1. اخواني واخواتي خبراء الهند الكرام


2. اسعد الله مسائكم بكل خير

السلام عليكم ورحمة الله وبركاته

اخواني واخواتي خبراء الهند الكرام

اسعد الله مسائكم بكل خير

اخوكم الدكتر محتاج سائق باسرع وقت ممكن وكان الخيار الاول امامي هو الاستقدام عن طريق مكتب وفي طريقي الى المكتب اتصل علي صديقي صويلح وهو من عشاق السفر والسياحة ورفيق دربي في جميع سفرياتي - سألني صويلح وينك فيه قلت له ابد رايح مكتب استقدام عشان استقدم سائق هندي مضبوط بدال المصري اللي انحاش وخلانا قال أجل تبي تستقدم سائق من الهند؟ قلت اي والله ياصويلح انا محتاج سائق وابيك تدلني على افضل مكتب بحكم علاقاتك الواسعة قال بس ؟ تامر امر ... انت خلنا نتقابل وانا اوديك افضل مكتب حق واحد صديقي طبعا انا انبسطت قلت خلاص ضمنا الخصم وضمنا السرعة بالتنفيذ - يالله لك الحمد - اتفقنا نتقابل في الكوفي شوب واول ماوصلت واشوف صويلح مرتز ويوزع ابتسامات دخلت ولقيت الطلب جاهز على الطاولة وصويلح يرحب فيني على غير العادة ويقول اسمع والله ماتدفع ريال ترى الحساب عندي عاد انا عرفت ان الموضوع فيه إنُ لكن مادققت لان كل همي نروح المكتب ونخلص موضوع السائق مع صديق صويلح المهم قلت ياسلام عليك ياصويلح تصدق عاد انا دايم افتخر فيك واتذكر المثل اللي يقول الصديق وقت الضيق يالله دق على خويك خلنا نتقابل طبعا انا كنت اتوقع انه يفتح الجوال ويتصل على صديقه لكن أشوف صويلح فتح اللاب توب!!!! قلت اكيد صويلح طلع له بطلعة جديدة ويبي يكلم خويه عن طريق النت ويستعرض المهم انتظرت شوي ويوم شفته تأخر ناظرت في الشاشة لقيت صويلح فاتح موقع فيه صور وأثاري الأخ ما يعرف مكتب ولا عنده صديق صاحب مكتب وكل هالمقدمات كانت تخطيط لسفرة جديدة الى الهند خلال اجازة منتصف الترم لاستقدام السائق والسياحة في نفس الوقت لأنه من زمان يسمع عن كيرلا ويتمنى يزورها (يقول نضرب عصفورين بحجر ههه) قلت شوف ياصويلح انا احترمك جدا انت واخواننا الهنود واحترم اللاب توب حقك بعد واقدر مدى قدرتك على استخدام الحكم والامثال في اصعب الاوقات ولكني اعترض على فكرة قتل العصافير وهالمرة اسمح لي اقول لك جعلك بحجر يفك راسك نصين انت واللاب توب حقك الحين مالقيت الا الهند انت ووجهك ؟؟ صويلح شعر بالاحباط ولكنه استمر في الدفاع عن نفسه وقال انت اصلا وش فهمك بالسياحة الشرهة مو عليك الشرهة علي انا اللي اخاويك واسافر معك احد يشوف هالصور ويروح مكتب استقدام ؟؟؟ وبعد مناوشات وملاسنات استمرت خمس دقائق وكان من ضمنها ان كل واحد فينا عرض على الثاني يشتغل سواق عنده اقنعني صويلح بالفكرة وما اخفي عليكم لعب في مخي وبديت أفكر في الموضوع جدياً لكن لاني اعرف ان صويلح عمره ما سافر الهند ولا يدري وينها فيه اشترطت عليه نكتب موضوع بالمنتدى ونطلب المشورة من ذوي الاختصاص واشترطت عليه يصور الرحلة كاملة وينزل تقرير بالمنتدى بعد مانرجع ولم يتردد في الموافقة على شروطي والان محتاجين مساعدتكم ونصايجكم:
1- رأيكم في الفكرة وهل هي قابلة للتنفيذ ام لأ
2 - افضل طيران (الافضلية لسمعة الخطوط والرحلات المباشرة)
3 - وهو الأهم بالنسبة لصويلح - مسار الرحلة لشخصين من والى جدة مع برنامج سياحي لمدة ست ليالي تقريبا (التأشيرة -مطار القدوم - المنتجعات والفنادق - التنقلات - المسافات - مطار المغادرة الخ)
4 - وهو الأهم بالنسبة لي - اجراءات استقدام السائق (المكاتب - الاجراءات - المدن اللي ممكن استقدم منها - السفارة - الخ )
السفر يوم الجمعة والعودة يوم الخميس ان شاء الله تعالى
بانتظار ردودكم وشكرا