1. إخواني أعضاء منتدىالمسافرون العرب السلام عليكم ورحمة الله وبركاته


2. اليوم الأول:


3. وهذي صورة الساحة


4. اليوم الثاني:


5. وهذي صور الدانوب الأزرق كما يسمونه


6. وهذي صور فيينا من فوق البرج


7. وهذه صورة للشارع


8. وهذه واجهة الفندق من موقعهم:


9. وهذه صورة لساحة المدينة ومتحف موزارت


10. وهذه صور لسالزبورغ القديمة والسوق التجاري


11. وهذه صورة لسالزبورغ في الليل على ضفة السالزاك


12. اليوم الخامس:


13. وهذي صور لها


14. وهذي صورة للحديقة


15. يحلفون لو انه عندنا مايكمل ساعة الا وهو مشوي


16. اليوم السابع


17. اليوم الثامن:

إخواني أعضاء منتدىالمسافرون العرب السلام عليكم ورحمة الله وبركاته

تجدون برفقة هذا الموضوع( حشا معاملة حكومية) صور التقطتها عدسة كاميرتي الجديدة(فرحان فيها) لبلد الأجازات وعروس جبال الألب...... النمسا الساحرة !!! الساحرة بجمال الطبيعة التي وهبها الخالق إياها ولسان حالها يقول أنا جنة الله في أرضه !!!
من دون مقدمات ( وش أطول من كذا ) أسرد عليكم التفاصيل وكأني بكم تقولون أخلص علينا لايكثر
والموضوع فيه أكثر من 50 صورة والله يعين حقين الدايل اب على طول التحميل
الرحلة كانت في شهر أغسطس 2007 والتخطيط لها كان قبل شهرين من خلال عمل جميع الحجوزات عن طريق شبكة الإنترنت ومن خلال أحد المواقع الأوربية ذات المصداقية.

اليوم الأول:

انطلقنا من الرياض في يوم الأحد 19/8/2007 الساعة 4 فجرا إلى دبي التي وصلناها 7 صباحا بالتوقيت المحلي وقعدنا ساعتين في انتظار الإقلاع إلى فيينا التي وصلناها بحمد الله الساعة 3 عصرا بالتوقيت المحلي هناك وكانت أولى المفاجآت بانتظارنا !! وصل جميع العفش ماعدا عربة بنتي !! قعدت ساعة أدور عليها مع العفش المتروك ولكن بدون فائدة المهم قالوا لي حقين الجمارك روح سوي بلاغ وأروح وأعطيه رقم القطعة وشكلها ورقم الفندق اللي باسكن فيه وقالوا لي روح وحنا أذا لقيناها بنوصلها لحد الفندق !! قلت الله يخلف على عربيتنا ونويت اشتري وحدة جديدة !!
وأخذنا تاكسي ورحنا للفندق وألقى الحجوزات كلها تمام والفندق نظيف وهادي وحطينا عفشنا وعلى طول طلعنا ومعنا الخريطة وركبنا مترو الأنفاق وكلها دقايق ولا حنا بوسط البلد ونطلع من الدرج حق المترو ونلقى بوجهنا ذيك الكنيسة الضخمة واسمها كنيسة القديس ستيفن وهذي صورتها
وحولها ساحة مشاة مليانه ناس من كافة الأجناس بما فيهم ربعنا اللي لابسين شمغ وعقل وفيها أنواع الاستعراضات وتلقى الناس متكومين على هذا اللي يغني وإلا يسوي حركات بهلوانية اوذاك اللي لابس زي تنكري وواقف زي الصنم شوفوا الأحمر اللي على اليسار وللي يبغى يدفع لهم حاطين قدامهم زي الصحن تحط فيه الفلوس وعلى جانبي الساحة عدد كبير من المقاهي والمطاعم واللي يبي يتخيل الوضع يتذكر مغامرات ريمي اللي كانت في نفس الساحة

وهذي صورة الساحة

اليوم الثاني:

