1. 8- اخذنا فندق 4 نجوم بجاكرتا الغرفه الصغيره قريب من 400 ريال


2. ازعاج وقلق وضيق وبدون مكيفات واللي يسكن فيها مفارقته الوناسه


3. (انا اتخيل العريس اللي يسحب حريمته بين النمور والفيله .. ابوك جو )


4. في اوربا شيخه الديار .. وقبله العربان المسافرون ..

بسم الله الرحمن الرحيم ...
ايها المسافرون الجميلين ايتها المسافرات المزركشات
معاشر العوربان العاربه السائحه في بلاد الله .. ايها الشعب الكريم
يجري الحديث دائما عند ذكر اندونيسيا عن رخص الاسعار .. وانها مناسبه و .. و... غيره من كلام يصب كله في تصور ان اندونيسيا بلد رخيص ..
والحقيقة اقولها وانا توي جاي من اندونيسيا الخضراء .. البلد ساحر ومريح وآمن جدا .. وتشعر بانه من جنان الله في الارض اضافه الى سهوله طباع اهله وثقافتهم الودوده ..
ولكن
البلد ليس رخيصا ابدا .بل هو بلد عادي جدا
بحكم ان القيادة عكس الخليج (السواق يمين ) فانك مربوط مع سواق كظلك .. ماتقدر تنفلت لحالك
وهذا يكلفك الان حوالي 400 الف وخلونا نتكلم بالريال...
بالعربي يقص عليك حوالي 200 ريال مع وجباته
(طبيعي ماراح تاكل وهو برا ) وتخيل انك ملزوم فيه وقرقرته نهاره كله يسولف عليك .. فكر لو انت ومرتك كل همسه معكم ادمي يتسمع فيكم
2- الفلل في بونشاك اقل فيلا نظيفه نوعا ما وتقدر تسكنها من 700 الف وفوق يعني 300 ريال والزينه تاصل 400 ريال .. علما ان 87% منهم ماهي زينه ولاهي حول الزين
يعني خياراتك محدوده انت ياللي تدور الزين .. والنظافه
3-التكلفه من جاكرتا للجبل حوالي 200 ريال .. وهو مشوار عادي زي المملكة لمسافه 150 كيلو
4-البقالة السعودية مهبوله الاسعار دبل الدبل ودبلين ونص بعد.. بحكم انها مستورده على قولتهم -والله انها اغلى من اوربا -
5-عشان تستانس لازم تدفع هذا خمس ريال وهذا تعطيه عشره وهذا ينصب عليك ويبلشك وتعطيه
6-الدخول للتمشيات 25- 30 ريال للشخص (تسعيرات رسميه لايتفلسف احد ويقول لعبو عليك )
7- التيس المزعوم ابلشونا فيه رخيص ورخيص ويوم جينا اندونيسيا لقينا تيس امه (قطوة ) وزنه حوالي 5 كيلوا او مايجي خمسه كيلو وسعره 200 ريال ولحمته مره ونفسيا من شكله كانك تاكل بسيسه

8- اخذنا فندق 4 نجوم بجاكرتا الغرفه الصغيره قريب من 400 ريال

• *وين الرخص يارواد اندونيسيا .. لاتقعدون توهقون العربان المسافره ويجيبون العيد ..
• * اندونيسيا بلد عادي جدا والمصروف فيه عادي والفلوس تطير غصب عليك مثل اي بلد
• * المجمعات السكنيه اللي يقولون الربع هنا مريناها ..

ازعاج وقلق وضيق وبدون مكيفات واللي يسكن فيها مفارقته الوناسه

• * بالعربي انت تبغا تستانس انسى الرخص والاسعار المعقوله بتدفع يعني بتدفع
• * المسافر الوحيد لو راح هناك نتفوه تنتيف وخسر قريشاته بحكم ان كل شي عليه
• *نظام القروبات هو الاحسن مع ان الفكرة بايخه اني اروح ومعي 6 اشخاص زي ماشفنا هناك تصير هيصه ماهي سفره
• * المطاعم العربية اسعارها اسعار دبي .. لشخصين رز ودجاج وسلطه عادي ومقبلات تحاسب 200 ريال زي السلام عليكم
• * الجبل خصوصا بلية مابه من الحلا ولا شي ولاحوله الا حديقة الحيوانات .. وهي شي بايخ ممكن تشوفه حتى بالرياض .. أسد وزرافتين ونمر طفشان معلق رجليه بشجره ..

(انا اتخيل العريس اللي يسحب حريمته بين النمور والفيله .. ابوك جو )

خ
نصيحتي للمسافر لوحده زود ميزانيتك 3000 ريال وطر ياعمي لاوربا واستمتع وبلا اندونيسيا بلا هم .. مادام ان المصروف شبه واحد ..وخذ ببالك ان اسعار تذاكر اوربا قد تقل عن اندونيسيا بحول 1000 احيانا .. يعني موفر تذكره بعد..و للعلم السيارة باوربا تطلع حوالي 250 ريال مع الديزل وانت رايق ومبسوط وموترك تحت رجلك ماهو معلق مع سواق تقل جني

في اوربا شيخه الديار .. وقبله العربان المسافرون ..

السكن (المقبول والنظيف) راح تدفع فيه حول 350 ريال .. نفس سعر غرف الفنادق الاقتصاديه باوربا 60 او 70 يورو وربما اقل .. والاكل حولك حواليك والخيارات باوربا اكثر .. ويقال ان رحت لاوربا شيخة الديار .. ماهو لاندونيسيا اللي تقل طاب لك مصنع دبابات
هذا وكتبه اخوكم العائد من اندونيسيا التائب منها مرة اخرى
اليعربي المسافر ..
الله يعين على عشاق العمة بيمصعون رقبتي لكن الحق احق ان يتبع ..
توهقون الناس يروحون هناك يدورون الرخص والبلد طنج مافيها شي جديد .. وبعضهم توهق وراح هو وحريمته شهر عسل ..