السلام عليكم ورحمة الله وبركاته
هذا انطباعي عن اول جيه للقاهرة
طبعا الرحلة كانت من الدمام الى الرياض ثم القاهرة
يوم الاحد 23 يوليو 2006 وصلنا القاهرة وعينك
ما تشوف الا الزحمة ,الله يهديهم رجال الجوازات المصريين
المفروض بسرعة ينجزون الجوازات,
وعلى طول رحنا للفندق شيرتون القاهرة ريحنا فيه وثم تعشينا في اقرب مطعم السن ست على النيل
من بكره رحنا للحسين بصراحة كيفت على الشيشة مع شاهي فتله ,
ورحنا للمراكب الثابته على النيل الباشا والسن ست والسرايا
ورحنا كذلك رحنا للاهرامات ياهي شئ وقت الصبح كنك بالعزيزية بالخبر كلهم خليجين
بصراحة كيفت هناك بعض ,, بس بغى ينصبون علي يقول لي 250جنيه الدورة قلت يا عم طير
ليش راكب دباب بانشي قلت تبي 30 جنيه (حسيت انه كثيره بعد )وافق على طول ,,واحد سمعني
قال تعجبني خلك كذا معهم ,, وصرت ثلاث ايام وانا هناك مسنتر
ورحنا بعد للمطاعم قدورة ياهو شئ اكل فريش fresh تنقي السمك والربيان اللي تبي
اما المجمعات التجارية هيلتون رمسيس كله خليجيين,جراند حياة المجمع جديد
وستي ستارز بصراحة فخم وجديد حضرت فيه فيلم عمارة يعقوبيان بس مقطع
فيه لين قال بس ,,
اما الفطور عندك العمده و الدمياطي بشارع جامعة الدول ونعمه بشارع الهرم
دق بالفطور واضرب بعده راس فخفخينه يا سلام بعده ما تدور غير الفراش
وفيه اماكن حلوة للجلسة مثل اللوبي حق هيلتون رمسيس و لوبي جراند حياة
اما التكاسي عليك بالمكاسر يعني اسئله بالاول وشف بعده راح يوفق على سعرك
على الزحمة اللي في القاهرة ما شاء الله الحوادث قليلة
هناك في القاهرة اللي عجبتني هي ان الناس اللي نلقاهم من شباب وعوائل خليجيين في الاماكن
نفسهم نلقاهم في اماكن ثانية
بصراحة انبسطت هناك في القاهرة على الرغم من الزحمة وغلا الاسعار
لان ما جينا للقاهرة الا ندور الوناسه
تحياتي للجميع
من الشرقية