السلام عليكم ورحمه الله وبركاته
حقيقة أول مره أقدم على الشنقن ، ولأني كنت ماني عارف ومتخوف من التعقيد ، حالي حال باقي الأخوان
خصوصا في أخوان هنا في المنتدى ماشاء الله عليهم ما قصروا ، بعض كتابتهم كانت تخوف وترعب
ما أبغى أظلمهم بس يمكن كانت لهم مواقف سلبية
كل هذا الكلام وغيره كان محيرني
فما كنت عارف أعطيها معقب ولا أروح بنفسي ، صراحه أسعار المعقبين خرافية أرخص واحد لقيته 1000 ريال !!
فقلت يا ولد تشجع وقدم بنفسك ، إلى متى حنا السعودين كسالى ، ونبغى كل شي لين عندنا
الحاصل قدمت على الفيزا بنفسي قبل أسبوعين والحمد لله أكرمني الله عز وجل اليوم صدرت الفيزا لي ولزوجتي لمده 6 أشهر ( لأني أول مره أقدم على الشنقن ) ووفرت أكثر من ألف ريال كان راح يلهطها المعقب
ولأني صراحه شفت جشع المعقبين ، وحيره بعض الأعضاء فحبيت أضع بين يديكم الخلطة السرية :
1) تذاكر السفر ، طبعاً هذي ما فيها مشكله لأني شريتها بنفسي ، الذهاب باريس والعوده من مكان آخر
2) رحت لمكتب سياحي واصدرلي تأمين طبي من شركة Axa للتأمين ، قلي كم شهر تبغى التأمين قلته يفرق في السعر قلي السعر ، قلتله حط يا أخوك سنه ، وعطاني تأمين سنه ب150 ريال للشخص ، لكن مصداقية هذا التأمين مدري عنها
3) فوتشرات السكن ، كنت ناوي أحجز الفوتشر من النت ، لكن قلت خليني أحاول مع راعي المكتب وقلتله ، يا أخوك أنا الحين مطلع من عندك التأمين ، ورى ما تسويلنا حجز سكن معاك مع البيعة ، الرجال ما قصر وسوى لي فواتشر ، بس حطلي كامل المده في باريس ، قلتله بس أنا ماني راجع من فرنسا ، قلي ما راح يدققوا لا تشيل هم
4) تعريف بالراتب باللغة الإنجليزية ، الحمد لله ما احتجت أترجمه لان العمل اصلاً عطاني أياه باللغة الإنجليزية
5) تعبئه عدد 2 استماره طلب لكل شخص مع وضع صوره على كل طلب
6) صوره من كل جواز سفر
طبعاً هذي الاوراق اللي أخذوها مني ، لكن الصراحه أنا روحت لهم مدجج بكم هائل من الأوراق ، كنت خايف يردوني
روحت يوم السبت الساعه 8 إلى دقائق وأنا عندهم ، لقيتهم مسوين صف للجوازات الشخصية وصف للمعقبين
المهم الاولوية للشخصيين ، حتى لو تأخرت يعني ربع ساعة ودخلتالقنصلية ، قلهم أن جواز شخصي عند البوابة راح يقدموك على سرى المعقبين ، ولا عليك من المعقبين قلهم أنا جوازي خاص بي ، راح يخلوك تعديهم فوق خشومهم ، صراحه أنا اشفقت على المعقبين ، يتمرمطوا في القنصلية مرمطة محترمة
المهم دخلت القنصلية وفي موظف سوداني عن البوابة الداخلية أخذ مني اوحده استماره من كل طلب ودخلني
في شباك آخر ياخذ منك الأوراق ، وتعطيه رسوم الفيزا 60 يوروو ، طاحت علي 286 للجواز
طبعاً أوراق كثيرة قدمتها له رجعلي هيا على طول ، كشاف الحساب وبطاقة العمل والأحوال والعائلة
الشباك الأخير ، سيدة فرنسية تسألني بلباقة بعد كلمة بنجور ، فغست فيزا ؟ ، قلتلها نعم
شيكت على الأوراق واهم ورقة نظرت فيها بتمعن تام ورقة تعريف الراتب من العمل
وقالت راجعنا بكره
اليوم اللي بعده عطونا الجواز مختوم فيه تاريخ المراجعة بعد أسبوعين
واليوم من الصباح الباكر وأنها عندهم ، سلمتهم الجوازات ، والساعة 2.30 عطوني جوازي بالفيزا والحمد لله
فالشغلة يا أخوان سهله وكلفتني على الجوازا مثل ما أنتم شايفين حدود 400 ريال
أتمنى أكون قدمت شي مفيد لكم
تحياتي