شايب معصقل
وعليكم السلام ورحمه الله وبركاته
الله يحييك بين اهلك واخوانك
طبعا الكويت فيها مناطق بريه في الشمال وفي الجنوب وفي الوسط
الشمال طبعا شمال الجهراء المطلاع والروضتين والعبدلي والسالمي ويكثر فيها الربيع خصوصا الايام هذي
وفي الجنوب من الصباحيه تبدي المخيمات واكثرها للعوائل وتشوف المخيمات متلاصقه
وتكثر المخيمات للايجار ومخيمات الشركات الكبيره
وفي الوسط منطقه كبد ( نسميها جبد )
لكن لكثره الرواد وكثره الدوس الربيع يتاخر شوي والفقع يكاد ينعدم ومن هذا السبب تشوف الناس تروح للبر في المملكه لكبرها وخصوصا الصمان وساموده
اتمنى اني اجبت عن سؤالك

الحقيقه انا عندي مخيم اطلع له تقريبا كل يوم ياخذ مني الطريق من البيت للمخيم ساعه او اقل بعشر دقايق والسبب الزحمه على الطريق خصوصا ان اجازه الربيع باديه عندنا
والمخيم بعيد نوعا ما لكن ابعد مخيم ياخذ وياك ساعه ونص اذا تبي البعد وماتبي تشوف الا البر
بالنسبه لمخلفات الغزو كل يوم يطلع لنا شي من الغام وقنابل عنقوديه وتكثر في منطقه الجنوب
واخرها امس يوم نزل المطر طلعت القنابل تقول فقع
الله يبعدنا عن الالغام والحقيقه الاعلام ماقصر يقولنا اي شي غريب تشوفونه لحد يلمسه وعلى طول يتصل
وفي فرقه خاصه لتفجير الالغام ويداومون 24 ساعه خصوصا وقت الربيع