ..

1. اليوم الاول :


2. اليوم الثاني :


3. اليوم الثالث :


4. اليوم الرابع :


5. اتريقون ريوق كويتي


6. اليوم السادس :

حياج الله lolh في الكويت وهذا جدول صغير يمكن يفيدج وبعض الاماكن الحلوه

اليوم الاول :

اذا كنتوا واصلين الضحى تروحون الفندق تريحون مده ساعه بس مو اكثر ويفضل انكم ما اتريحون
بعدها تروحون اتغدون في مطعم ميس الغانم (لبناني) منطقة دسمان على شارع الخليج العربي بتجاه سوق شرق عقب الغدا يمكم سوق شرق اتمشون فيه او اذا معاكم ياهال تروحون المركز العلمي هم على شارع الخليج السالميه اذا اخترتوا واحد منهم وخلصتوا عندكم العشا في مطعم نينو (ايطالي) على البحر مباشره والقعده بره حلوه.

اليوم الثاني :

الصبح اتريقون في مطعم لونوتر (فرنسي) على شارع الخليج العربي والقعده بره على البحر وايد حلو ، عقب الريوق اتروحون شارع سالم المبارك منطقه السالميه فيها مجمعات حلوه منها( مريم ، ليلى غاليري، سالميه بلازا،البستان ، الفنار ، لاند مارك ) عقب اتكملون الشارع بعد جدام اشوي راح يكون مارينا مول اتمشون فيه ومره وحده تحجزون سينما للمغرب على ما اتغدون في مطعم فريج صويلح (كويتي) وتردون للمول للسينما ، بالليل تروحون منطقه البدع قهاوي ومطاعم قعدتها وايد حلوه من المطاعم اللي اهناك ( وسابي - ياباني اذا من محبين الياباني انصحكم فيه ، سراي - لبناني ، المياس - لبناني حلوو اكله ، شيليز - امريكي ، تال - هندي لذيذ ).

اليوم الثالث :

اتريقون في ابراج الكويت ريوقهم حلو ومنها تشوفون الابراج وعقبها اتمشون في المباركيه ( سوق شعبي كويتي) كل شي موجود ورخيص وواايد حلو وقعدات شعبيه ، بعدين تروحون ديسكفري مول للياهال يلعبون على الدائري الاول وتردون المباركية اتعشون في دلق سهيل .

اليوم الرابع :

اتريقون ريوق كويتي

( حليبه مهيله ، نخي ، باجيلا ، سمبوسه ، جبن ، طماط ، خيار ، زيتون ، مربى ، خبز ايراني من الخباز ) هذيل كلهم تشترونهم من اي جمعيه يمكم على حسب المنطقة اللي انتوا فيها وبالعافيه، من بعد هالريوق الطيب اتصلون الظهر وتتجهون على المدينه الترفيهيه بالدوحه او حديقة الشعب في منطقة الشعب البحري (يصلحون للكبار و الياهال) لين المغرب على المغرب اتردون الفندق اتريحون اشوي واتكملون طلعتكم على مجمع المهلب في حولي ويمها حولي بارك واتعشون اهناك او انكم تروحون مارينا كرسنت قهاوي ومطااعم على البحر.
اليوم الخامس :
تقضونه كله في الافنيوز مول لانه كبيير وكل شي فيه واماكن الياهال ( بروي وماجيك بلانت) وسينما ومطاعم كل شي متوفر فيه .

اليوم السادس :

الصبح تروحون الكوت والمنشر مول في منطقه فحيحيل وفيها اسواق وايد اتمشون فيها واتغدون في واحد من المولات اهناك وتردون العصر الفندق اتريحون اشوي وبعدين تطلعون على مجمع الرايه والصالحيه هذيل محلات الماركات في هالمجمعين و المنطقه الحره فيلا مودا ، اذا قعدتوا في الصالحيه في القعده اللي بره حلوه قهاوي ومطاعم ( منهم لورنزو ايطالي ، جوني روكتس امريكي ) ،
اليوم السابع :
اذا طيارتكم بالليل رحوا تمشوا في منطقه الفراونيه شارع المخفر مجمعات حلوه وزينه .
بجذي ينتهي الجدول اتمنى لكم اقامه حلوه في ديرتكم الثانية واتمنى اني وفقت في اختيار الاماكن ،،
ادري الجدول زحمه بس حلات السفر جذي جدول مزحوم
وحياكم الله في ديرتكم

ما قصر q8 الي قبلي بس على العموم في توقيعي ( رحلتي الي الكويت ) شغلات حلوة
عن الاماكن السياحية و مواقعها و المجمعات يمكن يفيد

الله يعافيك وين سوق المباركية مرة قلت للسواق ودني للمباركية ونزلني عند سوق خضرة والله يعافيك وين اجد عطر الجاردن وعطر سطور بالدرزن

عطر سطور تابع لمحلات الشايع تلاقينه في اغلب المجمعات منها سوق شرق موجود الشايع وعموما الشايع حتي بالجمعيات التعاونيه عنده افرع سوق المباركيه اذا بتقولين له قولي له ابيك توقفني عند الصيارفه عن سوق ابن دعيج
من اهني تقدرين تروحين المباركيه تتمشين وبعد عندج سرداب الشايع فيها شغلات حلوه تلاقينها