هلا أخوي
أتمنى لك التوفيق وسفرة سعيدة ان شاءالله
أنا نفس حالتك مسافرة في آخر يونيو بإذن الله وبآخذ معاي لأول مرة طفلي اللي بيكون عمره 8 أشهر
ومتخوفة جداً من هالشي لأني مو عارفة شلون بيكون الوضع وشنو بحتاج أودي له وشنو اللي ممكن نحصّله هناك
دخلت أضم صوتي لصوتك وأطلب نصايح وخبرات الاخوة والاخوات الكرام : )
كم عمر طفلك الله يحفظه؟

ضيْ
سلام عليكم اختي الكريمه ضي
الله يحفظ ابنك ان شاء الله ويكون من الصالحين امين
وانا راح يكون عمر ابني في هالفتره قريب ال 9 شهور
فالعمر راح يكون في نفس الفتره تقريبا
واتمنى من الاعضاء يساعدونا ويفيدونا بخبراتهم للي يودون عيالهم
لاني والمدام نفس الحاله متخوفين شوي ومب عارفين شنو الاجراءات اللازمه
فاتمنى حد يفيدنا في اقرب وقت
وان شاء الله الاعضاء مايقصرون

انا رحلتي منتصف شهر 5
وبيكون طفلي معاي 3 سنوات ونص
وناوية آخد معي دواء لكل شئ ، خاصة انه في النمسا مايعطوك الدواء الا بوصفة من الطبيب وانا ولدي سريع المرض
لذلك بآخد مضاد حيوي + خافض حرارة(شراب / تحاميل) + دواء للاسهال + ادوية للزكام والكحة
+ مرهم (سمعت بعوضهم مايمزح) + مقياس حرارة + عدة البخار (ضروري لولدي)
عساني بس مانسيت شئ

السلام عليكم
الصيف اللي فات رحنا سويسرا واخذنا معنا ولدي الصغير ومعنا عايله معهن بنتهم الصغيره
المشاكل اللي واجهتنا ..
الفنادق ماكان فيها مطابخ فظطرينا نطبخ عشاهم وفطورهم في البويلر وعند البلكونه بعيدا عن حساسات الدخان خ
عربة الطفل ..
حنه اعتقدنا ان ولدنا كبير ومايحتاج (3 سنوات ) اثاريه مسكين يتعب وايد وينام بسرعه فيصير حمله متعب
والعايله اللي معنا العربه تبعتهم غير عمليه ..احس انحاسوا فيها وايد مع ان وضعهم كان افضل من وضعنا
المشكله الثالثه كانت باننا ما استأجرنا سياره ..ولا كانت أسهل من الشل والحط

deserthunter
شوف اخوي بالنسبة للطفل اهم نقطة انك تاخذ معاك عربة الأطفال ولو كانت مع واقي للمطر يكون افضل
واهم شي تكون العربة واسعة حيث يستطيع النوم فيها
الامر الثاني احرص انك تاخذ معك بعض البساكيت والاكلات الخفيفة مثل خبز اللوزين ان كان الصغير ياكل
اما بالنسبة للسيارة فنصيحتي لك لاتاخذها في فينا لان فينا مواقفها قليله وفيها الاندر قراوند يسهل لك تنقلاتك
واذا كانك بتروح لسالزبرج فخذها من هناك من مدينة فيلاسنق الالمانية حيث ان السعر في المانيا ارخص بحدود 40 % من باقية الدول وهذه المدينة قريبة جد على حدود النمسا ولاتبعد الا حوالي 7 كلم فقط
واذا حجزت السيارة اطلب معها كرسي أطفال لأنهم يدققون على هالنقطة وممكن يوقفك رجل المرور اذا كان الطفل مشخص قدام مع امه مثل مانسوي ,,
اما بالنسبة للسواقه فهي سهلو وواضحة اهم شي احرص ان يكون معك القارمن والامور بتصير على ماتحب
وبالنسبة لافضل الشركات فعدنك سيكست وايفز ويورب كار هي الرائدة
واي استفسار احنا حاضرين

h&a&m
سلام عليكم اختي
جزاكم الله خير وماشاء الله عده كامله
ولاتنسين الاكل والسيريلاك ايضا
شكرا لكي على هذه اللسته وان شاء الله تفيدنا

دلع حمد
سلام عليكم اختي الكريمه
جزاكي الله خير وفعلا نصائح مهمه سوف استفيد منها الكثير
يعني الرضاعات تختلف من هنا ولا الطفل يكون متعود على نوع معين مثلا
وبالنسبه لاكل الاطفال اخذه من هنا ولا هناك يبيعون ولو يبيعون ايش افضل الاشياء ؟
وبالنسبه للعربانه لو رحت زيلامسي الشلالات هل تخلق لي مشكله ؟
جزاكم الله خير

الحر
سلام عليكم اخي الحر
تسلم وجزاك الله خير وماقصرت على تجاوبك معي
زين العربه راح تسوي مشاكل في زيلامسي مثلا لو رحت الشلالات والاماكن الطبيعيه ؟
وسؤال ثاني ماعليك امر
انا ناوي اقعد في فيننا وبعدها الى زيلامسي
هل ااجر سياره قبلها بيوم ولا اروح بالقطار ؟
ولو اجرت سياره في زيلامسي افضل ام لا ؟
وكم يوم تقريبا اجلس في زيلامسي ووين اروح ؟
اتمنى تفيدني اخي الكريم وفي انتظار ردك
ومشكور مقدما

السلام عليكم ..
اضافه بسيطه .. هو الاطفال الصغار دون السادسه تجنبوا الصعود بهم الى المرتفعات مثل .. اكسبريس .. وكابرون .. وغيرهم .. القرب من مجرى الشلال بيكون بارد على الطفل فيفضل عدم الاقتراب الى مجرى الشلال كثير ... غالبا لاتوجد الفعاليات المناسبه للاطفال دون سن السادسه ... عدم تعرضهم للهواء او الامطار بحال تغلب الجو وخصوصا بالريف ..
واهم الادويه هي مضاد حيوي .. خافض للحراره مفعول قوي ... ادوية الحساسيه واهما ...( زيرتك ) او ما شابه .. ادوية الكحه ... مقياس حراره.. والحذرمن الاطفال الذين يعانون من الربو .. فيجب مراعاة الاماكن المراد الوصول لها ..
بعض ما ذكر من اعمار الاطفال الله يحفظهم صغار جدا فهم دون السنتين .. لهذا يفضل لو كان احد يرعاهم في بلدكم تتركهم .. والله المستعان
رحله موفقه للجميع