انا مثلج اول سفرة لي بتكون هالصيف =)
من خلال بحثي في المنتدى .. حسيت جولد كوست افضل مدينة سياحية بكل الطرق والجو اميل للبرودة فيها
فيها وايد انشطة وحدايق .. اذا تبين مثل ما ذكرتي الكوالا والكنغر عندج Australia zoo
والالعاب وايد Dream World , Movie Worldو غيرها الكثير
والسكن حسب ما نصحني الكل ف شقق فندقية .. بيفيدونج الاعضاء بتجاربهم
عندج تقارير الاعضاء خذي لفة على تقرير ليدي بيرد و ام نواف ,, بتستفيدين وايد ^^

تسلمين لي يا مس كاندي على ردج السرييع وبشوف تقارير الأعضاء واتمنى الكل يشاركني برايه وبنصايحه

ام عبود . . منوره عزيزتي
بخصوص الترانزيت يعني الحلو فيه اول شي راحه للمسافر وثاني شي يضرب عصفورين بحجر يعني يزور دولتين . . وانا افضل الترانزيت عندج خطوط وايد توفر لج الترانزيت وتقدرين توقفين في تايلند - سنغافوره - ماليزيا او دايركت مثل ماقلتي
انا عن نفسي قولد كوست الافضل واذا تبين تقعدين المده كلها في مكان واحد قولد كوست هي الافضل لان باقي المدن بتملين فيهن عكس قولد كوست فيها رحلات وايد لو تقعدين شهر ماتخلصينهن وقولد كوست بارده بس اذا الجو كان مشمس شوي يكون الجو حار بس مايوصل مثل حرنا الكنغر والكوالا بتلقينه في كل مكان بس لو تاخذين لفه على التقاير وايد بتفيدج والشقق افضل وخذي وياج بهارات عشان تنوعين تاكلين من المطاعم وتطبخين عندج شقق السيركل وعندج الشيفرون وكل شيء مذكور في المنتدى بس لو تاخذين لفه وبعدها لو عندج اي سؤال الكل بيفيدج بس في البدايه خذي فكره عن الدوله وموفقه

تسلمين لي عزيزتي ليدي بيرد يزاج الله خير اكيد بقرا تقريرج ومعليه استحمليني اذا بثقل عليج بالأسئله

ام عبود 2003
بالعكس حبيبتي اي وقت كلنا حاضرين نعين ونعاون

اختي ليدي بيرد طالبتنج ممكن تسوين لي جدول حلو على كيفج
يكون فيه الاماكن اللي سرتي لها ووايد عيبتج وترتبين لي الاماكن حسب قربها من بعض
وشو احسن شقق للسكن قريت التقارير والله واحس دخت زياده لأن اللي ماعنده خبره باستراليا احس يكون شرات الضايع
مايعرف يدبر اموره
وعندج فكره عن طيران الامارات فيه رحلات دايركت لين وين ف استراليا؟
وصج بالنسبه للفيزا كم يوم تاخذ لها من بوظبي ؟؟ ووين مكانهم اذا عندج فكره
السموحه منج خيتو بس والله ف خاطري اسير جولد كوست احسها روعه وانتي ماشاءالله عليج خبيره بأستراليا
وادري بج مابتقصرين ويايه إن شاءالله

ام عبود 2003

مابردج بس عطيني اعمار الاطفال اللي وياج و هل تبون كله العاب ولا تنوعون بين رحلات بريه وغابات وحدايق الحيوانات
وطيران الامارات له رحلات دايركت من دبي لين برزبن وفي بعض الرحلات يكون عندج محطه توقف يا في الروحه او الرجعه
تقدرين يا تسوينها من النت او تسوينها من المكتب والمكتب يأخذ اسبوع الى شهر يعني على حسب الزحمه اللي عندهم
ومن النت تقدرين بعد اطلعينها وعندج موضوع مثبت في القسم عن طريقتها وماعندي فكره للاسف عن مكانها في بوظبي
حاولي تتصلين في القنصليه وتسألينهم والشقق انا عيبني الشيفرون والسيركل بس ان السيركل افخم اثاثه وايدد
من الشيفرون بس مافيه حياه مثل الشيفرون يعني طول الوقت هادي وهاي ميزه اللي يحب الهدوء شوفي مواقعهم والشقق
واختاري اللي يناسبج وبعد نصيحه يوم بتحجزون من المكتب طلبوا منهم اذا كنتوا في السيركل تسكنون في الشقه اللي تكون في اخر الطابق وتنتهي برقم 5 لانها الاوسع وبعد طلبوا الشقه في الطوابق العاليه و مطل على المحيط
http://www.mantracircleoncavill.com.au/

مرحبا ام عبود
الاخت مميزة استراليا ما قصرت في الرد .. وبصراحة لها تقرير اكثر من رائع اخذت عليه نجوم مضيئة مثلها
واحب اشارككم في الرد على بعض استفساراتك
طبعا اختيارك لاستراليا صادف محله لانها بلد جميل ويصلح للسياحة لجميع الاعمار بالاضافة إلى الامن وبشاشة مواطنيه

• فترة السفر التي اخترتيها 20/7 - 10/8 طبعا تصادف فصل الشتاء في استراليا وكذلك يصادف دخول رمضان المبارك

الذي تكون غرته ان شاء الله في 1/8 ورمضان جدا جميل هناك ويومة قصير بعكس اوروبا

• بالنسبة للمناطق الاكثر سياحية لنا كخليجيين بالتنازل

جولدكوست بها كل احتياجاتك السياحية
سيدني
مالبورن
وهناك ايضا اماكن حلوة مثل كاريين وجزر ... الخ ولكلن روادها لانهم مشهورات بالغطس والسياحة البحرية
لكن نحن نركز على هذه 3 مناطق

• ابرد المناطق السياحية هي مالبورن ، سيدني ، جولدكوست
• نظام السكن في عموم استراليا فتكثر الشقق الفندقية المفروشة اكثر عن الفنادق وبطبعنا نحن الخلييجين تفصل

الشقق لانها تجمع العائلة تحت سقف واحد واكثر راحة في التحرك وهي مزودة بكل لوازم المطبخ والغسيل واما افضلها
فتم ذكرهم من قبل الاخت ليدي بيرد لكن ايضا هناك شقق فندقية جيدة وكذلك يعتمد على ميزانية الشخص خاصة
وان الدولار الاستراليا اليوم ضارب ضربة في العالي 3.8 درهم مقابل دولار واحد
ويمكنك الاطلاع على هذا الموقع والاختيار السكن بين المدن الاسترالية
http://www.stayz.com.au/

• طيران الامارات له 9 رحلات يوميا إلى استراليا سيدني ، مالبورن ، بريزين ، بيرث

وكلها مباشرة لهذه المدن ، وايضا يوجد توقف في بانكوك ، سنغافورة اما بيرث فالطيران لها مباشر 9 ساعات

• الفيزا يمكن استخراجها مباشرة من على النت على هذا الموقع

http://www.immi.gov.au/e_visa/visitors.htm
واذا حضرتك من العاصمة ابوظبي فهذا عنوان السفارة
شارع زايد الأول، بناية المهيري سنتر، برج المكاتب. هاتف: 7500 401 02
واذا كنتي في دار الحي فهذا موقع استخراج الفيزا
http://www.vfs-au-gcc.com/
ورفم هاتفهم 3553258 04
ونرجو السموحه
مع تحياتي

اختي ليدي بيرد
اخوي hml
ألف شكر لكم على ردودكم وتجاوبكم السريع ويايه يزاكم الله بكل خير ربي يوفقكم ويرزقكم خيري الدنيا والآخره