اضم صوتي لصوتك واهل البحرين الطيبين ماراح يقصرون

هلا فيكم ....
السوق الإيراني أو السوق الشعبي (مثل ما نسميه في البحرين ) عباره عن سوق شعبي .. متكون من عدة محلات متراصة جنب بعضها ...
البضايع اللي فيه عبارة عن أغذية وبهارات وملابس وعطورات رخيصة .. بخور .. أواني منزلية .. فيه قسم (سوق المقاصيص) كل جمعه .. وفيه محلات أثاث وتنجيدات وسجاد ... يعني من كل شي ..
فيه محل الكترونيات كبير ... وفرع من محلات رامز المشهورة .. وسوبر ماركت كبير اسمه المركز اللبناني ....
الموقع: في مدينة عيسى ..
الوصف: اللي بيجي من الجسر ... من السعودية .. يمسك على طول الخط .. ليحد ما يوصل للكوبري الرابع .. في قبله مخرج عاليمين .. يؤدي إلى مدينة عيسى .. تاخذون هالمخرج ..
بيصادفكم دوار .. تتركونه وتروحون سيده .. عند الدوار الثاني .. تلفون يسار ... وتدخلون من خلال بوابة مكتوب عليها (بوابة مدينة عيسى)
بعد ما تدخلون .. عند اول دوار .. تلفون يمين ... .. وعند الدوار الثاني ... تلفون يسار ... ..
بتلقون بعد دوار ثالث .. تلفون عنده يمين ... بتمشون في هالشارع .. . بتمرون على محطة بترول على يدكم اليمين ... معناتها انكم ماشيين صح ...
بتجيكم كذا لفه عاليمين .. اخذوا اللفة اللي فيها المركز اللبناني ... .. وهذا هو السوق الشعبي ....
ان شاء الله أكون افدتكم .. وحياكم الله ..

1. يوجد كذلك المركز اللبناني التجاري في نفس المنطقة ..


2. موقع مدينة عيسى كالتالي ::

ما قصرت الاخت الغالية ..
بس حبيت أوضح أن أسمه الرسمي ( سوق مدينة الشعبي ) وهو مدرج ضمن مواقع البحرين السياحية في هيئة السياحة التابعة لوزراة الاعلام ، وليس السوق الايراني اسمه
طبعاً منطقة سوق مدينة عيسى الشعبي غنية بالأسواق الشعبية من مختلف الخدمات مثل ما تفضلت اختي ( الغالية ) ..
يوجد بالقرب من السوق ( معرض رامز للتجارة ) وقريباً راح يفتح مركز تجاري الآن هو تحت الانشاء ملاصق جداً لسوق مدينة عيسى الشعبي ( السوق الايراني ) ..
وهناك مجمع أسواق تجارية يحتوي على محلات تبيع أدواتها بأقل من دينار بحريني ( 10 ريال سعودي ) ، كما يوجد مجمع الكترنيات ضخم في نفس المنطقة بجوار سوق مدينة عيسى الشعبي ( فرق 20 متر يمكن بينهم ) ، وطبعاً هذا المجمع يسمى ( هوم الكترونكس ) ومتخصص بأحدث الأجهزة الالكترونية ، يتكون هذا المجمع من طابقين ..

يوجد كذلك المركز اللبناني التجاري في نفس المنطقة ..

اذاً اخوي هذي المنطقة كلها تسمى ( سوق مدينة عيسى الشعبي ) ولكن سوق مدينة عيسى الشعبي بالدرجة الأولى هو السوق الشعبي ذو الأزقة الشعبية اللي تبيع الملابس الشعبية وشغلات الديكور من تحت شغل اليد الخفيف وشغلات ايرانية أخرى إضافة إلى منتجات محلية وآسيوية وعربية أخرى ..
..

موقع مدينة عيسى كالتالي ::

أول ما تنزل من جسر الملك فهد تعدي أول جسر معلق ، وتكمل سيدا راح تصادق ثاني جسر معلق وبعده بحوالي 150 متر جسر آخر عدهم وأكمل إلى الأمام ، رابع جسر معلق راح تشوف معاه العلامات الارشادية نحو ( مدينة عيسى ) راح تدل على الانعطاف يمين ، بعد الانعطاف يمين راح تصادف دوار ، بعد الدوار كمل سيدا إلى الدوار الثاني راح تشاهد بوابة مدينة عيسى على يسارك ، ادخلها بعد ذلك راح تشاهد اشارات ارشادية حوالي 4 اشارات كلها تشير نحو ( سوق مدينة عيسى الشعبي ) ..
والسموحة على الاطالة ..

اشكر كل من افادني على استفساري
لكن هل محل رامز يكون بجانبه محل المحيط

محل المحيط يقع بالقرب من رامز الذي في المحرق، أما رامز الذي بجوار السوق الشعبي فهو في مدينة عيسى.

ماقصرت اختنا الغالية واخونا بحريني
سبق لي زيارة السوق الشعبي
وعندي ملاحظتين :
اول شئ مكانه بعيد
ثاني شئ وهو المهم السوق مايستحق الزيارة نهائيا مافيه شئ مميز عن الاسواق الشعبية اللي عندنا فالسعودية
هذي وجهة نظري
تحياتي للجميع

الله يجزاكمخير
يعني مايسوى روحت السوق ابي عنججك وحبة خضره تعرفونه وايد احبه موجود في السوق الشعبي او تتوفر في مكان ثاني ابي تفاصيل اكتر

هو عبارة عن سوق شعبي واسمة السوق الشعبي بمدينة عيسى ويعرف بين العامة بالسوق الايراني

السوق الايراني هو الاسم القديم للسوق الشعبي بمدينة عيسى حاليا.. وتم تغيير الاسم بعد تجديده، وسمي بالسوق الايراني لأنه أغلب اللي يشتغلون فيه سابقا من الايرانيين، ومع التجديد تنوع أصحاب المحلات فيه، فبالاضافة إلى الايرانيين تجد اليمنيين وأصحاب جنسيات أخرى يعملون بالسوق ولديهم محلات..
السوق الشعبي متنوع تجد فيه الملابس، والسجاد، ومحلات الأثاث والتنجيدات، البهارات والمكسرات، البخور والعطور، الاكسسوارات.. الالكترونيات (هوم الكترونكس).. سوبرماركت (المركز اللبناني).. ودايسو (محل ياباني كل شي في ب600 فلس)