بعد ما صحينا تناولنا الإفطار...أكيد مهوب الغداء ... توجهنا لزيارة القصر الصيفي لملك النمسا ... الله معطيه عنده واحد ثاني للشتاء بس مارحنا له المهم انا رحنا لهذا القصر واسمه قصر الشنبرون ونلقى أنواع الزحمة بس ناس مرتبة وماشيه نظامي مافيه مساقط زي ربعنا وكان الدخول ب12 يورو للشخص الواحد والأطفال مجانا وتشمل جميع غرف القصر مع الحديقة مع حديقة الحيوان وكان الجو خيال غائم إلى غائم جزئيا ....حسن كراني على غفلة
وهذه صورة القصر من الخارج
علما انه ممنوع تصور داخل غرف القصر اللي كلها أثاث الملك وصوره وصور عائلته
بعدها توجهنا إلى شرفة القصر المطلة على الحديقة وهذي صورتها من فوق
وهذي صورة ثانية للحديقة علما أن غرف القصر تطل على الحديقة
بعدها توجنا إلى حديقة الحيوان الملحقة بالقصر وهذي صور الممر المؤدي لها
والحديقة غاية في الروعة والنظافة وكبيرة مرة وفيها اغلب الحيوانات بس ماعندهم ضبان
وهذي صورة البطريق اللي عايش حياته براد بالله من فضلك عندنا يبيله فريزر عشان يعيش
بعد ما خلصنا تجينا ذيك المطرة القوية ولكن الحمد لله كان معنا مظله ورجعنا للفندق
وفي الليل توجهنا إلى ساحة المشاة وتقهوينا وتعشينا زي كل الخليجيين اللي حوالينا ومالين المكان خاصة الأخوان القطريين يموتون في شي اسمه فبينا.
اليوم الثالث:
بعد الإفطار توجهنا إلى ضفاف نهر الدانوب عن طريق المترو وكانت المنطقة مليانة مطاعم وكوفيات والجلسة هناك خيال

وهذي صور الدانوب الأزرق كما يسمونه

فترة الظهر قضيناها في احد المولات الكبيرة القريبة من الدانوب وتغدينا هناك
بعد العصر خذنا المترو ورحنا لبرج الدانوب اللي يرتفع 170 متر وتشوف كل فيينا منه طلعنا فوق وخذنا ايس كريم مرة لذيذ وخالي من الكحول ... صاحي لهم... وكان سعره يعتبر رخيص بما انك في مكان سياحي وفي أوربا الكورة بيورو= 5 ريال وكان مررة لذيذ

وهذي صور فيينا من فوق البرج

وبعدها عدنا إلى الفندق وصلينا الظهر والعصر وارتحنا إلى بعد المغرب حيث توجهنا إلى مدينة الملاهي واسمها براتر وكانت كبيرة مرة وألعابها مرره تخوف >>> ماخاف ابد وابدا العب بنتي في العاب الأطفال الين ملت بعده توجهت إلى سيارات التصادم وكان الجميع داخلها خليجيين وخليجيات ومخلين اللي يشغل اللعبة يحط دي جي خليجي مرة الجسمي مرة أصالة مرة شعيل وربعنا كل ماتوقف اللعبة يحطون فيش ثاني وربعنا لعبهم همجي تصادم بعنف وفيه واحد نمساوي قام طلع عياله وقام يهوش على اللي يشغل اللعبة ويقول وش هذولي !! راح يموتون عيالي !!!
وكانت المدام تصورني بكاميرا الفيديو ويجي ذاك الخليجي ويقول لي خل المدام توقف الكاميرا عشان أهلنا قاعدين يلعبون !!!! قلت وش تبي أنت وين حنا فيه !! وإذا موعاجبك خل أخواتك يطلعون برا اللعبة وإذا مو عاجبك روح اشتكي !! مدينة الملاهي التصوير فيها مسموح فسكت !!! وراح بعيد !!!
وهذي صورة الملاهي بالنهار بس ماهو تصويري
وقبل منتصف الليل عدنا للفندق .
اليوم الرابع:
بعد الإفطار توجهنا إلى أشهر شارع للتسوق في فينا واسمه شارع ماريا هلفر وكان ملئ بالماركات العالمية وأشهر بيوت الموضة وكان مليان خليجيات >> أهم شيء عندهن التسوق

وهذه صورة للشارع

[بعد الظهر وقبل مغادرة الفندق قالت لي المسئولة سلطات المطار أرسلوا لك شي !!! قلت وشو ؟؟ طبعا بالانجليزي.... وراحت جابته وتطلع عربية بنتي اللي فقدت في المطار عند الوصول لقوها وأرسلوها للفندق !! والله الخدمات...
غادرنا الفندق وذهبنا لمحطة القطار وأخذنا تذاكر الذهاب إلى مدينة سالزبورغ والتي تبعد حولي 3 ساعات بالقطار عن فينا والمناظر طول الطريق جبال خضراء وأنهار يالله من فضلك والتي وصلناها عصرا وأخذنا الباص وتوجهنا إلى الفندق وكان أيضا رائع وقمة في النظافة فجلسنا وصلينا الظهر والعصر.

