اختي انتي ذكرتي البلدان و لم تذكري المدن اللي بتروحيلها ؟ و بالنسبه للجو فهو بارد أكيد في يناير ..

ان شاء الله في ايطاليا راح انزور ميلانو وفنيسيا وروما ...يعني نحن حاطين ف بالنا 5 ايام ف ايطاليا او 6 ايام بالكثير
ومن ناحيه الجو..يعني ابا اعرف اذا نقدر نتمشى ولا الجو راح يخرب علينا لان بصراحه بعضهم قالي انكم ماراح تستانسون ف البرد ...بس انا على حسب علمي ان ايطاليا شتاها مب بارد وايد لانها صيفها يكون حار ورطب؟
وشكرا لج اختي الكريمه على الرد وماقصرتي ..

اختي الكريمه غالبا ميلانو وفينيسيا تكون ابرد بدرجه اكبر من روما
روما قد تكون مناسبه للتمشي والتجوال في النهار ..
لكن اتوقع التمشي والتجوال في ميلانو في الوقت هذا نوعا ما يضايق
عاد طبعا قبل كل شي الناس يختلفوا .. درجة البروده اللي تضايقني قد تعتبر ممتعه لغيري
اتمنى لك رحلة سعيده

اهلين -- انا اشوف انه حيكون برد بلمره في الوقت اللي بتكون متواجد فيه بروما
لاكن بردهم ما يخوف مره 00 بس لازم تاخذين احتياطك منه مع هطول الامطار المستمره 00 طبعاً بأذن الله

اختي عاشقة ام
بالنسبة لمدينة ميلانو في شهر يناير تتراوح درجات الحرارة بين 5 درجات للعظمى و -2 للصغرى
وبالنسبة لفينيسيا تتراوح بين 6 درجات و -1
اما مدينة روما فتتراوح درجة الحرارة فيها بين 12 و2
واي استفسارات اخرى انا حاضرة عزيزتي

الأخت عاشة أم مع أحترامي الشديد لآرآء الأخوة والأخوات إلا أنني لاأنصح بتاتاً السفر في شهر يناير أو فبراير ,حتى شهر مارس أيضاً!!!! فالجو بارد بارد وممطر وراح يعيق تحركاتكم ومشيكم في المدن وماراح تاخذون راحتكم بالمرة لكثرة سقوط الأمطار التي لاتتوقف إلا نادراً .... أما المبلغ المخصص للسفر فهو كافي وماراح تحتاجين لأكثر من هذا المبلغ .... بخصوص سؤالك عن أكثر منطقة تطولين فيها فأنا ما أنصح بالسفر أصلاً في هذا الوقت بتاتاً فما أقدر أنصح بأي مدينة تطولين فيها .......تحياتي

أختي تبين الصج انا بعد مانصحج تسافرين في البرد، لان ما بتستانسون وايد يمكن خاطركم تتمشون على البحر او حتى الشارع بيكون الوضع صعب شوي

أهلين أختي أنا الآن في ميلان الجو بارد ممتع وضباب
الدرجة تقريبا 2في الليل وفي النهار10
أنا واحد أحب البرد والتغيير
الوقت اللي راح تكونين موجودة فيه السوق كله خصومات بس يبيلك ميزانية للشراء
شوفي الأرصاد الجوية في هذه الفترة.
عموما لاتنسين اللبس الثقيل لأن أنا أمس لما كنت في الدومو استبردت لأن لبسي كان شتوي فقط(جاكيت خفيف)
بدون دلاقات صوف" أعزكم الله" وبنطلون خفيف(لايسمن ولايغني من جوع).
الناس لابس جلود وفرو ولفات للرقبة.
ملاحظة :كنت أشعر في البرد وأنا مستمتع بالجو البارد ورؤية الضباب.
مافي مطر الآن وكل شي تمام.على فكرة زميل لي سرقوا جنطته منه في القطار
انتبهوا على أغراضكم ولاتخلوا حاجاتكم الثمينة بارزة.

مشكورين اخواني وخواتي على المرور الاكثر من رائع وجزاكم الله خير
بس يعني بالمره مافي امل ...بس انا احب البرد وايد يعني ماعندي مشكله لكن زوجي مايحب البرد ...شو اسوي
انا خاطري اقضي شهر العسل في اورويا..ماعندي مكان ثاني..