نشر في سويسرا

اول مره بسافر وقصتي قصه

بلاستيكه

14-06-2022 - 11:54 pm

السلام عليكم

ودي اشوف الطبيعه وصخب المدينه ودي بالراحه والاستجمام وودي اتسوق

السلام عليكم

توني كتبت الموضوع وتعبت وانا اكتب قصتي الحزينه واخر شي فصل الانترنت وراح كلامي الحين مااتذكر شنو كتبت
المهم اطلب من الله اولا ان يسخر لي عباده الصالحين الي يدلوني على طريق الخير والسداد والراحه وأسأل الله العلي القدير بدعوة بظهر الغيب لاخواني واخواتي جيمعهم بان يرزقهم خير الدنيا وخير الاخره والي يساعدني بشكل خاص
اول مره بسافر وترى ماتعديت بحياتي كلها منطقه ابعد من مصر وياحيل الله على دول الخليج حتى بدون عمان مازرتها
ودي اروح لسويسرا وفرنسا والمانيا لمدة 20 يوم وتكون منطقه المغادره غير عن منطقة الوصول ابي اتنقل بين هالدول بقطارات ابي اسماء المناطق الي اروح والاماكن الي اسكن فيها مابي فندق خمس نجوم ماتهمني الرفاهيه بالفندق اهم شي مكان نظيف ومرتب وامان ومعامله زينه ماتفرق معاي فندق شقه كوخ شاليه اي شي

ودي اشوف الطبيعه وصخب المدينه ودي بالراحه والاستجمام وودي اتسوق

اللي بيساعدني ويعطيني مخطط رحلة جزاه الله الف خير بيكون مع سوالف النت من مواقع لحجز الفنادق والرحلات وبطاقة السويس رول وفيزا ومتطلبات القصه كلها يعني لاني جد جد جد ماعرف ولالاشي
وترى والله اني عمري مادشيت منتدى فرعي حق السياحه والسفر والحين الاقي نفسي بمنتدى متخصص للسفر لاني صراحه وانا اسوي بحوث بالنت لقيت انه منتدى عظيم رفع الله شأن القائمين عليه واعضاءه واعطاهم الصحه والعافيه
ارجوكم لا تبخلون علي بالرد وعلى فكره انا بروح بس انا وزوجي يعني بخلي اليهال بالديره فابي شي عدل مدل
وشكرا مقدما

التعليقات (9)

طبشوره

15-06-2022 - 03:16 am

يا ريت تحددين الميزانيه و وقت السفر
هل راح تستاجرون سياره في سويسرا بحيث تسكنون بعيد عن السنتر ارخص
أو تعتمدون على المواصلات العامه؟
ألمانيا من رأيي تستبعدينها كفايه دولتين أو تخلينها ألمانيا و النمسا
4 أيام باريس و الباقي في سويسرا
المدن اختاري اللي يناسبك من الدليل السياحي و تقارير الأعضاء https://artravelers.com/p/re/144972

بلاستيكه

15-06-2022 - 04:17 am

6am 6am
أول شي كل الشكر اخوي على الرد السريع
زوجي مايبي يسوق سيارة هناك فاعتقد راح نعتمقد المواصلات العامه وترى احنا نمشي بعد اثنينا صغار وخفيفين
ودي اروح المانيا لو حتى ثلاث ايام وودي اخلي ميونخ اخر وجهة عشان السوق
اخوي بالنسبه للمدن انا مااعرف بس قريت عن ديفون وباريس بفرنسا و انترلاكن بسويسرا (يارب يارب اكون قاعده اكتب الاسامي صح ) و ميونخ بالمانيا
وبالنسبه لموعد السفر مادري انت شرايك اول سبعه؟ او اخر سبعه؟
انا عندي بس شهر 7 و8 اجازة
وارجو من الاخوان الافاضل ان يتحفونا بما لديهم
والشكر موصول للجميع