وهذه واجهة الفندق من موقعهم:

ومن ثم أخذنا الخريطة ونزلنا إلى وسط المدينة القريب من عبر شارع للمشاة تحيط به المحلات التجارية والمطاعم والكوفيات ووصلنا إلى ساحة المدينة وهناك متحف للفنان العالمي الموسيقار موزارت .. وكان بالقرب منه بيت هذا الموسيقار وهذي المدينة تفتخر بشي اسمه موزارت حتى الشوكولاته مسمينها على اسمه
وكان عند المتحف فتيات يابانيات لابسين مراييل ومعهم مدرستهم وقاعدين يغنون سيمفونيات موزارت والعالم قاعد حواليهم تتسمع

وهذه صورة لساحة المدينة ومتحف موزارت

وهذه صور لسالزبورغ القديمة والسوق التجاري

وبعد تناولنا القهوة في البلدة القديمة ذهبنا إلى نهر السالزاك الذي يفصل سالزبورغ القديمة عن الجديدة وكان الجو غائم وممطر خفيف بس مرة روعة. الغريب في المدينة هو كثرة الأزواج الشيبان 60 وفوق مدري وش مجمعهم في هالمدينة يمكن يجددون شهر العسل ....
وهذه صورة لسالزبورغ القديمة حيث يظهر النهر وفي أعلى الصورة قلعة سالزبورغ الحصينة اللي فوق الجبل.
وهذه صورة أخرى للسالزاك
وهذه صورة لأحد الجسور التي تمر فوق النهر
بعد المغرب عدنا إلى الفندق ونمنا لأن هذه المدينة ماتشوف احد يتحرك بعد الساعة 8 مساء (بعد المغرب لأن النهار طويل )

وهذه صورة لسالزبورغ في الليل على ضفة السالزاك

اليوم الخامس:

كالعادة تناولنا الإفطار ... أجل الغداء... وذهبنا إلى محطة الباصات المجاورة لنذهب في رحلة إلى البحيرات وهي عبارة عن 3 قرى كل وحدة تطل على بحيرة فذهبنا إلى أبعد وحدة بالباص وتبعد 50 كيلو عن سالزبورغ على الحدود الألمانية واسمها سانت قليقن وهي قرية هادئة مليئة بالسياح الأجانب
وهذي صور لشاطئ بحيرة سانت قليقن
وهذي صورة لأحد منازل سانت قليقن حيث تزين الورود شرفات المنازل
بعده تناولنا ايس كريم ... يقدرون هناك شي اسمه ايس كريم رغم برودة الجو.. ومن ثم ركبنا سفينة مكشوفة واتجهنا للقرية الثانية واسمها والف قانق و اللي تبعد حوالي 15 دقيقه وهذي صور للقرية من فوق السفينة
ونزلنا بالقرية وركبنا عربة خيول وأخذنا لفة وبعده توجهنا لوسط القرية وخلف محطة الباصات أخذت البوصلة عشان احدد اتجاه القبلة ويوم جيت أصلي وتجي ذيك الحرمة وتقول لا تصلون هنا .....!!!
قالت هذا طريق وتفتح باب بيتها وتروح تجيب سجادة وتقول أنا محمدية مثلكم يعني مسلمة وخلتنا نصلي وطلعت الحرمة مسلمة من البوسنة وساكنة بالقرية فودعناها وركبنا الباص إلى القرية الثالثة واسمها فوشل آم سي وكانت مثل القريتين السابقتين روعة وجمال طبيعة يا سبحان الله..

وهذي صور لها

وذهبنا إلى احد المطاعم المطلة على البحيرة وتغدينا هناك بيتزا.... يالبيتزا في النمسا خيال... وانتظرنا ساعة إلى أن جاء الباص وعدنا إلى سالزبورغ قبل المغرب وكان الطريق من القرى إلى المدينة خضار على مد النظر تقول رايحين لهايدى
بعد أن وصلنا الفندق صلينا المغرب والعشاء ونمنا.
اليوم السادس:
عارفين كالعادة بعد الإفطار ذهبنا إلى حديقة قريبة من الفندق واسمها حديقة ميرا بل وهي حديقة زهور قديمة لكنها روعة وكانت مليانه صينيين قاعدين يصورون الورود تقل أول مرة يشوفون ورد ...

وهذي صورة للحديقة

بعد الظهر حزمنا أمتعتنا وتوجهنا إلى محطة القطار للمغادرة إلى زيل أم سي التي تبعد حولي ساعة ونصف بالقطار حيث وصلناها بالعصر وتوجهنا مباشرة إلى الفندق وكان عبارة عن كوخ كبير تديره عائلة نمساوية وتتوارثه منذ عام 1482 ميلادي !!!!
وهذي صورته من الموقع.
غرف الفندق
المطعم
حطينا عفشنا وصلينا الظهر والعصر وخرجنا نتمشى حول بحيرة زيل آم سي الشهيرة . وهذي صور لها من أكثر من جهة
وهذه صورة لمسبح وشاطئ خاص على البحيرة تابعة لنفس الفندق اللي سكنا فيه
وتلقى البط والإوز والبجع معبي البحيرة وما يخاف من الناس مثل اللي عندنا...

