روزماري
10-05-2022 - 01:21 pm
باختصار شديد
انا مسافره للكويت خلال الايام الجايه ان شالله
كلها يومين بغرض التسوق
ودي اسأل عن احسن المجمعات وموقعها بالضبط
سمعت عن مارينا والفنار مدري هل هم الافضل فعلا؟
او فيه غيرهم؟؟؟؟؟؟؟؟؟
ابي ملابس سهره وين القاهم؟؟؟؟ مجمع معين ولابشارع معين؟
احتاج بعد محلات جلابيات فخمه للمناسبات
مشالله دايما الكويت متميزه بهالشئ
وحده قالتلي عن عمارة الحمرا انتم وش رايكم؟
بعد ابي اعرف وين تنصحوني اسكن؟؟
وافضل المطاعم على الاطلاق؟؟؟؟؟؟؟؟
انتظر فزعتكم يااهل الكويت وعارفه انكم ماراح تقصرون ابد
اجواد ونعم فيكم
السلام عليكم وأهلين هلا بأهلي وزوار ديرتي
سمعي يا بنت الأجاويد
أولا : عندي مشاركه بعنون الأسواق الرخيصه والشعبيه بالكويت بينت فيها الأسواق والمطاعم من الرخيص وحتى الغالي
ثانيا : إذا إنتي راحيه يومين أنصحج باختصار الأسواق في ثلاثة أسواق أو أربعه وهي سوف تكفي وتوفي
1- سوق مجمع الأفينيوز وهو أضخم سوق بالشرق الأوسط للماركات الأجنبيه والملابس الأوربيه
يقع على خط الدائري الخامس خلف منطقة العارضيه
2- سوق مجمع شرق يقع بمطقة شرق على شارع الخليج .
3- سوق مجمع المارينا وهو لا يختلف كثيرا عن مجمع الأفينيوز لأن مجمع الأفينيوز يحوي كثير من الماركات الموجوده في سوق شرق والمارينا يقع مجمع المارينا على الواجهه البحريه بمنطقة السالميه شارع الخليج .
4- مجمع الكوت وهو يقع بمنطقة أبوحليفه الملاصقه لمنطقة الأحمدي أول المناطق الحيه بالقرب من الحدود السعوديه إذ تبعد نصف ساعه تقريبا .
بالنسبه للجلابيات وهي تسمى بالكويت دراعات أو ومفردها
فمن المجمعات المميزه فيها مجمع الأوقاف بالكويت العاصمه بمنطقة شرق .
وكذلك يوجد مجمع يتم فيه خياطت الجلابيات وهو مجمع الرجعان بمنطقة الفروانيه خلف الجمعيه التعاونيه تجدين فيه الجلابيه بنصف سعرها بمجمع الأوقاف ، وكذلك ستجدين العبايات والملافع أقصد غطاء الرأس .ولكن ضيفتنا المحترمه ودي أنصحك نصيحه ترى البياعين بالكويت متعودين على المساومه بالأسعار يعني إذ قال لكي البياع دينار قولي له نصف دينار ولا تستحين وإسألي أكثر من محل عن نفس البضاعه خاصه الجلابيات ، ويجب أن تشرطي على البياع إمكانية إسترجاع أو تبديل السلعه ويكتب ذلك بالفاتوره
وخفي إشوي على نفسج وعلى أبو العيال
وفي أمان الله .