طبشوره

15-06-2022 - 05:18 am

باريس 5 أيام
جنيف أو مونترو 5 أيام
انترلاكن 7 أيام
ميونخ 3 أيام
من نهاية 7 إلى 10 أوقست تزدحم جنيف بسبب الكرنفال إذا مو حابين هالشي ممكن تسكنون في مونترو أو لوزان أو تغيرون تاريخ سفركم

amo0on

15-06-2022 - 06:19 am

ههه بس عجبني النيك نيم حقك واجد بصراحه ههه السموحه
ترى الاخوان يساعدونك ويسون لك برنامج وبالتفصيل بس محتاجه بعض الاشياء
اولا تقراي في البوابه اعطي نفسك وقت للقراءه
ثانيا تححدي لنفسك وللناس الا تبي تساعدك امورك
الميزانيه ---- الوقت ----- عدد الاشخاص ----- وسيلة التنقل (استاجار سياره او قطار) ------ تحديد الا تبينه يعني لاتحيرين نفسك كثير ------ تاخذي راي الاخوان لان والله راح يسوون لك جدول احسن من المكاتب السياحيه بالف مره
بجد بجد عاجبني النيك نيم حقش ههه

swiss love2001

15-06-2022 - 07:20 am

اهم شي الميزانيه خصوصا مع كثرت التنقلات

بلاستيكه

15-06-2022 - 08:21 am

ام 3000 كويتي الى 3 ونص مع التسوق هذا كل اللي اقدر عليه؟ يكفي؟؟

swiss love2001

15-06-2022 - 09:22 am

بلاستيكه
اذا من غير تذاكر الطيران تكفي انشالله

بلاستيكه

15-06-2022 - 10:23 am

اخواني بعد التجول بين التقارير رسيت على الآتي وأتمنى تعلقون على كلامي
الوجهة : كويت - زيورخ (ترانزيت بدبي) على الخطوط الجوية الاماراتية
العودة: ميونخ - كويت (ترانزيت بدبي ايضا)
المدة 4 أيام جنيف- 4 ايام باريس (موزعة بين باريس وديزني) - 4 أيام ميونخ ألمانيا
وقت السفر 30-7 الى 14-8
عدد المسافرين: أنا وزوجي فقط (واحنا اثنينا صغار فعادي لنا كثرة التنقل والمشي)
طبعا نيتي أنا السكن في جنيف او ديفون
وهذي الأماكن اللي أود زيارتها :
سوق الأحد ديفون
وبيت هايدي
لوزان حديقة الحيوانات
قلعة شيللون
رحلة الى مصنع نستله كالير للشوكولا + منزل الجبن +منتزه جبل ميلسون - قرية غريير + قلعة غريير
جنيف سوق الاوتليت او مجمع سيني
زيارة شلالات
البحيرة الزرقاء او بحيرة ديفون
والآن : هل يمكن أخذ سيارة فقط في سويسرا ؟ لأني أنوي ان استخدم الباص الاحمر في باريس ... ولم اقرر ماسنفعله في المانيا بس بكل تأكيد إما قطارات او مواصلات عامه؟؟؟؟؟
بالنسبة للرحلات المدرجة هل راح تفيدني بطاقة سويس ... نسيت اسمها ؟؟؟؟؟؟
بالنسبه للسكن انا في طور بحثي في فنادق النجوم الثلاث أو الشقق المفروشه بس بكل تأكيد اللي عنده أي اقتراح انا راح اخذه
قولولي رايكم بالمناطق وشلون اقسمهم ومشكورين

دمعة 2009

15-06-2022 - 11:24 am

اختي الفاضلة
انتي راح تنزلين في مطار ميونخ كيف سوف يبدأ البرنامج جنيف فللي اعرفه ان جنيف بعيده عن زيورخ اكثر من 4 ساعات بالقطار والله اعلم
التخطيط السليم الى كل رحلة يكلل النجاح دائما
ومن ملاحظتي انك اخترتي فقط عواصم الدول الاوربية فالعواصم دائما يبعد عنها الطبيعة والتأمل الذي يبحث عنها المسافر وتكون فيها الزحام بالناس والسيارات ...
نصيحتي لكي ابتعدي عن العواصم فالخيار لك بالاخير اختي العزيزة
فأسمعي نصيحة دائما أقرأها في بوابة سويسرا وتقول (( من يسافر الى سويسرا ولم يجعل انترلاكن في جدوله كأنك لم تزر سويسرا ))
فأجعلي جدولك كالتالي :
النزول في مطار ميونخ الذهاب مباشرة الى ... انترلاكن 6 ايام منها زيارة لوزيرن ... باريس 4 ايام ... والباقي ميونخ
لا اعرف المسافات بينهم ولكن لدي خبرة بسيطه في اوروبا لسفري النمسا والمانيا
مع اجمل تحيه
اختك
دمعة

سويسرا المسافرون العرب

اول مره بسافر وقصتي قصه

السلام عليكم

ودي اشوف الطبيعه وصخب المدينه ودي بالراحه والاستجمام وودي اتسوق