يحلفون لو انه عندنا مايكمل ساعة الا وهو مشوي

وبعدها رجعنا للفندق وفي الطريق أخذنا غداء مشويات وكبسة من مطعم عربي اسمه علي بابا ( حلال) بالقرب من البحيرة وماقدرنا نجلس فيه من زحمة الخليجيين اللي فيه فخذنا طلبنا سفري ... ورجعنا للفندق بعد غروب الشمس. وتغدينا وصلينا وبعده نزلنا نشرب كوفي في ساحة المدينة القريبة من فندقنا وزيل آم سي عكس سالزبورغ الحياة فيها تمتد إلى منتصف الليل حيث الاستعراضات والحفلات في المقاهي والفنادق.

اليوم السابع

أكيد حفظتوا الأسطوانة بعد الفطور .... طلعنا >>> الفطور عندهم روعة مايتفوت !!! والواحد لازم يقوم بدري عشان يستغل طول النهار.. طلعنا وأخذنا الباص وتوجهنا إلى منطقة تبعد حولي 30 دقيقة عن زيل آم سي واسمها كابرون وطلعنا تلفريك من 3 مراحل الأولى 2000 متر بعدها 600 متر بعدها تلفريك عبارة عن حربة تأخذ 60 راكب وتطلع 400 متر لتصل إلى علو 3000 متر فوق سطح البحر
وبعدها ركبنا عربة معلقة نزلتنا إلى ساحة تزلج صغيرة
وتشوف الناس تطلع ومعها زلاجات وبعضهم معهم شي زي الصينية تجلس فيه وتدحدر من فوق أنواع الفلة
وطبعا ربعنا وانأ منهم ثاني مرة نشوف ثلج ألأوله في فريزر بيتنا
وأنواع التصادم والانقلاب على الثلج
وهذي صورة بنتي جنى الله يحفظها اللي أعجبها التزلج
بعده نزلنا بالتلفريك ورجعنا زيل آم سي وهذي صور للقرية
وشارع أخر
وجلسنا في ساحة المدينة نرتشف القهوة... سامع بالكلمة ووده يستخدمها وتجينا ذيك المطرة اللي تمنيتها على الصمان وروضة خريم
وبعد ماوقف المطر أخذنا فارب تجديف يدوي وتمشينا في وسط البحيرة
وهذي صورة من القارب ويظهر فندق قراند المطل على البحيرة
وهذي صورة أخرى
بعدها تناولنا الغداء في المطعم العربي وكان برياني لحم خطيير ورجعنا للفندق وسهرنا الليل بساحة المدينة وكان عندهم مهرجان مدري وشوله !! ماتلقف ابد

اليوم الثامن:

بعد اللي انتم خابرين ....الفطور أخذنا الباص وتوجهنا إلى قرية قريبة تبعد 10 دقائق وفيها حاجة اسمها الزحليقة الصيفية تطلع عن طريق تلفريك إلى قمة الجبل وتنزل بعربة تتزحلق وأنت تتحكم بسرعتها في طريق متعرج وتأخذ حوالي 15 دقيقة وأنت تتزحلق الين توصل تحت أعجبتنا اللعبة فرجعنا مرة ثانية..
وهذي صورة التلفريك
وبعد مانزلنا رحنا للكوفي اللي بجنب الزحليقة وتقهوينا فيه وكانوا حاطين خروفين وتيس للأطفال يتفرجون عليهم
شوفوا التيس اللي قاعد يأكل من العشب اليابس ومخلي الأخضر فسقان... هالخضار اللي لو تشوفه غنمنا ولابعارينا ماتت من الفرحة.
بعد المغرب توجهنا إلى الفندق وبدأنا في حزم أمتعتنا استعدادا للتوجه في الغد إلى ألمانيا القريبة بالقطار وتحديدا إلى مدينة ميونيخ.
اليوم التاسع:
غادرنا زيل آم سي الساعة 11 صباحا وركبنا القطار باتجاه ميونيخ ووصلناها الظهر وكانت مدينة رائعة ومليئة بالإخوان العرب وجلسنا فيها 3 أيام كانت للتسوق من دون زيارة أي معالم سياحية ماعدا وسط البلد.
بعدها رجعنا إلى السعودية والحمد لله على السلامة ...